Ang Malaya Online (2026)

19/12/2025

𝗔𝗡𝗚 𝗠𝗔𝗟𝗔𝗬𝗔 𝗖𝗛𝗥𝗜𝗦𝗧𝗠𝗔𝗦 𝗙𝗢𝗟𝗜𝗢 𝟮𝟬𝟮𝟱
𝐅𝐫𝐮𝐢𝐭 𝐒𝐚𝐥𝐚𝐝: 𝐌𝐚𝐠𝐤𝐚𝐤𝐚𝐡𝐚𝐥𝐨 𝐚𝐭 𝐌𝐚𝐠𝐤𝐚𝐤𝐚𝐬𝐚𝐦𝐚

𝙎𝙖𝙜𝙞𝙣𝙜, 𝙎𝙖𝙜𝙞𝙣𝙜, 𝙈𝙖𝙣𝙜𝙜𝙖, 𝙈𝙖𝙣𝙜𝙜𝙖, 𝙋𝙖𝙥𝙖𝙮𝙖, 𝙋𝙖𝙥𝙖𝙮𝙖
𝙋𝙖𝙜𝙨𝙖𝙢𝙖-𝙨𝙖𝙢𝙖𝙝𝙞𝙣, 𝙋𝙖𝙜𝙝𝙖𝙡𝙪-𝙝𝙖𝙡𝙪𝙞𝙣, 𝙁𝙧𝙪𝙞𝙩 𝙎𝙖𝙡𝙖𝙙, 𝙁𝙧𝙪𝙞𝙩 𝙎𝙖𝙡𝙖𝙙~

Talamak na naman ang mga gawain ngayong Disyembre. Sa halip na niyebe ang bumabagsak, kabi-kabila ang mga research, reportings, at PETA. Talagang napatunayan pa na season of giving nga, ang kaso naman ay ang pagbibigay ng stress.

Kaya naman, lahat tayo ay nagnanasang makaramdam na ng pahinga — ‘yung tipong nalalasahan mo na ang fruit salad sa bawat school work na natatapos mo. Dagdag pa rito, naririnig mo na rin ang videoke na tumutugtog sa magiging family reunion sapagkat nalalapit na ang Christmas break.

Ayon sa Department of Education (Deped) Calendar, ang Christmas break ay nagtatagal mula Disyembre 20 hanggang sa ika-apat ng Enero. Ito ang panahon na ibinibigay ng DepEd para makapagpahinga at makasama ng mga mag-aaral at mga g**o ang kanilang mga pamilya sa panahon ng pasko at bagong taon.

Nagmimistula tuloy na isang medalya ng tagumpay nang matikman mo na ang inaasam na fruit salad— hindi dahil sa masarap na lasa kundi dahil sa pahingang kasama ang pamilya.

Kagaya ng fruit salad, nagagawang pagsamahin ng Christmas break ang magkakalayo. Isa itong palatandaan na sa kabila ng malamig na hangin ng Disyembre, matatalo naman ito ng mga maiinit na yakap mula sa mga kamag-anak.

Galing man kayo sa bilohabang ubas o sa pahabang saging, ang mahalaga ay magkakasama kayo muli bilang isang pamilya kagaya ng isang fruit salad— mas masarap kung magkakasama.

Artikulo ni Nadine Disca | 12 STEM M
Dibuho ni Jolan Carpio | 12 STEM B
Pag-aanyo ni Yellena Santos | 12 STEM G

16/12/2025

𝗢𝗣𝗜𝗡𝗬𝗢𝗡
𝐒𝐚 𝐈𝐥𝐚𝐥𝐢𝐦 𝐧𝐠 𝐊𝐚𝐭𝐚𝐡𝐢𝐦𝐢𝐤𝐚𝐧, 𝐒𝐢𝐧𝐨 𝐚𝐧𝐠 𝐓𝐮𝐧𝐚𝐲 𝐧𝐚 𝐏𝐢𝐧𝐨𝐩𝐫𝐨𝐭𝐞𝐤𝐭𝐚𝐡𝐚𝐧?

