09/10/2026
سرکول یوتھ ونگ
نوجوان تحریک، یونین کونسل سرکول
غیر سیاسی، عوامی اور فلاحی پلیٹ فارم
سرکول یوتھ ونگ شعور، اتحاد، تعلیم، بنیادی حقوق اور عوامی مسائل کے حل کے لیے عملی جدوجہد پر یقین رکھتا ہے۔ کرپشن، ناانصافی، اقرباپروری اور ہر قسم کے مافیا کے خلاف پُرامن، آئینی اور مؤثر آواز اٹھانا ہماری ترجیح ہے۔
ہم نے نیک نیتی، ایمانداری، جذبۂ خدمت اور اپنی محدود وسائل کے ساتھ، بغیر کسی لالچ اور سیاسی پشت پناہی کے، پسماندہ یونین کونسل سرکول کے دیرینہ عوامی مسائل کو ملکی سطح پر اجاگر کرنے کی کوشش کی ہے۔
ہم نے اپنے علاقے کی محرومیوں اور پسماندگی کو متعلقہ حکام اور عوام کے سامنے رکھا ہے اور ان قوتوں کو واضح پیغام دیا ہے جو عوام کی خاموشی کو ان کی کمزوری سمجھتی ہیں.
اب ہم خاموش نہیں رہیں گے۔ اپنے حقوق کے لیے ہماری پُرامن اور آئینی جدوجہد جاری رہے گی۔
ہماری جدوجہد اور اقدامات کا باقاعدہ ریکارڈ اور شواہد موجود ہیں۔
1۔ تعلیم: ہمارا بنیادی حق، ہماری اولین ترجیح
تعلیم سے محرومی کسی بھی معاشرے کے مستقبل کو تاریک کر سکتی ہے۔ بدقسمتی سے یونین کونسل سرکول طویل عرصے سے تعلیمی پسماندگی کا شکار ہے۔ ہم سمجھتے ہیں کہ تعلیم کے میدان میں اس محرومی کو ختم کرنا وقت کی اہم ضرورت ہے۔
سرکول یوتھ ونگ کی نمایاں کوششیں
▪️ یوسی سرکول کے تمام سرکاری سکولوں، بشمول گرلز سکولز، میں سٹاف کی کمی پوری کرنے کے لیے بھرپور جدوجہد کرنا اور اس سلسلے میں نمایاں پیش رفت حاصل کرنا۔
▪️ سکولوں کی اپ گریڈیشن، فرنیچر اور بنیادی سہولیات کے مطالبات اعلیٰ حکام تک پہنچانا اور ان کی منظوری کے لیے مسلسل پیروی کرنا۔
▪️ ڈاوٹ میں گرلز پرائمری سکول کی منظوری کے لیے کوششیں، جبکہ گرلز ہائی سکول کے نوٹیفکیشن کا عمل جاری ہے۔
▪️ جٹکول کے لیے مڈل سکول کی منظوری کے سلسلے میں جدوجہد کرنا۔
▪️ سرکول ایجوکیشن کمپلیکس کے تعمیراتی کام کی مسلسل نگرانی اور متعلقہ حکام کے ساتھ رابطہ کاری۔
سرکول ایجوکیشن کمپلیکس ہماری یونین کونسل کے لیے ایک تاریخی تعلیمی منصوبہ ہے، جو علاقے میں تعلیم کے فروغ اور آنے والی نسلوں کے بہتر مستقبل کی بنیاد بن سکتا ہے۔ اس منصوبے کی تکمیل ہماری اہم ترجیحات میں شامل ہے۔
2۔ صحت: بنیادی سہولیات ہر شہری کا حق
عوام کو صحت کی بنیادی سہولیات کی فراہمی کسی احسان کی محتاج نہیں، بلکہ ان کا بنیادی حق ہے۔
BHU ▪️
