23/01/2025
မဟာဝီရ အိုဗုဒ္ဓ
`မဟာဝီရ အိုဗုဒ္ဓ´ သီချင်းမှာ ဗုဒ္ဓဝင် ရဲ့
ကောင်းခန်းကိုထည့်ရေးနိုင်ခဲ့တဲ့ တေးရေးဆရာမောင်မောင်ဇော်လတ်နဲ့
ထူးအိမ်သင်
ကိုငှက် ။ ။ " ဒီသီချင်းရဲ့ သံစဥ်လေးကို
မောင်မောင်ဇော်လတ် ကျွန်တော့်ဆီပေး
ထားတာ၁၉၉၀ သူမန္တလေးဆေးကျောင်းတက်စလောက်ကတည်းက။ ဘာအကြောင်းအရာရေးမလဲစဥ်းစားရင်းကြာနေတာ။ ၁၉၉၂ လောက်မှာမှ ဗုဒ္ဓကို
ပူဇော်တဲ့သီချင်းရေးမယ်ဆိုပြီး သူရေးတဲ့ ရိုးရိုးသံစဥ်လေးကို ကျွန်တော်နည်းနည်းပြန်ပြောင်းပြီးဆိုတာ။
တကယ့်တူရိယာအစစ်တွေပဲသုံးခဲ့တာ
ဗုဒ္ဓ ပွင့်တော်မူရာ မဇ္စျိမဒေသရဲ့အငွေ့အသက်လေးတွေပါအောင်
-တာပလာ ပုလွေ ခြူ - နောက် ခွင်ခွင် ဆို
တဲ့ အသံလေးတွေ က အစ ။
ရွှေတိဂုံ ဘုရားက ကလေးကစားတဲ့ လင်းကွင်းကလေးတွေ သွားဝယ်ပြီး ကျွန်တော်ကိုယ်တိုင်တီးထည့်တာ။
သီချင်း ရဲ့ Arrangement ကိုတော့
မောင်မောင်ဇော်လတ် ရော ကျွန်တော်
ရော IC တီးဝိုင်းရော အားလုံးပေါင်းပြီး
လုပ်ကြတာ ပါ။
ဒီသီချင်းမှာက
မဟာဝီရ လို့လည်း အမည်တွင်တဲ့
`နိဂဏ္ဍနာလပုတ္တ´ ဂျိန်းဘုရားကိုပြောတာ
မဟုတ်ပါဘူး။
ကျွန်တော်ဆိုလိုတဲ့ မဟာဝီရ က
-ကြီးမြတ်သောရဲရင့်ခြင်းနဲ့ ဂေါတမဗုဒ္ဓ-"
မောင်မောင်ဇော်လတ် ။ ။ ` သံစဥ်ကို
ပေးထားပြီး ဆယ်နှစ်လောက်ကြာမှ
စာသားအပြည့်အစုံရေးကြတာ။ ကြားထဲမှာ သုံးဆင့်လောက်ပြောင်းပြီး မှ
ဒီဗုဒ္ဓပူဇော်တဲ့သီချင်းအဖြစ်ကိုရောက်တာ ၂၀၀၁ ခုနှစ် - အစိမ်းရောင်ရက်စွဲများ - Album ထဲမှာမှ ပါနိုင်ခဲ့။
မြန်မာသံဘက်မှာ
ဓမ္မပူဇေမိသီချင်းတွေကို ဒေါ်တင်တင်မြ
တို့ဆိုကြတယ် စတီရီယို ဘက်မှာလည်း
အဲ့ဒီ့လိုမျိုးလေးလုပ်ချင်တယ်လို့
ကိုငှက်က စပြောတာ။
ကိုငှက်က ဘုန်းကြီးကျောင်းတွေသွား
စာချကိုယ်တော်တွေဆီမှာ
ပါဠိအနက်တွေသေချာ မေးပြီးမှရေးတာ။ ´.. ... ...