Sa loob lamang ng halos sampung minuto, inaprubahan ng Senado ang P899.236-milyong badyet para sa Office of the Vice President (OVP). Walang nagtangkang magtanong, walang humingi ng paglilinaw, walang nagpakita ng pagtutol. Sa isang prosesong inaasahang bukas at masinsin, nanaig ang katahimikan—ipinangatuwiran ang isang nakasanayang tradisyon: ang parliamentary courtesy. Ngunit sa katahimikang ito, mas malinaw ang tanong na hindi pa nasasagot: kanino nga ba naglilingkod ang katahimikan?

Ang parliamentary courtesy ay isang ‘di nakasulat na alituntunin sa paggalang at hindi pakikialam sa pagitan ng iba’t ibang sangay ng lehislatura at ng ehekutibong sangay. Sa papel, ito ay sumisimbolo sa propesyonalismo. Sa aktuwa, ito ay nagiging problema kapag ito ay ginagamit bilang panangga. Sa halip na maging tulay sa maayos na ugnayan, isang pader na humaharang upang masagot ang mga tanong ng mamamayan.

Noong nakaraang taon, binawasan ng Kamara ang badyet ng OVP mula P2.037 bilyon tungong P733 milyon matapos lumitaw ang kuwestiyonableng paggamit ng confidential funds. Ang hakbang na ito ay bunga ng pagtatanong. Gayunpaman, ang parehong badyet ay mabilis ding binalik sa P899 milyon ng Senate Finance Committee alinsunod sa National Expenditure Program, na tila walang masusing pagpapaliwanag.

Dito nagsimulang makaramdam ng pagkabahala ang mga kritiko. Ang badyet ay hindi lamang isang numero sa papel. Ito ay buwis ng mga manggagawa, sahod ng mga g**o, at pagsasakripisyo ng bawat pamilyang Pilipinong umaasang ang bawat pisong inilalabas ng pamahalaan ay may makatarungang patutunguhan. Kapag ang deliberasyon ay nabalutan ng katahimikan, ang tiwala ng bayan ay unti-unting nauubos.

Sa isang demokratikong lipunan, ang paggalang ay hindi kailanman dapat ihiwalay sa pananagutan. Ang tunay na paggalang sa institusyon ay pagtatanong, hindi pag-iwas. Ang tunay na paglilingkod ay hindi tahimik na pag-apruba, kundi malinaw na paliwanag at bukas na pagharap sa mamamayan.

Sa huli, mananatiling bukas ang tanong na hindi kayang sagutin ng katahimikan: Sa ilalim ng katahimikan, sino ang tunay na pinoprotektahan? Ang sagot ay hindi dapat matabunan ng tradisyon. Ang tunay na opisyal ng lipunan ay walang dapat na prinoprotektahan, bagkus sila dapat ang maging tulay upang umayos at umunlad ang bayan. Sapagkat ang bawat pisong ginagastos ng pamahalaan, ang mamamaya’y may karapatang makialam, magtanong, at humingi ng pananagutan sa pawis at buwis na kanilang pinaghirapan.

Artikulo ni Jannelle Mackenzie B. Guevarra | 7- SPJ (F) Ponce
Pag-aanyo ni Abigael Tamayo | 11 Efficiency

16/12/2025

𝗣𝗔𝗡𝗜𝗧𝗜𝗞𝗔𝗡
𝐊𝐢𝐧𝐚𝐧𝐠 𝐧𝐠 𝐋𝐢𝐰𝐚𝐧𝐚𝐠: 𝐏𝐚𝐧𝐠𝐚𝐫𝐚𝐩 𝐬𝐚 𝐊𝐚𝐥𝐚𝐠𝐢𝐭𝐧𝐚𝐚𝐧 𝐧𝐠 𝐃𝐢𝐥𝐢𝐦

Sa mundong balot ng mga pagsubok, ang liwanag ay hindi laging madaling makita—ngunit laging naroon para sa mga handang mangarap. Sa bawat batang may pangarap, may munting sindi ng pag-asa na unti-unting kumikislap sa gitna ng kadiliman.

