Actibo, P. del Rosario Street (2025)

05/09/2025

𝐍𝐄𝐖𝐒 | 𝐀𝐂𝐓𝐈𝐁𝐎 𝐡𝐨𝐥𝐝𝐬 𝐒𝐜𝐡𝐨𝐨𝐥-𝐁𝐚𝐬𝐞𝐝 𝐑𝐚𝐝𝐢𝐨 𝐁𝐫𝐨𝐚𝐝𝐜𝐚𝐬𝐭𝐢𝐧𝐠 𝐒𝐢𝐦𝐮𝐥𝐚𝐭𝐢𝐨𝐧; 𝐓𝐞𝐚𝐦 𝟏𝟐 𝐚𝐧𝐝 𝐓𝐞𝐚𝐦 𝟖 𝐭𝐨𝐩 𝐄𝐧𝐠𝐥𝐢𝐬𝐡 𝐚𝐧𝐝 𝐅𝐢𝐥𝐢𝐩𝐢𝐧𝐨 𝐜𝐚𝐭𝐞𝐠𝐨𝐫𝐢𝐞𝐬

ACTIBO had finally initiated the School-Based Radio Broadcasting Simulation today, with nine teams participating in both Filipino and English categories at ACT’s Computer Laboratory.

With each team showcasing their talents through the use of their voices, adjusting and conveying emotions with different pitch and rhythm, their desire to inform the masses was reflected in their infomercials, entertainments, and scripts for news and sports.

The award for Best in Overall Radio Production in the English category was proudly given to Team 12, followed by Team 10 in second place and Team 8 in third, demonstrating exceptional skill in storytelling and performing.

Meanwhile, in the Filipino Category, Team 8 took home the top honor for their outstanding presentation and creativity, followed by Team 7 earning second place, and Team 2 securing third, all showcasing impressive talent and dedication.

The announcement of individual and other group awards will be done next week. The top-performing participants will also officially be part of ACTIBO.

Words by: 𝑱𝒆𝒘𝒊𝒆𝒍 𝑨𝒇𝒓𝒊𝒄𝒂
Photos by: 𝑪𝒍𝒚𝒅𝒆 𝑳𝒂𝒖𝒓𝒆𝒏𝒛 𝑳𝒂𝒓𝒈𝒐
Edited by: 𝑱𝒆𝒔𝒔𝒊𝒄𝒂 𝒀𝒆𝒄𝒚𝒆𝒄

31/08/2025

𝐒𝐄𝐑𝐘𝐄𝐍𝐆 𝐏𝐀𝐍𝐈𝐓𝐈𝐊 | 𝑷𝒂𝒔𝒂𝒏 𝒏𝒈 𝑩𝒂𝒔𝒂𝒏𝒈 𝑺𝒂𝒑𝒂𝒕𝒐𝒔

Basa ang tela, mabigat ang hakbang,
Saksi sa putik, naglalakbay sa ulan.
Tahimik na sumasabay sa laban,
Bitbit ang pangarap, kahit nahihirapan.

Sa bawat lapat ng basang yapak,
Sumasabay ang himig ng pag-aaral.
Hindi ito ingay, kundi alaala,
Na ang landas ng pangarap ay mahaba—ngunit may pag-asa.

Ang bawat hakbang ng basang sapatos
Ay kuwento ng pusong pursigidong umaasa.
Na sa bawat pag-uwi sa dulo ng araw,
Doon humihinga ang tunay na tagumpay.

Panulat: 𝑳𝒐𝒗𝒆𝒍𝒚 𝑴𝒂𝒓𝒊𝒆𝒍𝒍𝒆 𝑩𝒂𝒓𝒓𝒊𝒈𝒂
Ilustrasyon: 𝑪𝒍𝒚𝒅𝒆 𝑳𝒂𝒖𝒓𝒆𝒏𝒛 𝑳𝒂𝒓𝒈𝒐 at 𝑱𝒆𝒔𝒔𝒊𝒄𝒂 𝒀𝒆𝒄𝒚𝒆𝒄

31/08/2025

𝐒𝐄𝐑𝐘𝐄𝐍𝐆 𝐏𝐀𝐍𝐈𝐓𝐈𝐊 | 𝑻𝒓𝒂𝒇𝒇𝒊𝒄 𝑳𝒊𝒇𝒆: 𝑷𝒂𝒔𝒆𝒏𝒔𝒚𝒂 𝒐 𝑫𝒊𝒔𝒕𝒂𝒏𝒔𝒚𝒂?