တွံတေးသိန်းတန် သီချင်းတွေ မှာ စကားပြောလေးတွေပါသလို ဒီသီချင်းရဲ့
ဆုံးခါနီးလေးမှာလည်း မြူးကြွနေတဲ့တီးလုံးသံတွေကြားမှာ
မောင်မောင်ဇော်လတ်ရွတ်တဲ့ ပါဠိ လို က
` ယေ ဓမ္မာ ဟေတုပ္ပ ဘဝါ တေသံ ဟေတုံ
တထာဂတော အာဟ တေသဥ္စယော
နိရောဝါ ဧဝံဝါဒီ မဟာသမဏော ဗုဒ္ဓ ´
ခဏနေတော့ တီးလုံးသံတွေ တိုးသွား
နှေးသွားပြီး ထူးအိမ်သင် ရဲ့ မြန်မာလို
ရွတ်တဲ့
" အကြင်တရားတို့သည် အကြောင်းကြောင့်ဖြစ်ကုန်၏
ထိုဖြစ်ရာအကြောင်းကိုလည်းကောင်း
ထိုအကြောင်းအကျိုးတရားတို့၏
ချုပ်ငြိမ်းရာနှင့် ချုပ်ငြိမ်းကြောင်းကို
လည်းကောင်း အထာဂတ အရှင်သည်
ဟောတော်မူအပ်ပြီ မြတ်သောရဟန်း
သည် ဤသို့အယူရှိ၏ "
စကားသံ ဆုံးခါနီးမှာ တီးလုံးသံတွေ
ပိုမြန်လာ ပိုကျယ်လာ
တကယ်တော့ အဲ့ဒီ့ စကားတွေဟာ
ဗုဒ္ဓဝင် ရဲ့ ကောင်းခန်း 🎼🎼🎼.. ... ...
ဘယ်လို ကောင်းခန်းလဲ ဆိုတော့ကာ... .. ... ...
လွန်ခဲ့တဲ့ နှစ်၂၅၆၀ ကျော်...
မာဂဓတိုင်း ရာဇဂြိုဟ်မြို့တော်မှ
မနက်ခင်းမှာပင်အသွားအပြန်သွားနိုင်လောက်တဲ့ ပုဏ္ဏား ရွာကြီးနှစ်ခု။
နာလကရွာ က ရူပသာရီပုဏ္ဏေးမကြီးရဲ့
သားသမီး၇ဦးထဲမှ သားကြီး "ဥပတိဿ"
ကောလိတရွာ က မောဂ္ဂလိပုဏ္ဏေးမကြီး
ရဲ့ သားကြီး " ကောလိတ " ။
ရွာရဲ့ချမ်းသာတဲ့မိသားစုတွေကနေ
ပေါက်ဖွားလာသူတွေမို့
ရုပ်ချောပညာတတ် သူဌေးသားလေးနှစ်ဦး
` တောင်ငါးလုံး ကာခို ရာဇဂြိုဟ် ´ မြို့
ကြီးရဲ့ တန်ဆောင်မုန်းလပြည့် တောင်ထိပ်ပွဲသဘင် ညတစ်ညမှာတော့။ ခါတိုင်းနှစ်ပွဲသဘင်
တွေမှာ လို ရယ်မောစရာ ထိတ်လန့်စရာ
တွေကို သူငယ်ချင်းနှစ်ယောက်လုံး မရယ်မိ မထိတ်လန့်မိတော့ ။ သဘင်သည်
တွေကိုလည်း ဆုချီးမြှင့်ပေးလိုစိတ်မရှိကြတော့။
` နောင်အနှစ် ၁၀၀ လောက်မှာ ဤပွဲ
သဘင်ရှိသူအားလုံး သေဆုံးကုန်ကြလတ္တံ့။ ဤသေခြင်းသဘောမှလွတ်မြောက်
ရေးတရားကိုရှာသင့်ပြီ ´ ဟု
သူတို့နှစ်ဉီး စလုံး တွေးဖြစ်ကြ ကာ။
ပွဲသဘင်က အပြန်လမ်းမှာပဲ ရာဇဂြိုဟ်
