06/06/2026
මේ දවස්වල දැක්ක හුඟක් 𝐩𝐨𝐬𝐭 වලට සහ දැක්ක 𝐜𝐨𝐦𝐦𝐞𝐧𝐭𝐬 වලට ලියමි .
1. මුස්ලිම් විවාහ නීතියේ අවුරුදු 12 අවම වයස් සීමාව ගැන ඇත්ත කතාව:
පළමුවෙන්ම කිව යුතු දෙයක් තිබෙනවා. ලංකාවේ මුස්ලිම් විවාහ හා දික්කසාද පනත (MMDA - Muslim Marriage and Divorce Act) යනු අද ඊයේ හැදුණු එකක් නෙවෙයි. මෙය 1951 වසරේදී එවකට ලංකා පාර්ලිමේන්තුව විසින් සම්මත කළ නීතියක් (ඊට පෙර බ්රිතාන්ය යුගයේ 1806 හඳුන්වා දුන් නීති මත පදනම් වූවක්). මේ නීතිය හැදුවේ මුස්ලිම් අපි නෙවෙයි.
අපේ රටේ ඉතිහාසය පුරාවට කවදාවත් මුස්ලිම් ජනාධිපතිවරයෙක් ඉඳලා නැහැ. ඒ වගේම පාර්ලිමේන්තුව තුළ මුස්ලිම් ප්රජාවට තුනෙන් දෙකක බලයක් කවදාවත් තිබිලත් නැහැ අපිට ඕනෑ විදිහට නීති හදාගන්න හෝ වෙනස් කරගන්න. දැන් ඉන්න රජයට පාර්ලිමේන්තුවේ මන්ත්රී ආසන 159ක අතිවිශාල බලයක් තිබෙනවා. මේ නීතිය සංශෝධනය කරනවා නම්, ඒක ඔවුන්ට ඉතාමත් සරල වැඩක්.
ඒ නිසා මේ සම්බන්ධයෙන් මුස්ලිම් ප්රජාවට දොස් කියන එකේ තේරුමක් නැහැ. අපේ ප්රජාව පලි කරගෙන සමාජ මාධ්යවල වෛරය වපුරනවට වඩා, ඔබ ඇත්තටම වෙනසක් බලාපොරොත්තු වෙනවා නම් රජයට බලපෑම් කරන්න මේ නීතිය වෙනස් කරන්න කියලා. ඒ වෙනුවෙන් කරන සාධාරණ අරගලයකට/උද්ඝෝෂණයකට කතා කළොත්, අපිත් එන්නම් ඔබත් එක්ක හඬක් නගන්න. නිකම්ම key board එකෙන් වීරයෝ වෙලා සමාජය අවුලුවන එකෙන් වෙන්නේ ප්රශ්නය තවත් දුරදිග යන එක විතරයි.
2. අද සමාජයේ අවුරුදු 12න් විවාහ වන ළමයින් කොහෙද ඉන්නේ?
මඳක් ප්රායෝගිකව හිතලා බලන්න. අද ලංකාවේ කොහේද අවුරුදු 12 ළමයින්ව දෙමව්පියන් විසින් කසාද බන්දලා දෙන්නේ? එහෙම මෑතකදී වෙච්ච එකම එක සිද්ධියක් හෝ ඔප්පු කරලා පෙන්වන්න පුළුවන්ද?
යොවුන් වියේ ප්රේම සම්බන්ධතා නිසා ගෙවල්වලින් පැනලා යන අවස්ථා ඕනෑම ආගමක, ජාතියක දකින්න ලැබෙනවා. ඒක සමාජ ඛේදවාචකයක් මිසක් ආගමික කාරණයක් නෙවෙයි. එහෙම නැතුව මුස්ලිම් දෙමව්පියන් විසින් තමන්ගේ 12 හැවිරිදි දැරියන්ව බලෙන් විවාහ කර දෙන සංස්කෘතියක් අද නැහැ. මටත් දුවෙක් ඉන්නවා. මගේ එකම අරමුණ ඇයට හොඳම අධ්යාපනයක් ලබා දෙන එක. ඇයට අවුරුදු 22-25ක් වෙනකම් මම කසාදයක් ගැන කතා කරන්නේවත් නැහැ. අද ඉන්න බහුතරයක් මුස්ලිම් දෙමව්පියන්ගේ මානසිකත්වයත් ඕකම තමයි.
ඕනෑම සමාජයක යම් යම් නූගත් පිරිස් ඉන්නවා තමයි. නමුත් ඒ සුළුතරයේ ක්රියාකලාපය මුළු මුස්ලිම් සමාජයේම බහුතරයේ මතය හැටියට හංවඩු ගහන එක සම්පූර්ණයෙන්ම වැරදියි.