Bawat patak ng segundo,
kasabay ng pag-ubos ng pasensya ko.
Naka-upo sa tabing-dulo,
Uusad pa ba ito?

Ngunit sa gitna ng ingay at usok, ako’y nakapagtanto:
Ako’y nakalimot na iisa lamang ang ikot ng mundo.
Na iilan ang nauuna sa kanilang paroroonan,
at may nahuhuli sa sariling pupuntahan.

Takdang oras na habulan?
Pagsubok lamang ’yan!
Kung alam ang nais,
ito’y hinding-hindi masusukat sa pasensya’t distansya lang.

Panulat: 𝑭𝒂𝒊𝒕𝒉 𝑲𝒆𝒍𝒔𝒆𝒚 𝑸𝒖𝒊𝒏𝒏 𝑨𝒍𝒃𝒂𝒏𝒐
Ilustrasyon: 𝑪𝒍𝒚𝒅𝒆 𝑳𝒂𝒖𝒓𝒆𝒏𝒛 𝑳𝒂𝒓𝒈𝒐 at 𝑱𝒆𝒔𝒔𝒊𝒄𝒂 𝒀𝒆𝒄𝒚𝒆𝒄

31/08/2025

𝐒𝐄𝐑𝐘𝐄𝐍𝐆 𝐏𝐀𝐍𝐈𝐓𝐈𝐊 | 𝑹𝑹𝑳: 𝑹𝒂𝒏𝒂𝒔 𝒏𝒈 𝑹𝒖𝒎𝒂𝒓𝒂𝒈𝒂𝒔𝒂𝒏𝒈 𝑳𝒊𝒕𝒆𝒓𝒂𝒕𝒖𝒓𝒂

Luha'y namumuo, isipang kay gulo.
Nakatali sa upuan, tagapaghusay ay nasa harapan.
Ano ito? Isang bangungot?
Tinig na sumasanik mula sa dilim,
"Tatlumpung literatura ng inyong pananaliksik, nais kong maangkin."

Tingin dito, tingin doon,
Isang prosesong wari'y ikay kinukulong.
Mga mata'y namumula at nakatirik,
Isipa'y pinupuga at pusong may tinik.
Tanong na maaari bang makawala, galing sa bigat at pangamba na nais ibaliwala.

Alapaap ng pananaliksik na nais abutin,
Puro at dugo muna ang haharapin.
May paksa na ako, ngunit tila kulang pa,
Anong kayamanang higit pang mahuhugot sa akda?

Pahina ng bawat libro'y nabasa at silid-aklatang bukas-sira,
Sa aming sinisiyasat ay hindi kasalinlasa.
Ngunit sa patuloy na pag-usbong ng teknolohiya,
Proseso'y napadali at ngayo'y kaagapay na ng masa.

Kamay nitong kumakapit,
Impluwensiyang hindi tugma ang nang-aakit.
Maraming rumaragasang literatura,
Isang pindot ay pinapakain ka na ng hinuha.

Totoo ngang hindi mawawala ang mga problema,
Gayunpaman, hindi kukupas ang ningning ng mga mata.
Tilas ng isip at damdaming nakasindi,
Ito'y sandata para sa kinabukasang siyang susi.

Bilang mag-aaral, magsunog ng kilay at determinasyon ay ipanday,
Dahil sa kamay ng ating henerasyon,
karunungan ay unti-unti nating iaahon.
Huwag mawalan ng pag-asa,
Maliwanag na pundasyon ng edukasyon ang tunay na gantimpala.