ရဲ့ နာမည်ကျော် သဥ္စယ သိဥ္စည်းဆရာကြီးထံမှာ ပရိဗိုဇ် ရဟန်းဝင်ပြုကြ။
သူတို့ရောက်ချိန်မှစ၍ သိဥ္စည်းဆရာကြီး
လည်း လာဘ်ပေါများပြီး အခြံအရံလည်းများလာခဲ့။
ဆရာကြီးထံမှအတတ်ပညာနည်းနာတို့ကို ရက်အနည်းငယ် သင်အပြီးမှာ တတ်မြောက်ကြသည်ဖြစ်၍
" ဆရာတို့၏အတတ်ပညာသည် ဤမျှထက်ပို၍ရှိပါသေးသလော "
` ဤမျှသာရှိပေသည် သင်တို့လည်း အလုံးစုံတတ်မြောက်ကြပေပြီ ´ ဆိုသော
အခါ
-လွတ်မြောက်ရေးတရားအစစ်အမှန်ကို
ဟောပြနိုင်သူတစ်စုံတစ်ယောက်ကိုထပ်
မံရှာဖွေကြအံ့ ။ တစ်ယောက်ကလွတ်မြောက်ရေးတရားထူး အရင်နာခဲ့ရ
သော် ကျန်တစ်ယောက်ကို ပြန်ပြောစတမ်း - ဟု သူငယ်ချင်းနှစ်ဉီး
ကတိထားကြကာ လူချင်းခွဲ၍ ဆရာရှာထွက်ကြလေ၏
အချိန် ကား
သက္ကရာဇ် ၁၀၃ ခု ပြာသိုလကွယ်နေ့ ။
ဓမ္မစကြာတရားဦးနာကြားခွင့်ရခဲ့သူ ပဥ္စဝဂ္ဂီ ၅ ပါးထဲ မှ
အသက်အငယ်ဆုံး `ရှင်အဿဇိ ရဟန္တာ`
ဆွမ်းခံကြွလာချိန် တွင်
အလှုခံထွက်လာသော"ဥပတိဿပရိဗိုဇ်"
နှင့် ရာဇဂြိုဟ် မြို့တွင်းတစ်နေရာတွင်ဆုံ
မိကြရာ
ဥပတိဿ ၏ စိတ်တွင် " ငါသည် ဤရဟန်းမျိုးကို ယခင်ကမမြင်ခဲ့ဖူးချေ။
ရဟန်းနောက်သို့ အစဥ်တစိုက်လိုက်သွား
၍ မေးမြန်းကြည့်အံ့" ဟု အကြံဖြစ်၏
ရှင်အဿဇိသည် မျှတလောက်သောဆွမ်းကို
ရ၍ သင့်လျော်သောနေရာ၌ ဆွမ်းဘုဥ်း
ပေးရန်ပြင်ရာ နောက်မှကပ်ပါလာသော
ဥပတိဿ က သူ့၌ပါလာသည့် အခင်းအင်းပျဥ် ကို ခင်းပေး၏
ဆွမ်းဘုဥ်းပေးပြီးသောအခါတွင်လည်း ဥပတိဿ က ရေကရားမှ
ရေကို ဆက်ကပ်၏
ပြီးနောက် မေးလျှောက်လေ၏
"ငါ့ရှင်၏ ဣန္ဒြေအဖြာဖြာတို့သည်
ကြည်လင်ကုန်၏ ငါ့ရှင်၏ဆရာကားအဘယ်သူဖြစ်ပါသနည်း၊ အဘယ်သူ၏
တရားကိုနှစ်သက်ပါနည်း၊ အကျွန်ုပ်အားဟောကြားပေးပါ"
` ငါ့ရှင် ငါကား ဤသာသနာတော်၌ ရဟန်းအဖြစ်သို့ရောက်သည်မှာမကြာသေး တရားအကျယ်တဝင့်ဟောကြားရန်တတ်နိုင်မည်မဟုတ် ပါ ´
" ငါ့ရှင်စွမ်းနိုင်သမျှသာဟောကြားပါ
ဟောသမျှကို တန်ဆာဆင်၍အကျယ်
