Kavibasha കവിഭാഷ.

21/06/2025

വിദ്യാസാഹിതി കവിഭാഷ മാസിക ലക്കം 30 ഇഴ പ്രശസ്ത സാഹിത്യകാരന്‍ കെ.വി.മണികണ്ഠന്‍ പ്രകാശനം ചെയ്യുന്നു
വീഡീയോ കാണാം
https://youtu.be/9xXWYA1V9yI?si=gUCZd86RHVlcuXr
--------------------------------------- '
ഇഴ ഈ ലിങ്കില്‍ ക്ലിക്ക് ചെയ്ത് ഫ്ലിപ്പ് ബുക്കായി വായിക്കാം
https://online.anyflip.com/cdhdf/dqhz/mobile/index.html
----------------------------------------
കവിഭാഷ മാസിക
പത്രാധിപര്‍ ശിവപ്രസാദ് പാലോട്
മുഖചിത്രം സുരേഷ് കാട്ടിലങ്ങാടി
രചനകള്‍ അയക്കാന്‍ [email protected]
----------------------------------------
പിഡിഎഫ് കോപ്പിക്കായി 9249857148

29/05/2025

27/03/2025

അധ്യാപക ലോകം
ഫെബ്രുവരി 2025

18/02/2025

*പരോളിൽ ഇറങ്ങുന്ന സ്വപ്നങ്ങൾ*

നിരാശയുടെ
ജീവപര്യന്തത്തിനും
അവഗണനയുടെ
കഠിന തടവിനും
കൊലയ്ക്കു മുമ്പത്തെ
ദയാഹർജിയിയിലും
സ്വപ്നങ്ങൾക്ക്
പരോൾ ലഭിക്കും.

ചിലതിൽ
അറ്റുപോയ ചിറകുകളിൽ
പിന്നെയും വസന്തം പറക്കും

പെരുവിരൽ
നുണഞ്ഞിറക്കി
നിഗൂഢാനന്ദത്തിൽ
മയങ്ങും ശിശുവാകും

ചിലത് ഉടലാകെ
മുള്ളു വാക്കുകൾ
പൂവിടും കള്ളിമരം,

അവശേഷിച്ച
സൂര്യനെ
മഞ്ഞുതുള്ളിയിൽ
ഗർഭം ധരിച്ച പുൽക്കൊടി ,

തുറുങ്കിലേക്ക്
തിരികെ നടക്കുമ്പോൾ
വിഷാദം വാടിയ ചെമ്പരത്തിപ്പൂ

തിരിച്ചു കയറാതെ
പിടികൊടുക്കാതെ
വേദനയുടെ ഉൾക്കാട്ടിലേക്ക്
കാറ്റിനും കോളിനും
പായ വിരിക്കും
ആശകളുടെ കടലിലേക്ക്
ഒളിച്ചു പോകുന്നവ

ഓർമയുടെ വിഷം മോന്തി
ആത്മാഹുതി ചെയ്യുന്നവ

പരോളിലിറങ്ങുന്നവയെ
കാത്തിരിക്കുന്നത്
പല വാരിക്കുഴികളെന്ന്
ജീവിതന്യായസംഹിത.

10/02/2025

*വാക്കുകൾ ഉപ്പിലിട്ടത്/ ശിവപ്രസാദ് പാലോട്*

ഇന്ന് കണക്കെടുത്തപ്പോൾ
എത്ര വാക്കുകളാണെന്നോ
എൻ്റെ ഭാഷയിലേക്ക് കുടിയേറിയിരിക്കുന്നത് ?