Panulat: 𝗝𝗮𝘇𝗲𝗹 𝗝𝗮𝗻 𝗠𝗶𝗴𝘂𝗹𝗹𝗮𝘀
Ilustrasyon: 𝑪𝒍𝒚𝒅𝒆 𝑳𝒂𝒖𝒓𝒆𝒏𝒛 𝑳𝒂𝒓𝒈𝒐 at 𝑱𝒆𝒔𝒔𝒊𝒄𝒂 𝒀𝒆𝒄𝒚𝒆𝒄

30/08/2025

𝐒𝐄𝐑𝐘𝐄𝐍𝐆 𝐏𝐀𝐍𝐈𝐓𝐈𝐊 | 𝑺𝒊𝒍𝒊𝒅-𝑺𝒖𝒍𝒚𝒂𝒑𝒂𝒏: 𝑫𝒂𝒎𝒅𝒂𝒎𝒊𝒏𝒈 𝑵𝒂𝒌𝒂𝒌𝒖𝒃𝒍𝒊, 𝑵𝒂𝒘𝒂’𝒚 𝑴𝒂𝒂𝒓𝒊

Gumigising ng umaga para pumunta sa eskwela,
Upang masilayan ang ngiti mong kay ganda.
Isang lihim na pagtingin na hindi ko masabi-sabi,
“Gusto kita,” dalawang salitang hindi mapakali.

Sa tuwing may resitasyon, ikaw ay nakaisa,
Tinig mong kay linaw na parang musika.
Sa klase ay hindi makapokus, sa’yo nakatingin,
Nagbabakasakaling ako ay tingnan mo rin.

Napapasaya mo ako sa pagiging ikaw,
Sa’yong kadaldalan na parang sumisigaw,
Sa’yong kakulitan na napakabibo,
At sa’yong mga hindi ko maintindihan na biro.

Kung araw ay lumipas at tayo’y magtagpo,
Na ‘di na kailangan itago ang totoo,
Aaminin ko na may lihim na pagtingin,
“Crush kita,” ito ang aking sasabihin.

Panulat: 𝑭𝒓𝒂𝒏𝒄𝒉𝒆𝒔𝒌𝒐 𝑹𝒐𝒚 𝒀𝒍𝒂𝒚𝒂
Ilustrasyon: 𝑪𝒍𝒚𝒅𝒆 𝑳𝒂𝒖𝒓𝒆𝒏𝒛 𝑳𝒂𝒓𝒈𝒐 at 𝑱𝒆𝒔𝒔𝒊𝒄𝒂 𝒀𝒆𝒄𝒚𝒆𝒄

29/08/2025

𝐏𝐀𝐍𝐎𝐎𝐑𝐈𝐍 | 𝑰𝒔𝒂𝒏𝒈 𝑩𝒂𝒏𝒔𝒂, 𝑰𝒔𝒂𝒏𝒈 𝑫𝒊𝒘𝒂, 𝑰𝒔𝒂𝒏𝒈 𝑾𝒊𝒌𝒂

Ang ACTIBO ay nakikiisa sa pagdiriwang ng Buwan ng Wika 2025 na may temang “𝑨𝒏𝒈 𝑷𝒂𝒈𝒍𝒊𝒏𝒂𝒏𝒈 𝒏𝒈 𝑭𝒊𝒍𝒊𝒑𝒊𝒏𝒐 𝒂𝒕 𝑲𝒂𝒕𝒖𝒕𝒖𝒃𝒐𝒏𝒈 𝑾𝒊𝒌𝒂: 𝑴𝒂𝒌𝒂𝒔𝒂𝒚𝒔𝒂𝒚𝒂𝒏 𝒔𝒂 𝑷𝒂𝒈𝒌𝒂𝒌𝒂𝒊𝒔𝒂 𝒏𝒈 𝑩𝒂𝒏𝒔𝒂.”

Sa bidyong ito, aming ipinapahayag ang kahalagahan ng wika bilang salamin ng ating kultura, ugat ng ating pagkakakilanlan, at haligi ng pambansang pagkakaisa.

𝑴𝒂𝒍𝒊𝒈𝒂𝒚𝒂𝒏𝒈 𝑩𝒖𝒘𝒂𝒏 𝒏𝒈 𝑾𝒊𝒌𝒂 2025!