ဖြန့်နားလည်ရန်မှာ အကျွန်ုပ်တာဝန်သာ"
` သို့ဖြစ်လျင်ကောင်းစွာ နာယူပေလော့
* ယေဓမ္မ ဟေတုပဘဝါ တေသံဟေတုံ
တထာဂတော အာဟ။ တေသဥ္စ ယောနိရောဓော ဧဝံဝါဒီ မဟာသမဏော *
* အကြင်အကျိုးတရား တို့သည်
အကြောင်း ကြောင့်ဖြစ်ကုန်၏။
ထိုဖြစ်ရာအကြောင်းကိုလည်းကောင်း။
ထိုအကြောင်းအကျိုးတရားနှစ်ပါးတို့၏
ချုပ်ငြိမ်းရာ နိဗ္ဗာန် နှင့်
နိဗ္ဗာန်၏အကြောင်း ကိုလည်းကောင်း
ငါ၏ဆရာ မြတ်စွာဘုရားရှင်
ဟောတော်မူအပ်သည်
မြတ်သောရဟန်း သည် ဤသို့အယူရှိ၏ ´
ဤဂါထာ၏ထက်ဝက်မျှကြားနာရခိုက်
မှာပင် ဥပတိဿ သောတာပန် တည်လေသည်
" အကျွန်ုပ်တို့၏ဆရာ မြတ်စွာဘုရား
ယခုအဘယ်မှာ သီတင်းသုံးပါသနည်း"
` ပြီးခဲ့သောရက်ပိုင်းက ရာဇဂြိုဟ်ဘုရင်
ဗိမ္ဗိသာရ ဘုရင်လှုဒါန်းခဲ့သည့် ဝေဠုဝန်
ဥယျာဥ် ၌ သီတင်းသုံးနေပါသည် ´
" အရှင်ဘုရားရှေ့ကကြွတော်မူနှင့်ပါ။
အကျွန်ုပ် မှာကား
အမြိုက်တရားထူးရသူသည် တစ်ဦး ကို
ပြန်ပြောစတမ်း ကတိကဝတ်ပြုထားသည့် သူငယ်ချင်းကို ပြန်ခေါ်၍ မြတ်စွာဘုရားထံသို့ လိုက်ခဲ့ပါမည် "
ဟု ပြောကာ ရှင်အဿဇိကို ရှိခိုး၍
လက်ယာရစ် သုံးကြိမ်လှည့်ပြီးမှ မိမိနေရာ ပရိဗိုဇ်ကျောင်းသို့ပြန်လာ၏
ကောလိတ လည်း
သူငယ်ချင်းဖြစ်သူ ဥပတိဿ ၏ ကြည်လင်သောမျက်နှာသွင်ပြင်မြင်သည်နှင့် အမြိုက်တရားရခဲ့ပေပြီဟု
သိ၍ဆီး၍မေးရာ
ရှင်အဿဇိ ဟောကြားသည့် * ယေဓမ္မာ.. အစရှိသောဂါထာကို ဥပတိဿကပြန်
ဟောပြသည် နှင့် ကောလိတလည်း
သောတာပတ္တိဖိုလ်၌တည်လေ၏
ထို့နောက် သူတို့၏ ဆရာသဉ္စည်းဆရာကြီးထံသွား၍ " လောက၌ မြတ်စွာ
ဘုရားပွင့်တော်မူပါပြီ တရားတော်မြတ်
သံဃာတော်မြတ်ပေါ်ထွန်းခဲ့ပါပြီ
ဘုရားရှင်ထံသွားကြပါကုန်အံ့ဟု "
အတူသွားကြဖို့ ခေါ် ဆောင်ရာ
` ငါမလိုက်လို ငါသည်လူအများ၏ဆရာ
အဖြစ်နေခဲ့သည်
ယခုမှ သူတစ်ယောက်၏တပည့်အဖြစ်
နေလိုက်သော် ရေလောင်းအိုးစရည်းကြီး
မှ ရေအိုးငယ် ပြန်ဖြစ်သည်နှင့်တူလိမ့်မည် ´
" ဘုရားပွင့်တော်မူပြီဖြစ်၍ လူအများတို့