3. නබිතුමාගේ විවාහය සහ ඉස්ලාමයේ විවාහ වයස පිළිබඳ මතය:
සමහරු මේ කතාව අස්සේ මූහම්මද් නබිතුමාගේ විවාහයක් ගැන කතා කරනවා. සහෝදරයිනි, ඒ දේවල් සිද්ධ වුණේ අදින් අවුරුදු 1400කටත් වඩා පෙර කාලයක. ඒ කාලයේ පැවති සමාජ ක්රමය, දේශගුණය සහ මිනිසුන්ගේ කායික වර්ධනය අදට වඩා හාත්පසින්ම වෙනස්. ඔබ අපේ රටේ ඉතිහාසය හෝ ලෝක ඉතිහාසය අරගෙන බැලුවත්, මීට වඩා බොහෝ අන්ත දේවල් සිදුවෙලා තියෙනවා. අතීතයේ සිදුවූ දේවල් වර්තමාන කණ්ණාඩියෙන් බලලා මනින්න බැහැ.
අනෙක, විවාහය සම්බන්ධයෙන් ඉස්ලාමය අපිට උගන්වා ඇති පැහැදිලි නීති තිබෙනවා. කුර්ආනයේ 4:6 ආයතයේ දේපළ පවරා දීම ගැන කතා කිරීමේදී "විවාහ විය හැකි වයස" (Baligh) සහ "පරිණතභාවය/හරි වැරදි තේරුම් ගැනීමේ බුද්ධිය" (Rushd) යන කාරණා දෙකම අනිවාර්ය කර තිබෙනවා. ඒ වගේම සහීහ් අල්-බුහාරි හදීස් ග්රන්ථයේ පැහැදිලිව සඳහන් වෙනවා, "කිසිදු කාන්තාවක් ඇයගේ පැහැදිලි අවසරයකින් සහ කැමැත්තකින් තොරව විවාහ කර නොදිය යුතුයි" කියලා. අවුරුදු 12ක කුඩා දරුවෙකුට විවාහයක් ගැන තීරණය කරන්න හෝ කැමැත්ත ප්රකාශ කරන්න බුද්ධියක් නැහැනේ. ලෝකය දියුණු වෙද්දී අපිත් ඒ එක්කම බුද්ධිමත්ව යාවත්කාලීන වෙලා තියෙනවා. අපි තවමත් ඉන්නේ ගල් යුගයේ නෙවෙයි; අපේ ආගමික හා සංස්කෘතික රාමුව ඇතුළේ අපිත් කාලයට ගැලපෙන විදිහට ජීවත් වෙනවා.
4. "අරාබියට පලයන්" කියන අයට දෙන පිළිතුර:
බොහෝ දෙනෙක්ට තරහ ගියාම කියන කතාවක් තමයි "උඹලට මේක හරියන්නේ නැත්නම් මුස්ලිම් රටකට පලයන්" කියන එක. ඇයි අපි එහෙම යන්නේ?
අපි මේ රටට ආවේ අද වගේ යුද්ධවලින් බේරෙන්න ආපු සරණාගතයෝ විදිහට නෙවෙයි. ඉතිහාසය කියවලා බලන්න. ඈත අතීතයේ අරාබියේ ඉඳන් මේ රටට ආපු වෙළෙන්දෝ, මේ රටේ හිටපු සිංහල කාන්තාවන්ව විවාහ කරගෙන තමයි පවුල් සංස්ථාවන් ගොඩනගා ගත්තේ. ඒ පරම්පරාවලින් පැවත එන අය තමයි අද මේ ලංකාවේ ඉන්න මුස්ලිම් ජනතාව කියන්නේ. එදා ඔබේ මුතුන්මිත්තන් තමන්ගේ කාන්තාවන්ව ඒ විදිහට විවාහ කරලා දුන්නේ නැත්නම්, හෝ ඒ කාන්තාවන් තමන්ගේ කැමැත්තෙන් ඉස්ලාම් ආගම වැළඳගත්තේ නැත්නම්, අද ලංකාවේ මෙහෙම මුස්ලිම් සමාජයක් නැහැ. එහෙනම් අපිත් අද සිංහල.
