04/11/2025
ထရမ့်၏ အခွန်တိုးမြှင့်မှု ရပ်ဆိုင်းခြင်းအပေါ် အာရှနိုင်ငံအစိုးရများနှင့် စီးပွားရေးလုပ်ငန်းများ ကြိုဆို
−−−−−−−−−−−−−−−−−−−−−−−−−−−
အမေရိကန်သမ္မတ ဒေါ်နယ်ထရမ့်၏ နိုင်ငံအများစုအပေါ် မြှင့်တင်ထားသည့် တန်ပြန်အခွန်များကို ရက်ပေါင်း ၉၀ အတွင်း ဆိုင်းငံ့ထားရန် ဆုံးဖြတ်လိုက်ခြင်းအပေါ် အာရှတိုက်နိုင်ငံများရှိ အစိုးရများနှင့် စီးပွားရေးခေါင်းဆောင်များက ကြိုဆိုလိုက်ကြသည်။
သို့သော် တရုတ်နိုင်ငံအပေါ် အခွန်များ ထပ်တိုးချမှတ်ခြင်းကြောင့် ကုမ္ပဏီများနှင့် ငွေကြေးဈေးကွက်များအတွက် မရေရာမှုကို ရှည်ကြာစေမည်ဟု တဆက်တည်း သတိပေးလိုက်ကြသည်။
ကုန်သွယ်ရေးစစ်ပွဲနှင့်ပတ်သက်၍ ဆွေးနွေးရန် ယနေ့ (ဧပြီ ၁၀ရက်) နံနက်ပိုင်းတွင် အာဆီယံစီးပွားရေးဝန်ကြီးများ၏ အစည်းအဝေးကို အွန်လိုင်းမှ ကျင်းခဲ့ကြရာ အစည်းအဝေးကို ဦးဆောင်ကျင်းပခဲ့သည့် မလေးရှားကုန်သွယ်ရေးနှင့် ရင်းနှီးမြှုပ်နှံမှုဝန်ကြီး ဇာဖရူလ်အဇစ်က "ထရမ့်က အခွန်တိုးမြှင့်လိုက်တဲ့အတွက် သေချာတာဘာမှမရှိပါဘူး၊ မရေရာမှုတွေပဲ ဖြစ်လာပါတယ်" ဟု ပြောသည်။
သို့သော် မလေးရှားသည် ဖြစ်ပေါ်လာသော စိန်ခေါ်မှုများအတွက် ဒေသတွင်း ပူးပေါင်းတုံ့ပြန်မှုကို ဆက်လက်ဆောင်ရွက်သွားမည်ဟုလည်း ဇာဖရူလ်အဇစ်က ပြောသည်။
အာဆီယံဘဏ္ဍာရေးဝန်ကြီးများနှင့် ဗဟိုဘဏ်ဥက္ကဌများကလည်း အခွန်ပြဿနာကို ဆွေးနွေးရန် ၂ ရက်ကြာ အစည်းအဝေးကို ကွာလာလမ်ပူမြို့တော်၌ ဒုတိယမြောက်နေ့အဖြစ် ယနေ့တွင် ကျင်းပလျက်ရှိသည်။
"သမ္မတ ဒေါ်နယ်ထရမ့် ကြေညာခဲ့တဲ့ နိုင်ငံအများစုအတွက် အခွန်တိုးမြှင့်မှုကို ရက်ပေါင်း ၉၀ ရပ်ဆိုင်းလိုက်တာ ကြိုဆိုပေမယ့် လက်ရှိ အခြေခံအခွန် ၁၀ ရာခိုင်နှုန်းနဲ့ တရုတ်နိုင်ငံအပေါ် ၁၂၅ ရာခိုင်နှုန်းအခွန်များက မလေးရှားအပါအဝင် ကမ္ဘာ့စီးပွားရေးနှင့် ကုန်သွယ်ရေးကို ထိခိုက်စေဦးမှာပါ။ ဒီမတည်ငြိမ်မှုက အာဆီယံနိုင်ငံများအတွက် စိန်ခေါ်မှုတွေကို သိသိသာသာ ဖြစ်ပေါ်စေပါတယ်”ဟု ဇာဖရူလ်က Nikkei Asia သို့ ပြောသည်။
"ဖြစ်ပေါ်လာမည့် စိန်ခေါ်မှုများအတွက် ဒေသတွင်းနိုင်ငံများအကြား ပူးပေါင်းညှိနှိုင်း တုံ့ပြန်မှုတစ်ခုကို အာဆီယံလုပ်ဖော်ကိုင်ဖက်များနဲ့အတူ ဆက်လက်လုပ်ဆောင်သွားပါမယ်။ အာဆီယံစည်းလုံးညီညွတ်မှုနဲ့ ဒေသတွင်းစီးပွားရေးပေါင်းစည်းမှုဟာ ယခင်ကထက် ပိုမိုအရေးကြီးလာမှာဖြစ်သလို ဒီလိုအမြင်မျိုးရှိပြီး ဒေသရဲ့ ဖွံ့ဖြိုးတိုးတက်မှုကို တွေ့မြင်လိုတဲ့ မိမိတို့ရဲ့ မိတ်ဖက်တွေဆီက ပံ့ပိုးကူညီမှုတွေကို ကြိုဆိုနေပါတယ်" ဟု ပြောသည်။