വന്നു വന്ന്
നാട്ടിലെ വാക്കിന് വിലയില്ലാതായി
തൊഴിലില്ലാതായി
പട്ടിണിയും പരിവട്ടവുമായി
കുറെ വാക്കുകൾ
അകാല ചരമം പ്രാപിച്ചു

കുറെയെണ്ണം
കാലത്തിൻ്റെ പൊട്ടക്കിണറ്റിൽ
ആത്മാഹുതി ചെയ്തു

ദയാവധത്തിൻ്റെ വരിയിൽ
കൂനി നിന്ന് പതം പറയുന്ന
എൻ്റെ വാക്കുകൾ

വരവു ഭാഷയുടെ
ധൃതരാഷ്ട്രപ്പച്ച മൂടി
വറ്റിപ്പോയ ഉറവകൾ
കുറ്റിയറ്റ ചിനപ്പുകൾ

വാക്കിൻ്റെ ബലിക്കല്ലിൽ
ചോരയൊലിപ്പിച്ച് നിരത്തിലരഞ്ഞ്
കാക്ക കൊത്തി
എത്രയോ വാക്കുകൾ

നുഴഞ്ഞു കയറിയ
ഒരൊറ്റ വാക്കിനും
പൗരത്വ രേഖയില്ല
മണ്ണിൻ്റെ മണമില്ല
കരളടുപ്പമില്ല

ഒറ്റയടിക്ക്
ഒന്നിച്ച്
കൈയ്യാമം വച്ച്
കാൽച്ചങ്ങലയിട്ട്
ഇത്രയും വാക്കുകളെ
കുടിയൊഴിപ്പിക്കാൻ
എവിടെന്നു കിട്ടും
യുദ്ധവിമാനം?

അതിനാൽ
കുടിയേറിയ വാക്കുകളേ
നിങ്ങളെ ഞാനെൻ
നാട്ടുഭാഷയോടൊപ്പം
കരുണം മേയാൻ വിടുന്നു

വരളുമ്പോൾ
നാവിലിറ്റിക്കാൻ
യാത്രയാവുമ്പോൾ
ചെവിയിൽ മൂളാൻ
ചുണ്ടുകളിലൊട്ടി നിൽക്കാൻ
കുറച്ചു വാക്കുകളെ
ഞാൻ ഉപ്പിലിട്ടു
വയ്ക്കുന്നു

10/02/2025

*ബൈ സ്റ്റാൻഡർ / ശിവപ്രസാദ് പാലോട്*

ആശുപത്രിയിൽ
ബൈ സ്റ്റാൻഡർ
ഒരു അന്യഗ്രഹ ജീവി,

ഐസിയുവിൻ്റെ മുന്നിലെ
ഇരുമ്പു കസേരകളിൽ
ഉണ്ടുറങ്ങി,
ഓപ്പറേഷൻ തിയറ്ററിന് മുന്നിൽ
ചെവിയും കണ്ണും ഉന്നം പിടിച്ച്
ഫാർമസിക്കരുകിൽ
നുള്ളിപ്പെറുക്കി,
കാൻ്റീൻ്റെ തിരക്കിൽ
അവരുടെ
വിശപ്പു കെട്ടു പോകും

പരസ്പരം ദൈന്യം
വിളമ്പുന്നവർക്ക്
യുദ്ധത്തടവുകാരുടെ,
സാക്ഷികൂടിൽ
കയറി നിൽക്കുന്ന
പാവയുടെ മുഖഛായ

അവരുടെ ഇരിപ്പോ
നിൽപ്പോ, കിടപ്പോ
ഒരു വേദപുസ്തകത്തിലും
കുത്തിക്കുറിക്കാത്തതിനാൽ
ഉദിക്കാനും
അസ്തമിക്കാനും
സൂര്യനില്ലാതായി പോകുന്നു

ഓർമ്മകളുടെ
കപ്പൽപ്പായകൾ
കാറ്റോ തീരമോ
പിടിക്കുകയേ ചെയ്യുന്നില്ല

കൊഴിഞ്ഞു വീഴുന്ന
ഓരോ നക്ഷത്രത്തെയും
എടുത്തോമനിച്ച്
ആതുരാലയത്തിൻ്റെ
ഘടികാര സൂചികകളെ
ആയാസപ്പെട്ട് തള്ളിനീക്കി

വാർഡുകളിൽ നിന്ന്
മുറികളിലേക്കും
കൂടുതൽ കൂടുതൽ
അത്യാസന്ന നിലകളിലേക്കും
അവർ പറിച്ചു നടപ്പെടുന്നു