Direktor: 𝑴𝒂𝒓𝒚 𝑨𝒏𝒏 𝑹𝒖𝒊𝒛
Artista ng Tinig: 𝑸𝒖𝒊𝒏𝒕𝒊𝒏 𝑶𝒓𝒍𝒆𝒕𝒖𝒆𝒍𝒆 𝑬𝒏𝒓𝒊𝒒𝒖𝒆𝒛
Editor ng Bidyo: 𝑱𝒆𝒔𝒔𝒊𝒄𝒂 𝒀𝒆𝒄𝒚𝒆𝒄

29/08/2025

𝐊𝐎𝐋𝐔𝐌 | 𝑻𝒊𝒎𝒑𝒍𝒂 𝒏𝒈 𝑲𝒂𝒃𝒂𝒕𝒂𝒂𝒏, 𝑳𝒂𝒔𝒂 𝒏𝒈 𝑾𝒊𝒌𝒂

Kung may paboritong wika ang kabataan ngayon, malamang hindi Filipino o Ingles—kundi Taglish. Parang kape na may dalawang lasa: matapang na barako at imported beans na may kakaibang aroma. Swak sa panlasa ng kabataan, mabilis timplahin, madaling higupin. Ngunit gaya ng kape, ito ba’y dagdag-lakas sa ating wika, o unti-unting kumakaltas sa linamnam ng sariling timpla?

Sa klase, hindi na bago ang eksena ng estudyanteng sasagot ng, “Ma’am, I think po the answer is photosynthesis kasi…”—ang natural na paglipat mula Ingles patungong Filipino. Sa mga proyekto, Taglish ang nagiging lihim na sandata ng mga estudyante: mabilis at praktikal sa brainstorming, diretso ang daloy ng ideya, at iwas-komplikado sa pagpapaliwanag. Sa barkadahan naman, Taglish ang opisyal na wika ng tawanan, hiritan, at kwentuhan—isang natatanging “code” na agad na nauunawaan ng bawat kaibigan. Parang kape, nagbibigay sigla at kasayahan, ngunit puwede ring magpabawas sa tunay na lasa ng sariling wika kapag nasobrahan.

Ayon kay Jeneleigh, isang estudyante: “Mas mabilis kaming mag-brainstorm sa group projects kapag Taglish ang usapan. Mas malinaw ang ideya at mas natural ang daloy ng komunikasyon.” Sa mga klase na Ingles ang gamit na teksto, nagiging tulay ang Taglish upang mas maintindihan ang aralin at maging mas aktibo ang talakayan. Sa barkadahan, nagdudulot ito ng ginhawa at pagiging totoo sa pakikipag-usap—isang paraan upang mas bukas at mas komportable ang komunikasyon. Para sa maraming estudyante, patunay ito ng kanilang pagiging malikhain sa paggamit ng wika.

Ngunit may kaakibat din itong panganib. Ayon kay Shane: “Minsan, nahihirapan akong magsalita ng purong Filipino kapag required sa klase. Sanay na kaming magsalita ng halo ng English at Filipino, kaya automatic na lumalabas ang Taglish.” Kapag labis ang paggamit nito, nagiging hamon sa kabataan ang magsalita o magsulat ng purong Filipino sa pormal na usapan. Unti-unting natatabunan ang kagandahan at lalim ng sariling wika, pati ang mayamang bokabularyo. Mas nagiging komportable ang kabataan sa Ingles kaysa sa Filipino—na maaaring humantong sa unti-unting paglayo sa kultura at pagkakakilanlan.

Sa bawat salitang binibigkas, dala ng Taglish ang ginhawa ng ngayon at ang pangamba ng bukas. Parang kape, maaari itong magbigay ng lakas at sigla sa komunikasyon at pag-unawa. Ngunit kung hindi maingat ang timpla, unti-unting mababawasan ang lalim at linamnam ng sariling wika. Nasa atin ang kapangyarihan kung paano ito sisipsipin—bilang dagdag-lasa na nagpapayaman sa kultura, o bilang pait na unti-unting nag-aalis ng ating identidad.