သည် နောင်သော်ဘုရားရှင်ထံသို့သာ
သွားကြလိမ့်မည် ဆရာအသို့ပြုနိုင်တော့
မည်နည်း"
` လောက၌ ပညာရှိ များသလောပညာမဲ့
များသလော ´
" ပညာမဲ့ များပါသည် "
` သို့ဖြစ်လျင် အနည်းစုပညာရှိတို့သည် ဂေါတမဘုရားထံသွားလိမ့်မည်
အများစုဖြစ်သော ပညာမဲ့တို့ကား ငါ့ဆီလာကြ ကုန်လတ္တံ့ ´
ဟု ဆိုကာ ကျန်ရစ်ခဲ့လေ၏
သူတို့နှစ်ဉီး ဝေဠုဝန် ဉယျာဉ် သို့ဝင်လာချိန် တွင်ပင် မြတ်စွာဘုရား က
" ရဟန်းတို့ ဤ ဥပတိဿ နှင့်ကောလိတ တို့သည် ငါ ဘုရား၏ အဂ္ဂသာဝက အစုံ အမြတ်ဆုံးတပည့်အစုံ ဖြစ်ကြကုန်လတ္တံ့"ဟု မိန့်၏
` အရှင်ဘုရားထံ၌ ရဟန်းအဖြစ်ကိုရလိုပါသည်။ရဟန်းအဖြစ်ကိုပေးတော်မူပါ
လော့ ´
" ဧဟိ ဘိက္ခု ရဟန်းတို့လာကြလော့ ဆင်းရဲဒုက္ခအဆုံးကို ကောင်းစွာပြုနိုင်ရန် မြတ်သောအကျင့်ကိုကျင့်ကြကုန်လော့ "
မြတ်စွာဘုရား လည်း လျောက်ပတ်သောတရားဒေသနာတို့ကို ဟောကြားတော်မူ၏
ရဟန်းဖြစ်သည့်နေ့မှ
၇ ရက်မြောက်သည့်နေ့တွင် ကောလိတရဟန်းသည် ရဟန္တာ ဖြစ်တော်မူ၍။
၁၅ရက် မြောက်နေ့တွင် ဥပတိဿရဟန်းလည်း ရဟန္တာအဖြစ်သို့ရောက်တော်
မူ၏
ဥပတိဿရဟန္တာဖြစ်သည့် နေ့၌ပင်
မြတ်စွာဘုရား သည် ရဟန်းပရိတ်သတ်အလယ်၌
ဥပတိဿရဟန်း ကို
သာရီ ၏ သား ဟု အနက်ရသည့်
"ရှင်သာရိပုတ္တရာ"
ပညာအရာဧတဒတ် ရသူ
လယ်ယာရံ
ပထမအဂ္ဂသာဝက အဖြစ်လည်းကောင်း
ကောလိတရဟန်း ကို
မောဂ္ဂလိ ၏ သား ဟုအနက်ရသည့်
`ရှင်မောဂ္ဂလန် ´
တန်ခိုးအရာ ဧတဒဂ်ရသူ
လက်ဝဲရံ
ဒုတိယ သာဝက အဖြစ်လည်းကောင်း
သတ်မှတ် ချီးမြှောက်တော်မူလေသည်။
- * ရှင်သာရိပုတ္တရာ ၏ လက်ဦးဆရာ အပေါ် ဂါရဝ * -
ရှင်သာရိပုတ္တရာ သည် ရှင်အဿဇိ နှင့် တစ်ကျောင်းတည်း သီတင်းသုံးရသောအခါ
မြတ်စွာဘုရား အားဆည်းကပ်ခစားအပြီး၌ ရှင်အဿဇိ ထံသို့ သွား၍ဆည်းကပ်ခစားလေ့ရှိ၏
ညစဥ်လည်း ရှင်အဿဇိ ရှိရာအရပ်ကို အမြဲတမ်းဦးခေါင်းပြု၍အိပ်တော်မူလေ့ရှိ၏