Sa bawat sulok ng bansa, maraming kabataan ang patuloy na hinahabol ang kanilang pangarap kahit kapos sa kagamitan, oras, o pagkakataon. Maraming estudyante ang pumapasok sa klase na may kakulangan—sa gamit, sa tulong, o sa pang-araw-araw na pangangailangan—at kadalasa’y nagugulat sa bigat ng hamon na dala ng lipunang hindi laging patas.

Tulad ni Ma. Ahtisa Manalo, Miss Universe 2025 3rd Runner Up, lumaki siya sa simpleng tahanan at nagsimula sa pageants noong siya ay sampung taong gulang upang matustusan ang pag-aaral at makatulong sa pamilya.

“I come from a very poor background … I was hardworking, I was persistent, and I fight for what I want” ani Ahtisa.

Subalit may mga kwentong nagpapatunay na hindi imposibleng abutin ang pangarap at isang malinaw na patunay ang kwento ng buhay ni Manalo. Para sa maraming kabataang lumalaban sa sariling buhay, ang katagang iyon ay isang patunay na “kahit sino ka man, kahit saan ka man nagmula — may pag-asa.”

Kaya naman, ang naging adbokasiya ni Manalo na matulungan ang kabataan ay isinagawa niya sa pamamagitan ng Alon Akademie. Layunin nitong bigyan ng pagkakataon ang mga kapos-palad na kabataan upang magkaroon nang pantay na pagkakataon sa edukasyon at pag-unlad.

Sa pamamagitan ng kanilang mga programa, nagiging tulay sila para sa mga batang madalas isantabi ng lipunan, ipinakitang na ang pangarap ay hindi lamang pribilehiyo, kundi karapatang dapat maabot ng lahat.

Hindi lamang ang sariling determinasyon ang kailangan upang maabot ang pangarap. Mahalaga rin ang gabay at suporta mula sa iba: ang pamilya na nagbibigay lakas at pag-unawa, ang mga kaibigang katuwang sa hirap at aralin, ang mga g**ong nagsisilbing inspirasyon at gabay, at ang lipunang nagbubukas ng oportunidad, maliit man o malaki.

Tulad ni Ahtisa, ginamit niya ang kanyang plataporma upang ipakita na kahit mula sa simpleng pinagmulan, posible pa ring maging matatag at magpatuloy sa pagpupunyagi para sa pangarap.

“I want to be the hope of people … It doesn’t matter what your life circumstances are, it doesn’t define where you will go,” dagdag ni Manalo.

Sa huli, ang tunay na hamon para sa bata na nangangarap ay hindi kung gaano kalaki ang hadlang — kundi kung hanggang saan ang kanyang tiwala, sipag, at tapang na mangarap.

At kung may gabay na maaasahan, ang bawat kadiliman ay maaaring maging panimulang liwanag. Ang kwento ni Ahtisa ay patunay na ang pangarap, kung ipaglalaban, may kakayahang magliwanag sa kabila ng dilim.

Artikulo ni Cobi Sto. Domingo | 8 SPJ F BALAGTAS
Dibuho ni Kylie Rihanna Santos | 8-3 Avocado
Pag-aanyo ni Rhiane Centeno | 12 ABM A

15/12/2025

𝐊𝐔𝐋𝐓𝐔𝐑𝐀𝐍𝐆 𝐏𝐈𝐍𝐀𝐆𝐊𝐀𝐈𝐒𝐀 𝐍𝐆 𝐒𝐈𝐍𝐈𝐍𝐆 𝐀𝐓 𝐊𝐔𝐋𝐓𝐔𝐑𝐀

Ipinamalas ng mga Del Pilarian mula sa Special Program in Foreign Language (SPFL) ang kanilang natatanging husay at pagkakaisa sa makulay na pagdiriwang ng kultura para sa Festival of Talents 2025 ng Marcelo H. del Pilar National High School.