Sa huli, ang Taglish ay paalala na ang wika ay puso ng ating pagkatao: maaari itong magpatibay o magpahina, depende sa ating pangangalaga

Panulat: 𝑪𝒂𝒕𝒉𝒆𝒓𝒊𝒏𝒆 𝑷𝒂𝒋𝒖𝒏𝒂𝒓
Kartung Editoryal: 𝑪𝒉𝒓𝒊𝒔𝒕𝒊𝒂𝒏 𝑻𝒖𝒎𝒂𝒎𝒂𝒌

28/08/2025

𝐏𝐀𝐍𝐎𝐎𝐑𝐈𝐍 | 𝑷𝒂𝒂𝒏𝒚𝒂𝒚𝒂 𝒔𝒂 𝑲𝒖𝒍𝒎𝒊𝒏𝒂𝒔𝒚𝒐𝒏 𝒏𝒈 𝑩𝒖𝒘𝒂𝒏 𝒏𝒈 𝑾𝒊𝒌𝒂!

Mga Asianista, sama-sama nating ipagdiwang ang ganda ng ating wika at kultura! Inaanyayahan kayo na maging bahagi ng makulay na pagdiriwang ng Buwan ng Wika ngayong Agosto 29, 2025.

Huwag palampasin, sapagkat dito, bawat salita ay kwento, at bawat kwento ay buhay!

Direktor: 𝑴𝒂𝒓𝒚 𝑨𝒏𝒏 𝑹𝒖𝒊𝒛
Editor ng Bidyo: 𝑪𝒍𝒚𝒅𝒆 𝑳𝒂𝒖𝒓𝒆𝒏𝒛 𝑳𝒂𝒓𝒈𝒐

27/08/2025

𝐒𝐄𝐑𝐘𝐄𝐍𝐆 𝐏𝐀𝐍𝐈𝐓𝐈𝐊 | 𝑴𝒈𝒂 𝑺𝒂𝒈𝒐𝒕 𝒏𝒂 𝑾𝒂𝒍𝒂 𝒔𝒂 𝑷𝒊𝒔𝒂𝒓𝒂

Sa bawat pisara ng silid-aralan,
nakaukit ang tanong na walang hanggan,
X na nawawala, Y na di mahagilap sa solusyon,
parang puso’t pangarap na laging may kondisyon.

Sa simula, akala ko madali lang,
parang numero’t titik na kayang sukatin ang hirap at sayang.
Ngunit nang dumating ang X at Y sa gitna ng landas,
doon ko nalamang may suliraning hindi agad malalagpas.

Parang lihim ng mundo na pilit ikinukubli,
mga tanong na walang sagot, sa puso’y bumubuli.
Gaano ba kahirap tuklasin ang nawawalang halaga,
kung minsan, sagot ay di nakikita kahit anong tyaga.

X—sakto ba ang aking sagot?
Y—paano kung may kinulang?
Suliraning sa isip ko’y ikot nang ikot,
sa papel na kay dami ng patlang.

Marahil kaya mahirap hanapin ang X at Y,
hindi para intindihin, kundi upang itaglay,
na sa bawat suliranin ng ating buhay,
hindi lahat ng nawala ay dapat matagpuan ng tunay.

Panulat: 𝑴𝒂𝒓𝒌 𝑹𝒆𝒚 𝑪𝒂𝒃𝒂ñ𝒐𝒈
Ilustrasyon: 𝑪𝒍𝒚𝒅𝒆 𝑳𝒂𝒖𝒓𝒆𝒏𝒛 𝑳𝒂𝒓𝒈𝒐 at 𝑱𝒆𝒔𝒔𝒊𝒄𝒂 𝒀𝒆𝒄𝒚𝒆𝒄

26/08/2025

𝐋𝐀𝐓𝐇𝐀𝐋𝐀𝐈𝐍 | 𝑩𝒖𝒉𝒂𝒚 𝒏𝒂 𝒎𝒈𝒂 𝑮𝒂𝒍𝒂𝒎𝒂𝒚

Umislab.
Uminog.
Umapang.

Mga galamay na pilit na nangingisay, kahit ang pugitang kanilang kinabibilangan ay humimlay na, kitil ang buhay—buhay na nagsisilbing alaala ng isang digmaan, ng mga sakripisyo na patuloy na humuhugis sa ating kasaysayan.