ഒരേ സമയം
സ്വയം തിരിഞ്ഞ്
കല്ലു മുള്ളുകളും
ചോരയും ചലവും നിറഞ്ഞ
ഭാഷയില്ലാത്ത
പരിക്രമണ പാതയിലൂടെ
രോഗിയെ
വട്ടം ചുറ്റുന്നു

കൂട്ടത്തിനുള്ളിലും
അവരുടെ പേരുകൾ
ഒറ്റ എന്നു മാത്രമാകുന്നു

01/02/2025

https://www.facebook.com/share/p/14wzUWHyVD/

07/01/2025

വിദ്യാസാഹിതി കവിഭാഷ മാസിക
ലക്കം 29 ചുരുൾ
ദേശീയ അധ്യാപക അവാർഡ് ജേതാവും ചിത്രകാരനുമായ ജിനു ജോർജ് പ്രകാശനം ചെയ്യുന്നു
https://youtu.be/iivnT9PgNSE?si=AptAebhDsSjIrKM
==================
മാസിക ഫ്ലിപ്പ് ബുക്കായി വായിക്കാൻ
https://online.anyflip.com/cdhdf/wowa/mobile/index.html
====================
കവിഭാഷ മാസിക
പത്രാധിപർ:
ശിവപ്രസാദ് പാലോട്
മുഖചിത്രം:
ജിനു ജോർജ്
=====================
രചനകൾ അയക്കാൻ
[email protected]
=====================
പിഡിഎഫ് കോപ്പി ലഭിക്കാൻ
9249857148

25/12/2024

*സമസ്യ*

*ശിവപ്രസാദ് പാലോട്*

പുതിയ പത്രക്കാരനാണ്
ക്രിക്കറ്റ് ബൗളറെ
വെല്ലും കൃത്യതയാണ്

ഒറ്റയേറിന്
പെരുവഴിയിൽ നിന്നും
വാതിൽക്കൽ
വന്നു വീഴും പത്രം

അടുത്ത കാലം മുതൽക്കാണ്
ഇത് സംഭവിച്ചു തുടങ്ങുന്നത്‌

ഏറു തുടങ്ങും നിമിഷം
പത്രം പൊടിഞ്ഞു പൊടിഞ്ഞു
അദൃശ്യമാകുന്നു

കാൽച്ചുവട്ടിൽ
വീഴുമ്പോൾ
ധൂളിയത്രയും
ചതുരവടിവിൽ
നിമിഷാർധം കൊണ്ട്
രൂപപ്പെടുന്നു

യുദ്ധവർണ്ണനയും
വില വർധനയും
പല പൊടി ചേർന്ന്
പ്രധാന വാർത്തയാകുന്നു

അംഗപ്രത്യംഗം വന്നു വീണ്
സുന്ദരിമാരുടെ
പരസ്യച്ചിത്രങ്ങളുണ്ടാകുന്നു

കുന്തിരിക്കത്തിൻ്റെ മണമുള്ള പേജിൽ
ഓരോ അക്ഷരവും വന്നു പിറക്കുന്നു
മരിച്ചയാളുകളെല്ലാം
കണ്ണു തുറക്കുന്നു

ആർത്തു പൊങ്ങുന്ന
പൊടിക്കിടയിൽ
സകലമാന കളിക്കാരും
പേജിൽ വന്നൊട്ടി നിൽക്കുന്നു

എന്താണിങ്ങനെയെന്ന്
ചോദിക്കാനായി
അയാളുടെ അടുത്തേക്കെത്തുന്നതും

അയാളും,
ഹെൽമെറ്റും
വന്ന മോട്ടോർ സൈക്കിളും
അതിൻ്റെ മുരളലും
പൊടിഞ്ഞിറങ്ങി
അപ്രത്യക്ഷമാകുന്നു

നോക്കി നിൽക്കേ
മുറ്റവും
ചവിട്ടിയ കാലും
പൊടിഞ്ഞു തുടങ്ങുന്നുണ്ടോ
എന്ന ശങ്കയിൽ
ധൃതി പിടിച്ചോടിയാണ്
ഇപ്പോളിതെഴുതുന്നത്

എന്നാലും,
പരമാണുക്കളായി
പത്രമിങ്ങനെ
പിരിഞ്ഞു പോവുന്നതെങ്ങനെ?

