26/03/2026
Probinsya ng Cotabato, tatanggap ng P150M farm-to-market road sa ilalim ng PAMANA program ng OPAPRU
CENTRAL MINDANAO-Tatlong farm-to-market (FMR) road ang natanggap ng pamahalaang panlalawigan ng Cotabato mula sa Office of the Presidential Adviser on Peace, Reconciliation and Unity (OPAPRU), matapos pormal na isagawa ang Ceremonial Signing of the Memorandum of Agreement ( MOA ) para sa PAyapa at MAsaganang PAmayaNAn (PAMANA) program na ginanap sa Foro de Intramuros, Manila City.
Sakop ng naturang MOA ang implementasyon at monitoring ng tig-P50M halaga ng PAMANA Farm-to-Market (FMR) Road Project, kung saan kabilang sa mabibigyan ang lalawigan ng Cotabato na kinabibilangan ng;
- Construction of RCDG, Brgy. Aringay, Kabacan, Cotabato.
- Concreting of Road, Sitio Ranzo, Brgy. Wadya, Banisilan, Cotabato.
- Concreting of Road, Sitio Mainline, Brgy. Liliongan, Carmen, Cotabato.
Ang PAMANA program ay inisyatibo ng OPAPRU na sumusuporta sa Comprehensive Peace Process ng bansa sa layuning makamit ang pangmatagalang kapayapaan.
Bilang isa sa mga benepisyaryo ng naturang programa, labis naman ang pasasalamat ni Governor Emmylou "Lala" J. Taliño-Mendoza sa pamahalaang nasyonal na pinamumunuan ni Pangulong Ferdinand R. Marcos Jr. at kay OPAPRU Secretary Carlito G. Galvez na aniya'y higit na makakatulong sa mga mamamayan sa mga nasabing lugar upang mas madaling maiparating ang kanilang mga produkto sa mga merkado, magdulot ng karagdagang kita at makakatulong sa tuloy-tuloy na pag-unlad ng buong lalawigan ng Cotabato.
Nasa naturang MOA signing din si Senator Loren Legarda na dinaluhan naman ni Vice Governor Rochella Marie "Ella" Taliño Taray bilang kinatawan ni Governor Taliño-Mendoza kasama sina Boardmember Sittie Eljorie C. Antao-Balisi, League of the Municipalities (LMP) Cotabato Chapter President at Kabacan Municipal Mayor Evangeline P. Guzman, Kabacan Vice Mayor Herlo Guzman Jr., Ebrahim Unayan, at si John Michael G. Ojano ng Office of the 3rd District Representative Ma. Alana Samantha T. Santos.(Garry Fuerzas with IDCD-PGO-NCOT-March 27,2026)