Ngunit sa kabila ng pagkamatay ng katawan, ang diwa ng kanilang laban ay patuloy na dumadaloy sa atin. Puso, dugo, at hininga ang inialay ng ating mga bayani—mga bayani na matagal nang pumanaw. Huwag nating hayaang maglaho ang kanilang mga pamanang iniwan para sa atin, at huwag nating itago sa dilim ng libingan ang inaasam nilang kinabukasang matagal na nilang natatanaw.

Sa kasalukuyang panahon, kung saan ang ating sariling wika ay tila napag-iiwanan—kasabay sa agos ng iba’t ibang mga banyagang wika—tila ito’y napapabayaan. Umusbong, lumago ang mga panibagong teknolohiya. Sa bawat salinlahi, ang wika ng ating mga bayani ay unti-unting nawawala. Ngunit ang Filipino ay di lamang isang wika; ito’y susi sa ating kultura, ating alaala, at ating pagkakakilanlan. Sa bawat pangarap, sa bawat sakripisyo ng ating mga bayani, ang wika ay sumasalamin sa kanilang digmaan para sa kalayaan at katarungan.

Tulad ng ating mga bayani, tayong mga kabataang Asianista—bilang tunay na anak ng bayan—ay may pananagutang itaguyod at ipagpatuloy ang mga pangarap na kanilang sinimulan. Sa bawat salitang Filipino, nawa’y ating damhin ang bawat hakbang ng kanilang pakikibaka—bawat pawis, luha, at tagumpay na humubog sa ating kasarinlan. Huwag nating hayaang mapawi sa hangin ang ating wika; bagkus, itanghal natin ito bilang buhay na patunay ng ating pagkakakilanlan. Gamitin natin ito sa araw-araw—sa tahanan, sa paaralan, sa puso’t diwa—dahil sa bawat salitang binibigkas natin, muling nabubuhay ang ating lahi at kultura.

Pangalagaan natin ang wikang puso ng ating pagkatao sa pamamagitan ng masigasig na pagbasa ng mga akdang Filipino, kahit na sa pagdiriwang ng diwang makabayan sa muling paglalantad ng mga kuwentong humubog sa ating kasaysayan—mga salaysay ng bayani’t bayan na hindi dapat mabaon sa limot. Sa gitna ng makabagong daluyong ng teknolohiya, gawin nating tulay ang social media upang ang wikang Filipino ay manatiling buhay at umalimbukay sa bawat usapan—mula sa pinakamalalalim na damdamin hanggang sa pinakapayak na araw-araw na palitan.

Nawa’y sa paglipas ng panahon, tangan pa rin natin ang pamana ng ating mga bayaning hanggang sa huli ay pinaglaban ang yamang atin. Tayong mga Kabataang Asianista ay magsilbi sanang mga galamay na, kahit sa kabila ng pagkahimlay ng ating mga namayapang bayani, ay huwag nating hayaang maglaho ang pangarap nilang isang malaya at makatarungang Pilipinas. Ipagpatuloy at itaguyod natin, sa landas ng kanilang pag-aalay ng buhay, ang Pilipinas na sa kanilang puso’y tanging pag-asa at pangarap ay buhay.

“Sa simula pa’y minahal ko na ang aking kaawa-awang bayan, at natitiyak kong mamahalin ko siya hanggang kamatayan…”
—Jose Rizal

Panulat: 𝑳𝒐𝒗𝒆𝒍𝒚 𝑴𝒂𝒓𝒊𝒆𝒍𝒍𝒆 𝑩𝒂𝒓𝒓𝒊𝒈𝒂
Ilustrasyon: 𝑴𝒉𝒆𝒈𝒂𝒏 𝑶𝒓𝒕𝒆𝒈𝒂

25/08/2025

𝐒𝐄𝐑𝐘𝐄𝐍𝐆 𝐏𝐀𝐍𝐈𝐓𝐈𝐊 | 𝑳𝒂𝒓𝒐’𝒕 𝑳𝒂𝒃𝒂𝒏: 𝑫𝒊𝒈𝒎𝒂𝒂𝒏𝒈 ’𝑫𝒊 𝑲𝒂𝒚𝒂𝒏𝒈 𝑻𝒂𝒍𝒊𝒌𝒖𝒓𝒂𝒏 𝒔𝒂 𝑴𝑳

Ang mga mukha’y repleksiyon ng kalagayan,
Sa larong nakasalalay sa bawat kamay.
Di mawari ang emosyong nararamdaman,
Walang puwang ang pagkatalo pagdating sa labanan.