ထိုအခါ အခြားရဟန်းငယ်တို့က ရှင်သာရိပုတ္တရာ ကား မိစ္ဆာဒိဌိအယူကိုမစွန့်သေး။ အရပ်မျက်နှာတို့ကို ရှိခိုးလျက်ပင်ရှိသေးသည်ဟု စွပ်စွဲပြောဆိုကြကုန်၏
ထိုအခါ မြတ်စွာဘုရား က
" သာရိပုတ္တရာ သည် အဿဇိမထေရ်ထံမှ တရားဦးနာရ၍
သောတာပန် ဖြစ်ရခြင်းကြောင့်
မိမိ၏လက်ဦးဆရာကိုရှိခိုးခြင်းသာဖြစ်ပေသည်" ဟုမိန့်တော်မူမှ ရဟန်းငယ်တို့လည်း ရှင်သာရိပုတ္တရာ အပေါ် ယုံမှားသံသယကင်းကာပိုမိုကြည်ညိုကြလေ၏
သက္ကရာဇ် ၁၀၃ ခု ကဆုန် လပြည့်နေ့ ဘုရားအဖြစ်သို့ရောက်တော်မူပြီးနောက်
ဆယ်လ လောက်အကြာတွင်ပေါ်ထွန်းလာသည့် လက်ယာရံ လက်ဝဲရံ
ရဟန္တာနှစ်ပါး နှင့်အတူ သာသနာရေး ဆောင်ရွက်ရသည့် ၄၄ ဝါ (၄၄ နှစ်)သည်
ပို၍မြိုင်ဆိုင်ခဲ့၏ ပို၍ခရီးတွင်ခဲ့၏
" ရှင်သာရိပုတ္တရာ " သည်
သာသနာသို့ဝင်ရောက်စ ရဟန်းငယ်များကို တရားဓမ္မဟောပြ၍ သောတာပန် အဖြစ်သို့ အပို့အဆောင်ကောင်းလွန်းသူ ဟု
မြတ်စွာဘုရားကိုယ်တိုင်ချီးမွမ်းတော်မူခဲ့။
ထို့ကြောင့် ရှင်အဿဇိ က ဥပတိဿ ကို တရားအနည်းငယ်
ဟောလိုက်သည့် ဖြစ်ရပ်လေးသည် ဗုဒ္ဓဝင်ထဲမှ ဇာတ်ဝင်ခန်း
ကောင်းတစ်ခု ပင် ဖြစ်ပေတော့သည် ။
ကျွန်တော်ဘိုဘိုထွန်း ငယ်စဉ်က အမေ့ရဲ့ အဖေ အဖိုးဖြစ်သူနှင့်နေရစဥ်
ရှင်ဇနကာဘိဝံသ ရေးသား
ပန်းချီဦးဗကြည်ရေးဆွဲသည့် ရုပ်စုံဗုဒ္ဓဝင် စာအုပ်လေးကို ကာတွန်းဖတ်သလို ဖတ်ခဲ့ရသည်ဖြစ်ရာ
ဤPost ၏ သရုပ်ဖော်ပုံလေးအဖြစ်
ပန်းချီဦးဗကြည် ၏ လက်ရာကောင်းပုံလေးကို ထည့်လိုက်ရပါသည်
.. ... .... ... ...
ပါဠိစာပေနှင့်မရင်းနှီးမကျွမ်းဝင်သည့်လူငယ်များကို တစ်စွန်းတစ်စလောက်ဖြစ်ဖြစ်သိစေလိုသည့် တေးရေးသူတို့
စေတနာကလည်း အထင်းသား။
ခက်ဆစ် ဖွင့်သလို ရေးပြထား
ဒုက္ခ၏ အကြောင်း = သမုဒယ
အကြောင်းအကျိုးတို့ချုပ်ခြင်း
= နိယောဓ
မှန်ကန်သည့်ထွက်မြောက်လမ်း
သည်ကား = မဂ္ဂ
အမှန်ကို မမြင်နိုင်ခြင်း = အဝိဇ္ဇာတရား
အရာရာကိုတွယ်ငြိသည့် = တဏှာ
သံသရာစက်ဝန်းအား ချိုးဖျက်သွား ဗုဒ္ဓ.. ... ... ... ... ... ...