പിരിഞ്ഞവ ചേർന്ന്
പത്രമാവുന്നതെങ്ങനെ?

പത്രക്കാരനും
മോട്ടോർ സൈക്കിളും
അപ്രത്യക്ഷമായതെങ്ങിനെ?

പൊ
ടി
ഞ്ഞു
പോ
കാ
ത്ത
ഒ
രു
ഉ
ത്ത
രം
പ
റ
യാ
മോ?

24/12/2024

ആദിമാതാവ്
പെറ്റു കൂട്ടി
മണ്ണിലും
വെള്ളത്തിലും.

ഇലയും വേരും,
കാലും വാലും
ചിറകും പല്ലും
ബാലപാഠങ്ങൾ

മുളച്ചും
ചവച്ചും
മേഞ്ഞും
അയവെട്ടിയും
വിഴുങ്ങിയും
തുടർവിദ്യാഭ്യാസം

വേടനു കൊല്ലാനും,
ഇരക്ക് പൊരുതാനും
നീരുംനിണവുമൂറ്റാനും
തൊഴിൽ പരിശീലനം

തമ്മിൽ കൊല്ലാനും
തിന്നാനും,
വാക്കുള്ളവന്,
ഊക്കുള്ളവന്
നിലനിൽപ്പെന്നും
മാതൃ ഭരണഘടന

മക്കളന്യോന്യം
പുലരാൻ മത്സരിച്ച്
വീഴുന്നതും
വാഴുന്നതും

ഒന്നിൻ പരമാണുക്കൾ
മറ്റൊന്നിൽ ചേരുന്നതും
കണ്ടുകണ്ടങ്ങിരിക്കും
മാതൃവിനോദ സംഹിത

വീഴുന്നവയെ
ചീയിക്കുവാൻ
അഗോചര
മാതൃ പരീക്ഷണശാല

ഇതെഴുതുമ്പോൾ വരെ
വായിക്കുമ്പോൾ വരെ

ഞാനും നീയും
കൊന്നും ചത്തും
തിന്നുമിരിക്കുന്നത്

കണ്ടിരിക്കുന്നുണ്ട്
ആദിമാതാവ്,

വെറുങ്ങലിച്ച കാലം
കൊണ്ടുള്ള മെത്തയിൽ

13/12/2024

എകം
=========
ശിവപ്രസാദ് പാലോട്
-----------------
ഒരു കൂട്ടത്തിനകത്താണല്ലോ
എന്ന ആശ്വാസത്തിൻ്റെ
നട്ടുച്ചയിൽ

ചിലപ്പോൾ
മൊബൈലിൽ നിന്ന് മുഖംകോട്ടി
പുഞ്ചിരിച്ചിരുന്നെങ്കിലെന്ന്
ആശിച്ച്
ആശുപത്രി വരാന്തയിൽ
തൊട്ടടുത്തിരുന്നയാളെ
തിരക്കി നോക്കി

യാന്ത്രികമായി
തെല്ലു ഞെരുങ്ങിയിരുന്ന്
അയാൾ അയാളിൽ
മുങ്ങിത്താണു

അടുത്ത സീറ്റിൽ
ലക്ഷ്യമില്ലായ്മയിലേക്ക്
നോക്കിയിരിക്കുന്ന
മുത്തശിയോട്,
കൂട്ടിരിക്കുന്ന
ഒറ്റ നോട്ടത്തിൽ യുവതിയോട്,

തൊട്ടടുത്ത്
നിലയ്ക്കാതെ ചിലക്കുന്ന
ഫോൺ മരത്തിൻ്റെ
ചില്ലയിൽ ചേക്കേറിയ
പെൺകുട്ടിയോട്
കളിപ്പാട്ടമുണ്ണുന്ന കുട്ടിയോട്
പുഞ്ചിരിച്ചതൊക്കെയും
വിഫലം

അത്യാഹിത വിഭാഗവും
ഓപറേഷൻ തീയറ്ററും
മോർച്ചറിയും
അന്യഗ്രഹങ്ങളായി
തിരക്കുപിടിച്ച്
പരക്കം പായുന്നുണ്ട്