Report ni Naomi San Diego (11 Security) at Samantha Brava (10 SPJ Benigno)
Video Edit ni Justin Clark Centeno (12 STEM F)

15/12/2025

𝗔𝗚𝗧𝗘𝗞
𝐋𝐮𝐧𝐚𝐬 𝐊𝐨𝐧𝐭𝐫𝐚 𝐇𝐈𝐕: 𝐀𝐧𝐨𝐦𝐚𝐥𝐲𝐚 𝐬𝐚 𝐒𝐢𝐲𝐞𝐧𝐬𝐲𝐚 𝐨 𝐒𝐞𝐧𝐲𝐚𝐥𝐞𝐬 𝐧𝐠 𝐏𝐚𝐠-𝐚𝐬𝐚?

Sa mundo ng medisina, may mga sakit na tila hindi kayang tuldukan—mga kondisyong mabubuhay kasama ngunit bihirang malagpasan. Isa na rito ang Human Immunodeficiency Virus (HIV), na sa loob ng dekada ay itinuring na kontrolado ngunit hindi magagamot. Kaya’t anumang balitang kumokontra sa paniniwalang ito ay mabilis na nagiging sentro ng diskusyon.

Kamakailan, iniulat ng mga mananaliksik mula sa Germany ang isang pambihirang kaso: isang lalaking may HIV ang naging HIV-free patient matapos ang stem cell transplant na ginawa hindi para sa HIV, kundi para gamutin ang kanyang cancer.

Sa nagdaang mga taon, tanging mga pasyenteng nakatanggap ng stem cells mula sa donors na may bihirang CCR5-Δ32 mutation ang nagpakita ng paggaling. Ang mutation na ito ang nagiging “saradong pinto”, kung saan ay may nakasarang entrada na hindi mapasukan ng HIV ang immune cells, kaya hindi makapasok o makapagparami ang virus.

Ngunit ang bagong pasyente ay hindi mula sa ganoong donor. Walang mutation, walang espesyal na proteksiyon, at walang indikasyong magdudulot ito ng remission o paggaling. Gayunpaman, matapos ang paggamot at pagtigil sa antiretroviral therapy (ART)—ang kombinasyon ng gamot na iniinom araw-araw upang pigilan ang pagdami ng HIV—hindi na nakitaan ng HIV sa pangangatawan ng pasyente.

Ayon sa mga siyentipiko, maaaring nagdulot ng remission ang kumbinasyon ng tatlong salik: ang pagwasak ng lumang immune system sa chemotherapy, ang pagbuo ng panibagong immune cells mula sa donor, at ang posibilidad na inatake ng bagong immune system ang natitirang HIV-infected cells.

Kahit walang protective mutation, sapat ang mga prosesong ito upang maputol ang kakayahan ng virus na mabuhay.

Gayunpaman, hindi ito maituturing na lunas para sa lahat. Ang stem cell transplant ay mapanganib, mamahalin, at nakalaan lamang para sa mga may malubhang cancer. Hindi ito etikal o praktikal na gamitin bilang regular na gamutan para sa HIV. Sa ngayon, ang antiretroviral therapy (ART) pa rin ang pinakaligtas at pinakamabisang paraan upang manatiling undetectable ang virus.

Para sa mga mananaliksik, hindi anomalya ang kasong ito—isa itong senyales ng posibilidad. Ipinakikita nitong maaaring ma-reset ang immune system, at nagbubukas ito ng pinto para sa mas ligtas na stratehiya tulad ng gene editing, shock-and-kill methods, at iba pang future cure approaches.

Sa ngayon ay wala pang universal cure para sa HIV. Ngunit sa pag-usbong ng mga kasong tulad nito, malinaw na ang paghahanap ay hindi nauuwi sa matayog na dingding. Sa agham, minsan sapat na ang isang bihirang tagumpay upang muling buksan ang pag-asa.