Ngunit bakit pasensya ang laging sinusubok sa digmaan,
Habang ang kalaban ay singliksi ng tigre sa sagupaan?
Kasama nama’y pasanín, singlambot ng tinapay kung apakan,
Telepono’y tila pagong sa kabagalan, inis sa resulta’y di malaman.

Ngunit sa kabila nito’y kasiyahang dulot ng pagkapanalo ang nakamtan,
Parang nasungkit sa mga kamay ang talang inaasam.
Ito ang dahilan kung bakit ’di kayang talikuran,
Laging nadadala sa panandaliang silakbo ng kawagihan.

Panulat: 𝑱𝒆𝒂𝒉 𝑴𝒂𝒆 𝑩𝒂𝒓𝒓𝒊𝒅𝒂
Ilustrasyon: 𝑪𝒍𝒚𝒅𝒆 𝑳𝒂𝒖𝒓𝒆𝒏𝒛 𝑳𝒂𝒓𝒈𝒐 at 𝑱𝒆𝒔𝒔𝒊𝒄𝒂 𝒀𝒆𝒄𝒚𝒆𝒄

24/08/2025

𝐒𝐄𝐑𝐘𝐄𝐍𝐆 𝐏𝐀𝐍𝐈𝐓𝐈𝐊 | 𝑨𝑰𝒎𝒂𝒉𝒊𝒏𝒂𝒔𝒚𝒐𝒏𝒈 𝑯𝒖𝒘𝒂𝒅: 𝑫𝒊𝒘𝒂𝒏𝒈 𝒎𝒂𝒈𝒊𝒕𝒊𝒏𝒈, 𝒌𝒂𝒏𝒊𝒏𝒐 𝒏𝒂𝒏𝒈𝒈𝒂𝒈𝒂𝒍𝒊𝒏𝒈?

Sa paglago ng aral-agham, kasabay ang pagsubok ng mga panayam.
Nagtatanong, nangungumbinsi, pilit na umaalam.
Sa sinulid ng isip, ginto ang imahinasyon,
Parang banaag ng hapon, daluyong ng sariling rason,
Malikhain, lohikal, at may hamon.

At sa malakuwadernong mobil, naroon ang algoritmo,
Tuso’t tiyak, kombinyente’t makabago.
Isang pindot lamang ni Maria, proyekto’y tapos na,
Ngunit kinapos sa imahinasyon, mga imaheng kulang sa aksyon.
Bawat galaw ay kalkulado, damdami’y hugis bato,
Lahat ay mabilis, maliksi,
Karunungang de-kodigo.

Kapwa silang haligi ng bagong panahon,
Isang puso’t isipan, isang mekanikong ebolusyon.
Hindi arbitraryo, parehong gawa ng tao.
Sa balintataw ng karunungan, hindi ipinapangakong magiting,
Ito ay nililikha.
Kung magsasanib sa halip na magbanggaan,
Bukas ay mundong mas maliwanag ang tatahakan.

Panulat: 𝑨𝒑𝒑𝒍𝒆 𝑭𝒂𝒊𝒕𝒉 𝑶𝒎𝒐𝒍𝒐𝒏
Ilustrasyon: 𝑪𝒍𝒚𝒅𝒆 𝑳𝒂𝒖𝒓𝒆𝒏𝒛 𝑳𝒂𝒓𝒈𝒐 at 𝑱𝒆𝒔𝒔𝒊𝒄𝒂 𝒀𝒆𝒄𝒚𝒆𝒄

Actibo

05/09/2025

31/08/2025

31/08/2025

31/08/2025

30/08/2025

29/08/2025

29/08/2025

28/08/2025

27/08/2025

26/08/2025

25/08/2025

24/08/2025

Address

Website

Alerts

Contact The Business

Shortcuts

Share

Our Story