گنانگر کی اپ گریڈیشن کا معاملہ متعلقہ حکام، سیکرٹری صحت، چیف سیکرٹری، وزیر صحت اور سیاسی نمائندوں کے سامنے اٹھانا۔
▪️ اس منصوبے کو آگے بڑھانے کے لیے مسلسل رابطہ اور پیروی کرنا، تاکہ عوام کو بہتر طبی سہولیات میسر آ سکیں۔
▪️ ضلعی محکمہ صحت اور ضلعی انتظامیہ کے ساتھ بنیادی طبی مسائل پر مسلسل رابطہ رکھنا۔
▪️ علاقے میں صحت کی سہولیات کی کمی اور عوام کو درپیش مشکلات کو اجاگر کرنا۔
ہمارا مطالبہ واضح ہے سرکول کے عوام کو بھی صحت کی معیاری اور بنیادی سہولیات ان کی دہلیز پر فراہم کی جائیں۔
3۔ پانی، لنک روڈز اور بنیادی ڈھانچے کی ترقی
کسی علاقے کی ترقی کے لیے صاف پانی، بہتر سڑکیں اور بنیادی سہولیات ناگزیر ہیں۔
سرکول یوتھ ونگ نے ان مسائل کے حل کے لیے مسلسل آواز اٹھائی ہے۔
▪️ واٹر سپلائی سکیموں اور لنک روڈز کے لیے مؤثر آواز اٹھانا، جس کے نتیجے میں بعض لنک روڈز کے لیے فنڈز کی منظوری اور مختلف واٹر سپلائی سکیموں پر پیش رفت ہوئی۔
▪️ جٹکول پل کے لیے خصوصی اور مسلسل جدوجہد کرنا، جو اب آخری مراحل میں ہے۔
▪️ دندئی چکیسر روڈ، جو پورے علاقے کی ایک اہم شاہراہ اور ترقی کی شہ رگ ہے، کے تعمیراتی کام کی مسلسل نگرانی اور متعلقہ اداروں کے ساتھ رابطہ کاری کرنا۔
▪️ سڑک کی تعمیر میں جہاں ناقص کام یا معیار سے متعلق خدشات سامنے آئے، انہیں بروقت متعلقہ حکام تک پہنچانا تاکہ عوامی وسائل کا درست استعمال اور معیاری تعمیر یقینی بنائی جا سکے۔
ہمارا مؤقف واضح ہے کہ ترقیاتی کام صرف مکمل ہونا کافی نہیں، بلکہ معیاری، پائیدار اور شفاف ہونا بھی ضروری ہے۔
4۔ تحریکِ احتساب شانگلہ: کرپشن کے خلاف جدوجہد
سرکول یوتھ ونگ نے تحریکِ احتساب شانگلہ کے ساتھ روزِ اول سے کرپشن، بدعنوانی، ناانصافی اور عوامی وسائل کے مبینہ غلط استعمال کے خلاف پُرامن اور آئینی جدوجہد میں یونین کونسل سرکول کی نمائندگی کی ہے۔
ہم سمجھتے ہیں کہ عوامی وسائل عوام کی امانت ہیں اور ان کے استعمال میں شفافیت، جواب دہی اور میرٹ کو یقینی بنانا ہر متعلقہ ادارے اور ذمہ دار شخص کی ذمہ داری ہے۔
ہماری جدوجہد کسی ذاتی دشمنی یا سیاسی انتقام کے لیے نہیں، بلکہ ایک ایسے معاشرے کے قیام کے لیے ہے جہاں قانون کی حکمرانی ہو، عوام کے حقوق محفوظ ہوں اور کسی کو بھی احتساب سے بالاتر نہ سمجھا جائے۔
5۔ سیاسی نمائندوں کے نام پیغام
ہم یونین کونسل سرکول کے تمام سیاسی نمائندوں کی ان کوششوں اور اقدامات کو سراہتے ہیں جو علاقے کی ترقی اور عوامی مسائل کے حل کے لیے کیے گئے ہیں۔