Artikulo ni Wenly Erika Castillano | 8 SPJ (F) Balagtas
Dibuho ni Marina Rebecca Rojo | 10 Almaciga
Pag-aanyo ni Timothy Bernardino | 10 SPJ BENIGNO

14/12/2025

𝗕𝗔𝗟𝗜𝗧𝗔
𝑻𝑨𝑻𝑨𝑲 𝑺𝑷𝑭𝑳
𝐓𝐚𝐥𝐞𝐧𝐭𝐨 𝐚𝐭 𝐊𝐮𝐥𝐭𝐮𝐫𝐚, 𝐛𝐢𝐝𝐚 𝐬𝐚 𝐅𝐞𝐬𝐭𝐢𝐯𝐚𝐥 𝐨𝐟 𝐓𝐚𝐥𝐞𝐧𝐭𝐬 𝟐𝟎𝟐𝟓

Nagningning ang talento at dedikasyon ng Special Program in Foreign Language (SPFL) learners ng Marcelo H. del Pilar National High School (MHPNHS) sa matagumpay na pagdiriwang ng Festival of Talents (FOT), sa temang “Language in Harmony, A Global Showcase of Talents” nitong December 5, 2025 sa MHPNHS Gymnasium.

Layunin ng aktibidad na ipakita ang pag-unawa at pagpapahalaga ng mga mag-aaral sa kultura ng mga bansang kinabibilangan ng kanilang programa na Nihongo, Spanish, at Mandarin sa pamamagitan ng iba’t ibang pagtatanghal.

Ayon sa Pangulo ng Chinese Community (ChiCom) na si Venus Joy Manalad, naging daan ang FOT upang maipamalas ng mga SPFL learners tulad niya ang kanilang natatanging talento sa pag-arte, pagsayaw, at pagkanta.

Saad ni Manalad, “Hindi lang namin napahahalagahan yung wikang inaaral namin, kundi pati yung mga tradisyon nila na maaaring iugnay sa mga talento namin na nabibigyang pagkakataon na mapaunlad dahil sa event na ito”.

Dagdag dito, ipinahayag din ni Maria Anna Javier, Tagapayo ng La Comunidad Española ang papel na ginagampanan ng FOT sa pagpapalawak ng cultural awareness.

“Sa pamamagitan ng pagbibigay ng kaalaman tungkol sa kultura ng bansang pinag-aaralan, pagkukumpara ng kultura ng Pilipinas sa kultura ng ibang bansa at pagpapakita ng paggalang sa kultura ng ibang bansa,” aniya.

Samantala, pinuri naman ni Purificacion D. Paguiligan,English Department Head, ang husay ng mga mag aaral at pinasalamatan niya ang kanilang pagiging malikhain, masigasig at dedikado.

Artikulo nina Josh Andrei Bondoc at Anna Loraine Dionisio | 7 SPJ Ponce
Larawang kuha nina Arnmil Jedidiah Durolfo (9 SPJ Soliven) at Daniella Berba (7 SPJ F Ponce)

13/12/2025

𝐒𝐈𝐆𝐋𝐀 𝐀𝐓 𝐇𝐔𝐒𝐀𝐘 𝐍𝐆 𝐄𝐃𝐔𝐊𝐀𝐒𝐘𝐎𝐍𝐆 𝐌𝐀𝐋𝐎𝐋𝐄𝐍̃𝐎, 𝐓𝐀𝐌𝐏𝐎𝐊 𝐒𝐀 𝐄𝐃𝐔𝐂𝐀𝐓𝐈𝐎𝐍 𝗪𝐄𝐄𝐊 𝟮𝟬𝟮𝟱

Pormal na binuksan ng Schools Division Office-City of Malolos ang pagdiriwang ng Education Week 2025, tampok ang makulay na seremonya na nagbigay-diin sa kasiglahan ng edukasyon sa lungsod.

Tampok dito ang makulay na pagbubukas ng programa, pagtatanghal tungkol sa bayan at mga bayani, at ang pagbubukas ng division exhibits at bazaar na nagpapakita ng galing at kultura ng mga Maloleño.

Report ni Jake Lordy Pagtalunan | 12 ABM A
Video Edit ni Wilfred Cardenas | 11 JUSTICE

11/12/2025

𝗔𝗚𝗧𝗘𝗞
𝐓𝐮𝐥𝐝𝐮𝐤𝐚𝐧 𝐚𝐧𝐠 𝐊𝐚𝐬𝐢𝐧𝐮𝐧𝐠𝐚𝐥𝐢𝐧𝐠𝐚𝐧 𝐬𝐚 𝐔𝐬𝐚𝐩𝐢𝐧𝐠 𝐏𝐚𝐧𝐠𝐤𝐚𝐥𝐮𝐬𝐮𝐠𝐚𝐧

Moderno. Malasa. Mas ligtas.