ထရမ့်၏ အခွန်မြှင့်တင်မှုကြောင့် အာရှဒေသနိုင်ငံများသည် ကုန်သွယ်ရေးကို တရုတ်နိုင်ငံသို့ ဦးလှည့်နေကြောင်း Nikkei Asia သတင်းတစ်ပုဒ်တွင် ဖော်ပြထားသည်။
ကမ္ဘာ့ကုန်သွယ်မှုများကြောင့် လျင်မြန်စွာ ဖွံ့ဖြိုးလာသော အရှေ့တောင်အာရှနိုင်ငံများသည် မကြာသေးမီနှစ်များအတွင်း တရုတ်နိုင်ငံနှင့် စီးပွားရေး ဆက်ဆံမှုများကို မြှင့်တင်လာခဲ့ကြသည်။
ထိုင်း၊ ဗီယက်နမ်နှင့် မလေးရှားနိုင်ငံတို့က တရုတ်နှင့် ဆက်သွယ်မည့် ဒေသတွင်း ရထားကွန်ရက်တစ်ခုကို တည်ဆောက်ရန် လုပ်ဆောင်နေကြသည်။ သမ္မတထရမ့်၏ ပထမသက်တမ်းအတွင်းကလည်း အလားတူ အခြေအနေမျိုးဖြစ်ပေါ်ခဲ့သည်။
တရုတ်နိုင်ငံသည် တည်ငြိမ်ဖွံ့ဖြိုးသောလမ်းကြောင်းပေါ်တွင် ရှိချိန် အမေရိကန်နိုင်ငံသည် ၂၀၁၇ ခုနှစ် ထရမ့် ရာထူးစတင်ယူပြီး မကြာမီတွင် Trans-Pacific Partnership မှ နုတ်ထွက်ခဲ့ခြင်းဖြင့် လွတ်လပ်သော ကုန်သွယ်ရေးကို ကျောခိုင်းခဲ့သည်။
International Trade Center ၏ အဆိုအရ ဂျပန်၊ တောင်ကိုရီးယား၊ ထိုင်ဝမ်၊ အိန္ဒိယနှင့် အရှေ့တောင်အာရှနိုင်ငံများ အပါအဝင် နိုင်ငံနှင့် ဒေသ ၁၃ ခုမှ တရုတ်နိုင်ငံသို့ ပို့ကုန်သည် ၂၀၂၀ ပြည့်နှစ်အထိ ၄နှစ်အတွင်း ၃၃ ရာခိုင်နှုန်း တိုးတက်ခဲ့သလို အမေရိကန်သို့လည်း ၂၅ ရာခိုင်နှုန်း တိုးတက်ခဲ့ကြောင်း ဖော်ပြထားသည်။
သို့သော် သမ္မတဟောင်း ဘိုင်ဒင်အစိုးရလက်ထက်တွင် တရုတ်နိုင်ငံနှင့် ကုန်သွယ်မှုအပေါ် အမေရိကန်ကတင်းကျပ်သော ကန့်သတ်ချက်များနှင့် တရုတ်နိုင်ငံ၏ အိမ်ခြံမြေဈေးကွက် ပျက်စီးမှုတို့ကြောင့် ဒေသတွင်းနိုင်ငံများမှ အမေရိကန်သို့ ပို့ကုန်သည် တရုတ်နိုင်ငံသို့ ပို့ကုန်ထက် လျင်မြန်စွာ ပြန်လည်တိုးတက်ခဲ့သည်။
ထရမ့် ရာထူးသို့ ပြန်လည်ရောက်ရှိလာသောကြောင့် အာရှ၏ကုန်သွယ်မှုသည် တရုတ်နိုင်ငံသို့ ပြန်လည် အာရုံစိုက်သွားခြင်း ဖြစ်နိုင်ကြောင်း Nikkei Asia သတင်းတွင် သုံးသပ်ထားသည်။
ပုံစာ − ထိုင်ဝမ်နိုင်ငံ၊ တိုင်ပေမြို့ရှိ ထိုင်ဝမ်စတော့အိတ်ချိန်းရုံးအတွင်း စတော့ရှယ်ယာ တန်ဖိုးများ လေ့လာနေသူတစ်ဦးကို တွေ့ရစဉ်။ ဓာတ်ပုံ EPA
