12/08/2025
لاڙڪاڻو
لاڙڪاڻي شهر جي ليڊيز جيل روڊ واري علائقي جي رهواسڻ عورت ارم ڌيء علي اڪبر بليدي پنهنجي پيرسن امڙ الطاف خاتون، ڀينرن انيلا، زهره، سائره ۽ معصوم ٻارڙن سان گڏجي لاڙڪاڻو پريس ڪلب ۾ پريس ڪانفرنس ڪندي چيو آهي ته منهنجو والد علي اڪبر بليدي برف فيڪٽري جو مشهور ڪاريگر هو، جيڪو سال 2014ع دوران وفات ڪري ويو آهي، جڏهن ته مرحوم والد پنهنجي سڄي زندگي ۾ تمام گهڻي محنت ڪندي لاڙڪاڻي شهر جي مختلف علائقن ڦل روڊ، رحمت پور، ايوب ڪالوني ۾ رهائشي گهر وٺڻ سان گڏ امپائر روڊ واري علائقي ۾ هڪ دڪان، سمال انڊسٽريز ۾ برف جو ڪارخانو، پراڻي بس اسٽينڊ واري علائقي ۾ رهائشي پلاٽ خريد ڪرڻ سميت قمبر شهر ۾ بيڪري، برف جو ڪارخانو ۽ 5 هزار فوٽ رهائشي پلاٽ خريد ڪيو هو، جڏهن ته مرحوم والد 2 ڪارن، هڪ سوزڪي گاڏي، موٽرسائيڪل، سونن زيورن سميت 46 لک انشورنس جي رقم جو مالڪ پڻ هيو، جنهن ملڪيت ۾ اسين 5 ڀينرون ۽ 3 ڀائر برابر جا حصيدار آهيون. هن الزام لڳايو ته والد علي اڪبر بليدي جي وفات کان پوءِ ڄاڻايل سموري ملڪيت تي منهنجي بااثر چاچن ديدار علي بليدي ۽ احمد علي خان بليدي زبردستي قبضو ڪرڻ بعد اها سموري ملڪيت مختلف وقتن تي وڪرو ڪري ڇڏي آهي ۽ اسان کي ڪروڙين روپين جي پراپرٽي مان صرف 46 لک روپيا ڏنا ويا آهن، اهڙيون شڪايتون مان پنهنجي پيرسن امڙ ۽ ڀينرون سان گڏجي ڪيترائي ڀيرا شهر جي معزز ماڻهن سميت دڙي، سول لائين ٿاڻن ۽ ايس ايس پي آفيس ۾ ڏنيون آهن، پر تنهن باوجود اسان کي پنهنجي جائز حق کان محروم رکيو ويو آهي، جيڪا سراسر ناانصافي آهي. هن سنڌ هاءِ ڪورٽ جي چيف جسٽس، سنڌ جي وڏي وزير، آءِ جي سنڌ سميت لاڙڪاڻي جي چونڊيل نمائندن توڙي ڊي آءِ جي، ايس ايس پي ۽ ٻين وس وارن کي اپيل ڪئي ته معاملي جو نوٽيس وٺي بااثر چاچن خلاف ڪاروائي ڪرڻ سان گڏ اسان کي پنهنجو حق ڏياري انصاف ڪيو وڃي.