Iyan ang mga imaheng ginagamit upang iangat ang popularidad ng e-cigarettes o v**e sa ating lipunan. Upang maging mas mabenta sa masa, ibinibida ng mga kompanya ng v**e ang iba’t ibang flavors nito, isang aspeto na tila bentang-benta lalo sa mga kabataan.

Bilang nakaaalarma ang porsyento ng mga kabataang tumatangkilik sa mga v**e, kinokonsidera ngayon ng Department of Health (DOH) ang tuluyang pagbabawal nito sa buong bansa.

Ayon kay DOH Secretary Teodora Herbosa, bagama’t ipinagbabawal ang paggamit ng v**e para sa mga menor de edad, kaliwa’t kanan pa rin ang mga estudyanteng naiuulat na tumatangkilik sa produktong ito—patunay ng isang lumalalang laban hindi lamang kontra adiksyon, kundi pati sa pangkalusugan.

Magkaiba man sa kanilang kemikal na komposisyon at mekanismo ng pagpasok sa katawan, parehong nagdudulot ng masamang epekto sa kalusugan ang v**e at tradisyonal na sigarilyo.

Ang tradisyonal na sigarilyo ay gumagamit ng combustion upang sunugin ang tabako, na siyang naglalabas ng libo-libong toxic at carcinogenic compounds na direktang nakapipinsala sa baga at buong cardiovascular system ng gumagamit nito.

Sa kabilang banda, ang e-cigarette naman o v**e ay gumagamit ng heating mechanism upang gawing aerosol—o anyong gas—ang isang likidong naglalaman ng nikotina, solvents, at flavoring chemicals. Bagama’t walang combustion sa prosesong ito, ipinakita ng mga pag-aaral na ang nalalanghap na aerosol ay maaaring magdala ng irritants, heavy metals, at ultrafine particles na maaaring magdulot ng stress sa respiratory at cardiovascular system ng isang tao.

Dahil dito, kahit magkaiba ang biochemical processes na sangkot sa paggamit ng dalawang produkto, pareho pa rin itong may kakayahang magdulot ng pangmatagalang panganib sa kalusugan ng tao.

Ang panawagan ng DOH na tuldukan ang paglaganap ng v**e sa mga kabataan ay hindi lamang upang protektahan ang kalusugan ng mga Pilipino, kung hindi isang mabisang pagkilos laban sa paglabag sa batas sa paggamit ng v**e.

Sa patuloy na pagiging legal ng pag-advertise ng mga produktong v**e online at pagdami ng mga nagbebenta nito malapit sa mga paaralang naglalaman ng mga kabataang puno ng kuryosidad sa buhay, hindi na nararapat pang tumagal ang usaping pagbabawal sa mga v**e.

Hindi ito mas ligtas—at mapa-v**e man o tabako, panganib ito hindi lamang para sa kalusugan ng mga gumagamit nito, ngunit pati sa mga nakasasalamuhang nakalalanghap sa hanging ibinubuga mula sa delikadong kemikal na taglay nito.

Artikulo ni Aliah Frace Escasinas | 12 STEM C at Arseleigh Marasigan | 12 STEM K
Pag-aanyo ni Manuel Laquindanum | 12 STEM G

08/12/2025

𝐊𝐚𝐩𝐢𝐬𝐭𝐚𝐡𝐚𝐧 𝐧𝐠 𝐊𝐚𝐥𝐢𝐧𝐢𝐬-𝐥𝐢𝐧𝐢𝐬𝐚𝐧𝐠 𝐏𝐚𝐠𝐥𝐢𝐥𝐢𝐡𝐢 𝐬𝐚 𝐌𝐚𝐡𝐚𝐥 𝐧𝐚 𝐁𝐢𝐫𝐡𝐞𝐧𝐠 𝐌𝐚𝐫𝐢𝐚

Tuwing Disyembre 8, ginugunita ng buong Simbahang Katoliko ang Kapistahan ng Kalinis-linisang Paglilihi sa Mahal na Birheng Maria o Immaculate Conception. Ayon sa pananampalataya, si Maria ay ipinaglihing walang bahid ng kasalanan sa sinapupunan ng kanyang Inang si Santa Ana upang si Maria ay ihanda bilang maging Ina ni Hesus. Ito ay nangangahulugang hindi siya kailanman naging sakop ng kasalanan, mula sa una niyang sandali ng pagkabuo hanggang sa kanyang buhay. Maraming deboto ang nagsisimba at nag-aalay ng dasal para sa patnubay at biyaya ni Maria.