تاہم ہمارا مطالبہ ہے کہ عوامی مینڈیٹ کا احترام کرتے ہوئے سرکول کی دیرینہ محرومیوں اور پسماندگی کے خاتمے کے لیے عملی اقدامات کیے جائیں۔
عوام نے آپ کو نمائندگی کا اختیار دیا ہے۔ اب وقت ہے کہ اس اعتماد کا حق ادا کیا جائے اور سرکول کے عوام کے ساتھ ہونے والی تاریخی محرومیوں کا ازالہ کیا جائے۔
ہم کسی سیاسی جماعت یا نمائندے کے خلاف نہیں، بلکہ ہر اس اقدام کے حامی ہیں جو عوامی مفاد میں ہو۔ اسی طرح جہاں عوامی مسائل نظرانداز ہوں گے، وہاں سوال کرنا اور جواب طلب کرنا بھی ہمارا حق رہے گا۔
6۔ نوجوانوں کے نام پیغام
نوجوان کسی بھی معاشرے کی اصل طاقت ہوتے ہیں۔ انہیں سیاسی مفادات، ذاتی دشمنیوں اور گروہی وابستگیوں کے لیے استعمال کرنے کے بجائے تعلیم، شعور، خدمت اور مثبت اجتماعی کردار کی طرف لانا ضروری ہے۔
ہم چاہتے ہیں کہ سرکول کا نوجوان شخصیت پرستی، اندھی تقلید اور ہر قسم کی غلامانہ سوچ سے بالاتر ہو کر اپنے حقوق، اپنے مستقبل اور اپنے علاقے کی ترقی کے لیے کھڑا ہو۔
ہم بحیثیت مسلمان اور پاکستانی ایک آزاد قوم ہیں۔ ہماری وفاداری کسی فرد، گروہ یا ذاتی سیاسی مفاد کے بجائے حق، انصاف، عوامی فلاح اور اپنے علاقے کی بہتری کے ساتھ ہونی چاہیے۔
ہماری جدوجہد کسی ایک دن یا ایک منصوبے تک محدود نہیں۔ یہ شعور، حقوق اور بہتر مستقبل کی مسلسل تحریک ہے۔
📢 ہمارا واضح مؤقف: سرکول یوتھ ونگ آزاد ہے!
سرکول یوتھ ونگ ایک آزاد، غیر سیاسی، عوامی اور فلاحی پلیٹ فارم ہے۔
ہم کسی سیاسی جماعت، گروہ یا فرد کے اشاروں پر نہیں چلتے اور نہ ہی کسی ذاتی مفاد کے لیے کام کرتے ہیں۔
ہماری وابستگی اپنے علاقے، اپنے عوام اور ان کے بنیادی حقوق کے ساتھ ہے۔
ہم تنقید، شکایت، اختلافِ رائے اور سوال کرنے کو اپنا بنیادی جمہوری حق سمجھتے ہیں۔ ہماری تنقید کا مقصد کسی کی ذاتی تضحیک نہیں، بلکہ مسائل کی نشاندہی اور ان کے حل کے لیے جواب دہی کو یقینی بنانا ہے۔
ہم نہ کسی کی اندھی حمایت کرتے ہیں اور نہ ہی بلاوجہ مخالفت۔ ہم ہر اس اقدام کی حمایت کریں گے جو عوام کے حق میں ہو، اور ہر اس کوتاہی پر سوال اٹھائیں گے جو عوامی مفاد کے خلاف ہو۔
ہماری طاقت کسی سیاسی پشت پناہی میں نہیں، بلکہ عوامی اعتماد، اجتماعی شعور، اتحاد، دیانت اور خدمت میں ہے۔
سرکول کی ترقی، تعلیم، صحت، بنیادی حقوق اور خوشحال مستقبل کے لیے ہماری جدوجہد جاری رہے گی، ان شاء اللہ۔
سرکول یوتھ ونگ
اتحاد • خدمت • شعور • ترقی
