14/09/2025
अत्यावश्यक संस्था छानीछानी जलाइयो, छानबिन र दोषीमाथि कारबाही हुन्छ– प्रधानमन्त्री शुसीला कार्की
काठमाडौं/खरिपाटी । प्रधानमन्त्री शुसीला कार्कीले हालै देशका विभिन्न भागमा भएका आन्दोलन र प्रदर्शनका क्रममा अत्यावश्यक सेवा संस्थाहरूमाथि योजनाबद्ध ढङ्गले आक्रमण र आगजनी भएको घटनाप्रति गम्भीर आपत्ति प्रकट गरेकी छिन्।
उहाँका अनुसार विद्यालय, अस्पताल, खानेपानी, विद्युत् कार्यालय तथा यातायात सेवाजस्ता नागरिक जीवनका आधारभूत आवश्यकता पूर्ति गर्ने संस्थामाथि लक्षित गरिएका आक्रमणहरू कुनै पनि हालतमा स्वीकार्य छैनन्।
प्रधानमन्त्री कार्कीले भनिन्,
“अत्यावश्यक संस्था छानीछानी जलाइएको प्रमाण खुलेका छन्। यस्तो गतिविधि आन्दोलन वा असन्तुष्टि प्रकट गर्ने संवैधानिक अधिकारको दुरुपयोग हो। यसमा संलग्नहरूलाई सरकारले छानबिन गरी कानूनी कठघरामा उभ्याउनेछ।”
छानबिन र कारबाहीको तयारी
प्रधानमन्त्रीले घटनाबारे विस्तृत छानबिन गर्न उच्चस्तरीय समिति गठन हुने र दोषीमाथि कडाभन्दा कडा कानूनी कारबाही गरिने स्पष्ट प्रतिवद्धता जनाइन्।
“अब कुनै पनि अराजक गतिविधि नाम मात्रको आन्दोलनको आडमा गरिनु सह्य हुने छैन,” उहाँले चेतावनी दिइन्।
साथै, प्रभावित संस्थाहरूलाई तत्काल सञ्चालनमा ल्याउन सम्बन्धित निकायलाई निर्देशन दिइएको छ।
“सर्वसाधारणलाई सेवा लिन वञ्चित पार्ने कार्य अपराध हो। सरकारले नागरिकलाई सहज रूपमा सेवा उपलब्ध गराउने जिम्मेवारी पूरा गर्छ,” प्रधानमन्त्री कार्कीले भनिन्।
शान्तिपूर्ण आन्दोलनप्रति सम्मान
प्रधानमन्त्रीले शान्तिपूर्ण विरोध र असन्तुष्टि प्रकट गर्ने अधिकारलाई सरकार सदैव सम्मान गर्ने तर सार्वजनिक सम्पत्ति जलाउने वा तोडफोड गर्ने कार्यलाई अपराधका रूपमा व्याख्या गर्ने बताइन्।
“जनताका अधिकार सुरक्षित गर्न सरकार प्रतिबद्ध छ, तर सार्वजनिक सम्पत्तिको नाश गर्ने गतिविधि सहन सकिँदैन,” उहाँले स्पष्ट पारिन्।