Noong 1854 opisyal na idineklara ang kapistahang ito upang magbigay ng parangal at igalang si Maria sa ilalim ni Papa Pio IX. Sa Pilipinas idineklara ang Disyembre 8 bilang hindi pagpasok sa trabaho para sa Kapistahan ng Immaculada Conception sa Buong Pilipinas alinsundo sa REPUBLIC ACT NO. 10966.

Caption ni Tracy Mhac Coronel | 11-Justice
Pag-aanyo ni Nyah Gozano | 12 STEM G

07/12/2025

𝗜𝗦𝗣𝗢𝗥𝗧𝗦
𝐁𝐨𝐥𝐚 𝐏𝐚𝐭𝐮𝐧𝐠𝐨𝐧𝐠 𝐀𝐮𝐫𝐨𝐫𝐚: 𝐃𝐞𝐥𝐩𝐢𝐥𝐚𝐫𝐢𝐚𝐧 𝐕𝐨𝐥𝐥𝐞𝐲𝐛𝐚𝐥𝐥 𝐠𝐢𝐫𝐥𝐬 𝐭𝐞𝐚𝐦, 𝐂𝐋𝐑𝐀𝐀 𝐐𝐮𝐚𝐥𝐢𝐟𝐢𝐞𝐫𝐬 𝐧𝐚!

Pabangisan ng tirada at pakunatan ng depensa ang ibinida ng magkatunggali sa unang set ng banggaan, unang naibulsa ng La Consolacion University ang unang set sa dikit na puntos na 25-22 pabor sa kanila.

Bumira naman ng ganti ang mga babaeng Delpis at nagbitiw ng kaliwa’t kanang pamatay na mga palo na bumasag ng depensa ng kalaban sa iskor na 25-21.

Ngipin sa ngipin ang naging arangkada ng ikatlong set na magdidikta kung sino ang hihiranging kampeon.

Tulak kabig ang nangyaring talaan ngunit nangibabaw ang mga palo ng mga Delpis sa iskor na 16-14.

Caption ni Mark Jeremy Ediardo | 12 STEM C
Larawang kuha nina Kimverlique Torress | 12 STEM K at Ren Bryle Cruz | 12 HUMSS C

07/12/2025

𝗜𝗦𝗣𝗢𝗥𝗧𝗦
𝐀𝐫𝐢𝐛𝐚 𝐬𝐚 𝐍𝐰𝐞𝐛𝐞, 𝐍𝐨𝐥𝐚𝐬𝐜𝐨 𝐩𝐚𝐬𝐨𝐤 𝐧𝐚 𝐬𝐚 𝐂𝐋𝐑𝐀𝐀!

Muling nagningning ang galing ni Adie Nolasco ng Marcelo matapos niyang maangkin ang 9-Ball Championship sa City Meet 2025 na ginanap sa Vista Mall.

Sa bawat tira at diskarte, pinatunayan ni Nolasco na siya ang tunay na umaariba sa mesa–kaya’t secured na ang kanyang slot papuntang CLRAA, bitbit ang dangal ng Marcelo.

Caption ni Jennelyn Barcelon | 9 SPJ (F) Rodrigo
Larawang kuha ni Nathalie Cabanilla | 9 SPJ (F) Rodrigo

Ang Malaya Online

19/12/2025

16/12/2025

16/12/2025

15/12/2025

15/12/2025

14/12/2025

13/12/2025

11/12/2025

08/12/2025

07/12/2025

07/12/2025

Address

Website

Alerts

Contact The Business

Shortcuts

Share