12/03/2026
ఆకృతి అకృత్యాలకు అడ్డుకట్ట పడేనా...?
* అన్యాక్రాంతానికి గురవుతున్న శిఖం భూములు
* కబ్జా కొరల్లో రేల కుంట శిఖం భూములు
* అనుమతులు ఒకచోట, నిర్మాణాలు మరోచోట
* జి ప్లస్ ఐదు అంతస్తుల నిర్మాణాలతో రెచ్చిపోతున్న బిల్డర్లు
* సర్వేనెంబర్ 71, 44 లలో నిర్మాణాలపై చర్యలకు వినతి
బొల్లారం / సంగారెడ్డి: బొల్లారం మున్సిపాలిటీ పరిధిలో శిఖం భూములను మాయం చేస్తూ రియల్ ఎస్టేట్ ముసుగులో పెద్ద ఎత్తున బిల్డర్లు బహుళ జాతి నిర్మాణాలు చేపడుతూ ప్రభుత్వ ఆదాయానికి భారీగా గండి కొడుతున్నారని జిల్లా ఐఎన్టీయూసీ ఉపాధ్యక్షుడు, ఆత్మ కమిటీ డైరెక్టర్ పి.లక్ష్మారెడ్డి అన్నారు. ఈ మేరకు సోమవారం జిల్లా కలెక్టరేట్ కార్యాలయంలో నిర్వహించిన ప్రజావాణి కార్యక్రమంలో రేలకుంట చెరువు శిఖం భూములను కబ్జా చేస్తూ నిర్మిస్తున్న బహుళ జాతి నిర్మాణాలను చేపడుతున్న బిల్డర్లపై చర్యలు తీసుకోవాలని అడిషనల్ కలెక్టర్ చంద్రశేఖర్ కు ఫిర్యాదు చేశారు. బొల్లారం మున్సిపాలిటీ పరిధిలోని సర్వే సంఖ్య 71లోనీ రేల కుంట శిఖం భూములు నానాటికి అన్యాక్రాంతానికి గురవుతున్నాయని వాపోయారు. కబ్జాకు గురైన శిఖం భూములలో బిల్డర్లు జి ప్లస్ ఫైవ్ స్థాయిలో భారీ భవనాలను నిర్మిస్తున్నారని అన్నారు. అదేవిధంగా ప్రభుత్వ హుడా భూమి సర్వే సంఖ్య 44లోనీ హుడా స్థలాల్లో 600 గజాలు, 795 గజాలు చొప్పున జీవో సంఖ్య 59 కింద క్రమబద్ధీకరణ చేశారు. ఈ వ్యవహారంలో కొంత భాగం మేడ్చల్ మల్కాజిగిరి జిల్లాలోని మల్లంపేట సర్వేనెంబర్ 209లో హూడా అనుమతులు పొంది, వాటి ముసుగులో బొల్లారం మున్సిపాలిటీ పరిధికి సంబంధించి జి ప్లస్ ఫైవ్ బహుళ జాతి నిర్మాణాలను చేపడుతూ మున్సిపాలిటీ ఆదాయానికి భారీగా గండి కొడుతున్నారు. నిర్మాణాలకు సంబంధించి హెచ్ఎండిఏ నామ్స్ ప్రకారం నిర్మాణాలను చేపట్టకుండా ఇష్టానుసారంగా నిర్మిస్తూ అమాయకులకు విక్రయిస్తున్నారని తెలిపారు. ఈ వ్యవహారంపై రెవెన్యూ, మున్సిపల్, ఇరిగేషన్ శాఖల అధికారులు సమగ్ర విచారణ జరిపి ప్రభుత్వ శిఖం భూములను కాపాడాలని, 59 జివొ ముసుగులో బిల్డర్లు వ్యాపారం చేస్తున్నారని 59 జీవో నిరుపేదల కోసం గత ప్రభుత్వం ప్రవేశపెట్టిందని నిజమైన నిరుపేదలకు 59 జిఓ కింద ప్రభుత్వానికి డిడి ల రూపంలో ప్రభుత్వానికి చాలామంది చెల్లించారని నిజమైన పేదవాళ్లకు రిజిస్ట్రేషన్లు అవ్వలేదని గరీబోళ్ల 59 జీవో శ్రీమంతులకు ఓ వరంలా మారిందని ప్రభుత్వం 59 జీవో దర్యాప్తు చేయాలని బాధ్యులైన వారిపై కఠిన చర్యలు తీసుకోవాలని ఉన్నతాధికారులను విజ్ఞప్తి చేశారు.