တေးရေးနှစ်ဦး ရဲ့ ထောင့်စေ့မှုက သီချင်းအဖွင့် မှာ " ဗုဒ္ဓံသရဏံ ဂစ္ဆာမိ ... " စတဲ့ သရဏဂုံ သုံးပါး ဘုရားရှိခိုးနဲ့ စသလို သီချင်းအဆုံး မှာ လည်း
" ဗုဒ်ဓံသရဏံဂစ်ဆာမိ ... " နဲ့
ပြန် အဆုံးသတ်ခဲ့။
` မေရှင် ´ ဆိုတဲ့ အောင်ခြင်းရှစ်ပါး သီချင်းပျံနှံ့မှုက ဘုန်းကြီးတို့တရားဟောတာထက်သြဇာကြီးတယ် လို့
အမရပူရမဟာဂန္ဓာရုံ ဆရာတော် ရှင်ဇနကာဘိဝံသ
( ၁၉၀၀-၁၉၇၇ ) က လည်း
မိန့်ခဲ့ဖူး။
* ` မဖြစ်နိုင်တော့တဲ့ နှမြောစရာ Plan´ *
ကိုငှက် ။ ။ " ဗုဒ္ဓ ရဲ့ ဖြစ်တော်စဥ်
ဗုဒ္ဓဝင် အကြောင်းတွေကို စီးရီးတစ်ခွေစာလောက် လုပ်ချင်တယ် "
မောင်မောင်ဇော်လတ် ။ ။ ` အဲ့ဒီ့အစီအစဉ် ကို ကိုငှက်နဲ့ တိုင်ပင်ထားတာပါ ။ အဲ့ဒီ့work က အရမ်းကြီးတယ် ကျွန်တော်တစ်ယောက်တည်း မနိုင်ဘူး အဓိကလုပ်နိုင်တာကိုငှက်ဗျ ´ 😢
.. ... ... ... ... ... ... ... ... ... ... ... ... ...
`ရှင်သာရိပုတ္တရာ ရဲ့ အကြောင်းအချင်းရာများစွာထဲ မှ အချို့ ´
* အရှင်မြတ်သည် မြို့ထဲဆွမ်းခံထွက်ချိန် နောက်ကျလေ့ရှိ၏။
ကဲ့ရဲ့စကားတင်းဆိုကြသူများ
ကဲ့ရဲ့ခြင်းမှ လွတ်အောင်
ဇေတဝန်ကျောင်းရှိ အမှိုက်ရှိသောနေရာတို့ကို ရှင်းလင်းခြင်း။
တံမြက်လှည်းခြင်း ။
ရေနည်းနေသော
သောက်ရေအိုးတို့ကို ရေဖြည့်ခြင်း
ဂီလာန နာမကျန်းရဟန်းတို့ကို
ပြုစု ခြင်း လိုသောအရာတို့ကို
မေးမြန်းကူညီခြင်းတို့ ပြီး မှ
ဆွမ်းခံကြွတော်မူလေ့ရှိ၏
/ အဂ်လိပ်ခေတ် လယ်တီဆရာတော်ကြီးလည်း သန်းခေါင်ကျော် ကျောင်းတိုက်ရှိ သောက်သုံးရေ အိုးများကို ရေဖြည့်လေ့ရှိသည် ဟုလည်း ဖတ်ရှုဖူးပါသည်
* အခါတပါး ကိုယ်တော်၏ သက်န်းအစွန်း တွဲလျားကျလျက်ရှိရာ ၇ နှစ်သား ကိုရင်ငယ်လေးက` အရှင်ဘုရား အဝန်းညီစွာ
ဝတ်ရုံသင့်ပါသည် ´ ဟု ပြောသည်၌
ခပ်လှမ်းလှမ်း ၌ သက်န်းပြင်ဆင်ဝတ်ရုံပြီးမှ
" ဆရာ ဤမျှဖြင့် သင့်လျော်ပါပြီလော" ဟု ကိုရင်လေးကို ပင်လျင် ပြန်လည်လျောက်ထား၏
လက်ယာရံ ရဟန္တာကြီးဖြစ်သည့်တိုင်
ဆုံးမသြဝါဒကို လိုလားခံယူသူ ဖြစ်၏
* တခါသော် ဇေတဝန်ကျောင်း၌ သံဃာစာရင်းဖြင့် အိမ်များက ဆွမ်းကျွေးပင့်ကြရာ သူဆင်းရဲအမယ်အို ကျောင်းအရောက်နောက်ကျသဖြင့် သံဃာတစ်ပါးမှ မကျန်ဖြစ်နေရာ...
