17/07/2025
ZAWLBUK
Nidang lai in Paite khuate'n zawlbuk a na nei chiat uh a, hausapa inn kiang, kholai deuh a inndang sanga lianzaw leh tuam deuh a kibawl ahi.
Gal zohna, salmat leh vualtungtuanna a neih chiang un, tangvalnoute zawlbuk ah kikaikhawm in, thu leh la kikumkhawm zel uh a, nungak a hel ding uh bangleng hiai zawlbuk ah paikhawm in kihilh ua. A leenglatna ua kipan a paikik chiangun zawlbuk ah zan giakzel uhi.
Zawlbuk poimohna mahmah ahihleh, khosung a thu sia , la om hun in tangvalte kaihkhawm masak ngai seselou in, kingangtak in buaina mun bangmahlou kal in delhthei uhi. Huangvulh gantate gamsa te'n a lak chiang bang un, tangvalte'n delh in, huangvulh gantate va hun khia zel uhi.
Thukin, sihna leh buaina , theihkhollouh pua lam mite'n khua sung hong dou ualeh, zawlbuk a om tangval te'n kintak a delhin, douthukpah theizel uhi. Khua kiim a khuate kianga thu leh la gen ding om chiangin hausapu in zawlbuk a aom tangval nou chin a sakte khualtai dingin baihlamtak in tel zel.
Kisinsak munpi ding in kizang a, valnoute leh naupangte tel in siamzilna munpi khat ahi. Kibuan , taksa sawizoina kisinsakna munpi khat leng ahi. Zawlbuk ah khua dangmite chial in, kibuan kidemna zel uhi. Hiai a khodang mite a chial chiangun kitanauna leh kinaihsemna khat bangin ngai uhi.
Zawlbuk a heutu ding in Val upa tel ahi a, miteng in zahtak uhi. Gamtat kilawmlou nei kuahiam a om ualeh, a kituahpih bang gawtna piak hizel hi. British-te a hong lut un, zawlbuk a kivaipuakna leh etkoldan khotang ading in hoihsa mahmah uh a, khuata te ah sutzop sawm uhi. Himahleh, siamsinna hong kipan in, thu leh la kin kiam a, i hunlui ngeina dan kikhek ziak in sunzom zoulou uhi.
Nu leh pa te'n a tate uh zawlbuk a om sanga, inn a aom ua; laisim leh amaute panpih ding in deihzawta uhi. Mangngilh hetlouh ding a hoih tuh - zawlbuk a khotang vai kisinsaknate tulai a kisinsakna sangin hoihzaw hi.
Follow the Paite Heritage channel on WhatsApp:
https://whatsapp.com/channel/0029VapyzyPId7nSoB3woc1r