අපේ මව්වරුන් මේ රටේ සිංහල කාන්තාවන්. අපේ ලේ වල තියෙන්නෙත් මේ මහ පොළොවේම උරුමය. ඒ නිසා ඔයාලට මේ රට ගැන තියෙන අයිතිය, කැක්කුම සහ ආදරය ඒ විදිහටම අපිටත් තියෙනවා. අපි කවදාවත් මේ රට බෙදලා වෙනම රාජ්යයන් ඉල්ලුවේ නැහැ. අපි ලංකාවේ හැමතැනම ඔබත් එක්ක සහජීවනයෙන් ජීවත් වෙනවා. ආගම කියන්නේ තමන්ගේ පෞද්ගලික විශ්වාසය සහ කැමැත්ත. මේක ප්රජාතන්ත්රවාදී රටක්. ආගම වෙනස් වුණා කියලා අපේ ශ්රී ලාංකික පුරවැසිභාවයවත්, අපිට තියෙන සම අයිතිවාසිකම්වත් නැති වෙන්නේ නැහැ. අපි ග්රහලෝකෙකින් පාත් වෙච්ච මිනිස්සු නෙවෙයි සහෝදරයා.
5. ආගමක් ගැන කතා කිරීමේදී සහ සමාජ මාධ්ය භාවිතයේදී වගකීම:
කිසිම ආගමක් ගැන හරිහැටි අවබෝධයක් නැතුව කතා කරන්න එපා. අද බොහෝ page Admin ලා කරන්නේ සමාජය අවුස්සලා, ආගම්වාදය පතුරවලා තමන්ගේ මඩිය තරකර ගන්න එකයි. ඔබ දාන පෝස්ට්වලින් ඇත්තටම ඔබ බලාපොරොත්තු වෙන්නේ රටේ සාමය සහ සංහිඳියාව නම්, මේ විදිහට මිනිස්සුන්ගේ සිත් රිදවන්න එපා.
ආගම කියන්නේ මනුස්සයෙක්ව ඉතාම ඉක්මනින් කෝපයට පත් කරන්න පුළුවන් සංවේදී මාතෘකාවක්. මේක තමයි ලංකාවේ දේශපාලඥයොත් මෙච්චර කල් තමන්ගේ බලය වෙනුවෙන් පාවිච්චි කළේ. කෙනෙක් පුද්ගලිකව කරන වැරැද්දකට ඒ මනුස්සයා අදහන ආගම පළි නැහැ. අටමස්ථානයේ හාමුදුරුවෝ කෙනෙක් වැරැද්දක් කළා කියලා, ගෞතම බුදුරජාණන් වහන්සේගේ නිර්මල බුදු දහම කවදාවත් වැරදි වෙන්නේ නැහැ වගේම තමයි මේකත්. මේ ධර්මතාවය හැම ආගමකටම පොදුයි. අපි හැමෝම තම තමන්ගේ ආගම්වලට ගරු කරමු. නිසි අවබෝධයක් නැතුව අසත්ය කරුණු සමාජගත කිරීමෙන් වෙන්නේ අපේ රටේ තියෙන සාමය කඩවෙන එක විතරයි.
6. අවසාන වශයෙන්: ෆේස්බුක් එකේ වැලපෙනවට වඩා ප්රායෝගික වෙමු:
අවසන් වශයෙන් කියන්න තියෙන්නේ, ඔය විවාහ නීතියේ වයස වෙනස් කළා කියලා අපිට කිසිම ප්රශ්නයක් නැහැ. ඒකෙන් අපිට අහිමි වෙන දෙයකුත් නැහැ. මොකද අවුරුදු 12න් බන්දලා දෙන්න අපි ගාව දරුවෝ නැති නිසා.
ඒ නිසා මේ ගැන Facebook එකේ මරාගන්නවා වෙනුවට, මේක වෙනස් කරන්න බලපෑම් කරන්න පුළුවන් තැන්වලට (පාර්ලිමේන්තුවට, නීති සම්පාදකයින්ට) ලිඛිතව දැනුම් දෙන්න. ඒ වෙනුවෙන් හඬක් නගන්න. ලංකාවේ මුස්ලිම් සමාජයේ බහුතරයකුත් ඔබත් එක්ක ඒ තීරණයට සහයෝගය දේවි.
මං ලියපු මේ දීර්ඝ සටහන නිසා කාගේ හෝ හිතක් රිදුණා නම් මට සමාවෙන්න. මේ දේවල් ලිව්වේ කාටවත් රිද්දන්න හෝ පහත් කරන්න නෙවෙයි, සමාජයේ පැතිරෙන වැරදි මතය ගැන ඇත්ත තත්ත්වය පැහැදිලි කරලා දැනුවත් කරන්නයි.
හැමෝටම සර්වබලධාරී අල්ලාහ් දෙවියන්ගේ පිහිටයි! ශ්රී ලංකා මාතාවට ජයවේවා!
#සංහිඳියාව