ရှင်သာရိပုတ္တရာ က သူ့သပိတ် ကို သူဆင်းရဲအမယ်အို
ထံပေး၍ ဆွမ်းအလှုကို လက်ခံ၏
ဘုရင် နှင့်တကွ သူကြွယ်များကသူဆင်းရဲအမယ်အို အရှင်မြတ်ကို ဆွမ်းကပ်ရာမပြည့်စုံမည်စိုး၍ အမယ်အိုကိုဝိုင်းလှုကြရာ အသပြာတစ်သိန်းရ၏
အရှင်မြတ် ဆွမ်းစားကြွရာတွင်မူ ထိုအမွန်အမြတ်များကို ဖယ်၍ သူဆင်းရဲအမယ်အို
ပြင်ဆင်ထားပြီးဖြစ်သော ယခင်အညံစားဆွမ်းကိုသာ ဘုဥ်းပေး၍ ဆင်းရဲသား တို့ကိုလည်း ချီးမြှောက်တော်မူ၏
* အနာထပိဏ် သူဌေးကြီး၏
နောက်ဆုံးအချိန် တွင် ရှင်သာရိပုတ္တရာ သည် ရှင်အာနန္ဒာ ကို
အပါခေါ် ဆောင် ကာ
သူဌေးကြီးထံသွား၍ တရားဟောပြောတော်မူ၏
" အိုသူကြွယ် ငါသည် မျက်စိ ကို မစွဲလမ်းအံ့...
ရူပါရုံ ကိုမစွဲလမ်းအံ့...
စက္ခုဝိညာဥ် ကို မစွဲလမ်းအံ့..
လောက ကိုမစွဲလမ်းအံ့... "
အစရှိသဖြင့် တရား ၉ ပိုဒ် ဟောပြရာ တရားအဆုံး၌ အနာထပိဏ် သူဌေးကြီးလည်း ဝမ်းနည်းဝမ်းသာ ဖြစ်၍ ငိုကြွေး၏
` ဘုရားအပါအဝင် ရဟန္တာ အရှင်မြတ်များ၏ တရားများစွာနာကြားဖူးပါလျက် ဤ တရားမျိုး ယခုမှ နာကြားရပါသည် ` ဆိူ၏
" လူပုဂ္ဂိုလ် တို့အား ဤတရားမျိူးဟောပြောရန် စိတ်ကူးမပေါက် ကြကုန်
ရှင်ရဟန်းတို့အားသာဤ တရားမျိုးဟောပြောရန်စိတ်ကူးပေါက်ကြပါသည် "
` အရှင်ဘုရား နောင် အဝတ်ဖြူနီညိုဝါ ဝတ်သောလူတို့အားလည်း ဤ တရားမျိူးဟောကြားပါ
ကိလေသာနည်းပါး ဉာဏ်မျက်စိရှိကြသော လူသားများလည်း တရားတော်သိတတ်နိုင်ကြပါလိမ့်မည် ဘုရား `ဟု
သူဌေးကြီးက လျောက်လေ၏... 🙏🙏🙏....
ရေးသားသူ ✍️ - ဘိုဘိုထွန်း တောင်ဥက္ကလာ............
Credit, & Ref.,
- ဦးအောင်မိုး ( ပါဠိပါရဂူ) ၏ `ဓမ္မသေနာပတိ အရှင်သာရိပုတ္တရာ` စာအုပ်
* စာအုပ်ကို ရက်ရှည်ငှားရမ်းပေးထားပါသော သူငယ်ချင်း ကိုသူရဇော် ကျေးဇူး အထူးပါ
- Post တွင် ဖော်ပြပါ ပန်းချီပုံ မှာ ပန်းချီဦးဗကြည် ၏ ရုပ်စုံဗုဒ္ဓဝင် စာအုပ် မှ
- ကိုမျိုး IR ၏ `၂၁ရာစု ဂီတကြယ်တာရာများ ´ စာအုပ်
- "ထူးအိမ်သင် အမှတ်တရ အစိမ်းရောင်ရက်စွဲများ" စာအုပ်.....
ဗုဒ်ဓံ သရဏံ ဂစ်ဆာမိ
ဓမ်မံ သရဏံ ဂစ်ဆာ မိ
သံဃံသရဏံ ဂစ်ဆာမိ
သရဏတ်တရံ အဟံ ပူဇမေိ
🙏🙏🙏