പൂന്തോട്ടത്തിലെ
ഓരോ ചെടിയും
ഓരോ പൂമ്പാറ്റയും,
മേൽക്കൂരയിൽ
കുറുകുന്ന
ഓരോ പ്രാവും
വലകെട്ടിയ ചിലന്തിയും
കുടുങ്ങിയ ഇരയും
ഇഴ പിന്നിയ വെയിലും

എല്ലാരും
ഏതു കൂട്ടത്തിലും
ഒറ്റയാണ്

*********

13/12/2024

*വിലക്ക്*
ശിവപ്രസാദ് പാലോട്

*ഒന്ന്*

അനാദിയിൽ
ഓരോ പക്ഷിക്കും
ഓരോ കൂടായിരുന്നു
ഇണചേർന്നും
മുട്ടയിട്ടും
അടയിരുന്നും
വിരിഞ്ഞും പിരിഞ്ഞും
ഓരോരോ കൂടുകൾ

*രണ്ട്*

മരങ്ങളുടെ കുറവ്
മടകളുടെ കുറവ്
നാര്
വേര്
ചുള്ളിക്കമ്പുകളുടെ
ക്ഷാമം
അങ്ങനെയെങ്കിൽ
എല്ലാ പക്ഷികൾക്കും കൂടെ
ഒറ്റക്കൂടെന്ന
ആശയം പറഞ്ഞത്
ദൈവമായിരുന്നു

*മൂന്ന്*

ഇണ ചേരുന്നതിന്
ചേക്കേറുന്നതിനോ
അടയിരിക്കുന്നതിനോ
ഇര തേടുന്നതിനോ
തടസ്സം വരാതിരിക്കാൻ
ആരും സ്വപ്നം കാണാൻ പാടില്ല
കണ്ടുപോയാൽ
പക്ഷി വംശത്തിൽ
നിന്നു തന്നെ പുറത്താക്കും
ദൈവം
നിബന്ധന വച്ചു

*നാല്*

കർമം കൊണ്ട്
അന്ധയായിപ്പോയ
ഒരു പക്ഷി മാത്രം
ഓരോ നിമിഷത്തിലും
സ്വപ്നം കണ്ടുകൊണ്ട്,
ഓരോ തരിയും
നൊട്ടി നുണഞ്ഞുകൊണ്ട്
ഇരിക്കുന്നതുകൊണ്ട്
മറ്റു പക്ഷികൾ
പരാതി ചിലച്ചു

*അഞ്ച്*

അപ്പോൾ
സ്വപ്നത്തിൽ നിന്നുണർന്ന്
പക്ഷി പറഞ്ഞു
ഇണയില്ലാത്തതിനാൽ
ചിറകില്ലാത്തതിനാൽ
വെളിച്ചമില്ലാത്തതിനാൽ
ഞാൻ ദൈവത്തിൻ്റെ
സ്വന്തം പക്ഷി

ഞാൻ ദൈവത്തെ മാത്രം
സ്വപ്നം കാണുന്നു
സ്വപ്നത്തിൽ
ഞാൻ ദൈവത്തോട്
പ്രണയത്തിൻ്റെ മുട്ടയിൽ
അടയിരിക്കുന്നതിന്റെ
ചൂട് ചോദിക്കുന്നു.

ദൈവമെന്നോട്
അവനവനിൽ
ഒളിക്കുന്നതിൻ്റെ
രഹസ്യം മന്ത്രിക്കുന്നു
എൻ്റെ സ്വപ്നത്തിൽ
ദൈവവും
ദൈവത്തിൻ്റെ സ്വപ്നത്തിൽ
ഞാനും വിരിയുന്നു

*ആറ്*

ദൈവകോപം പേടിച്ച്
തൂവലൊതുക്കി
ചങ്കൊതുക്കി
പാട്ടുകളുടെ
നൃത്തങ്ങളുടെ
ആകാശം വിട്ടൊഴിഞ്ഞ്
പക്ഷികൾ
ബാക്കി വന്ന
മൗനത്തെ
കൊത്തി വിഴുങ്ങി

*