04/03/2025
မာယာရထားမောင်းတဲ့မိန်းမ ရုပ်ရှင်ကားကြီး
Now Show
မာယာရထားမောင်းတဲ့မိန်းမ (၂၀၂၅)
တချို့ပန်းတွေဟာ ဆူးနှင်းဆီလို မာယာများတယ် ... ဒီရုပ်ရှင်ထဲက အမျိုးသမီး(၄)ယောက်ကလည်း အဲဒီလိုပဲ .... မာယာတွေ ဆူးတွေ အဆိပ်တွေ လျှို့ဝှက်ချက်တွေများတယ် ...
အဲလို မာယာများတဲ့ ဆူးနှင်းဆီနဲ့ ပန်းပွင့်တွေကို ရထားတစ်စင်းပေါ်မှာ တင်ပြီး ခေါ်ဆောင်သွားတဲ့အခါ အဲဒီ မာယာရထားကို ခုတ်မောင်းမယ့် သူဟာ ဘယ်သူဖြစ်မလဲ ...
🚂 မာယာရထားရဲ့ ရာဇ၀င်
ဒီရုပ်ရှင်ကို စမကြည့်ခင်တည်းက ဒါရိုက်တာကို သူမတူတဲ့လက်ရာ ဖန်တီးထားမယ်မှန်း ခန့်မှန်းမိပေမယ့် တကယ်တမ်းကြည့်ချိန်မှာ ခန့်မှန်းတာထက် ပိုပြီး တော်လွန်းနေတယ်ဆိုတာကို ဇာတ်လမ်း ဇာတ်ညွှန်း သူ့ရဲ့ဒါရိုက်တာပညာမှာတင် တထစ်ချ ယုံကြည်သွားတယ် သဘောလည်းကျသွားတယ် ...
ရုပ်ရှင်နာမည်နဲ့ လိုက်ဖက်အောင်ပြောရရင် ဒါရိုက်တာဟာ ကွေ့ကောက်မှု ၊ လှည့်ဖြားမှု ၊ ကူးပြောင်းမှုများတဲ့ မာယာရထားကို စနစ်တကျနဲ့ ဦးဆောင်ခုတ်မောင်းသွားခဲ့တယ် ...
ကင်မရာအယူအဆ ဒါရိုက်တာပညာကို ကျွန်တော့်အနေနဲ့ အပြည့်အ၀နားမလည်သော်ငြား အများနဲ့မတူ တမူထူးခြားတဲ့ ရှုထောင့်ကနေ မာယာပန်းပွင့်တွေကို လှလှပပ ရိုက်ပြထားတယ်ဆိုတာ ခံစားမိတယ် ....
နောက်ထပ်ထူးခြားမှုက ဇာတ်ကောင်ကာရိုက်တာတွေရဲ့ မျက်နှာတွေ မျက်လုံးတွေ ခံစားမှုတွေကို ကြည့်ရှုခံစားသူ မြင်သာအောင် close upဆွဲပြီး အနီးကပ်အနေနဲ့ ဇာတ်၀င်ခန်းအများစုကို ရိုက်ပြထားခြင်းပါပဲ
ဇာတ်လမ်းအနေနဲ့ ပြောရမယ်ဆိုရင်လည်း ဟာကွက်မရှိဘဲ ခန့်မှန်းမရတဲ့ မာယာများတဲ့ မိန်းကလေးတစ်ယောက်နဲ့ ရထားစီးရသလို ခံစားချက်မျိုးကို ပေးစွမ်းပါတယ် ...
ဇာတ်ညွှန်းမှာတော့ လူငယ်ဆန်ဆန် ထိထိမိမိ တစ်ခွန်းဆိုတစ်ခွန်း hypeဖြစ်နေတဲ့ ဒိုင်ယာလောခ့်တွေက ကျွန်တော့်ရင်ထဲ ဖြတ်သန်းခုတ်မောင်းသွားတယ် ....
ခန့်မှန်းရရင်တော့ ဒီရုပ်ရှင်က ဇာတ်ညွှန်းနဲ့ဒါရိုက်တာဆုကို အကယ်ဒမီ ရင်ခုန်ဖို့ သင့်တော်သောပါပဲ ....
🚂 မာယာရထားတစ်စီးပေါ်က လျှို့ဝှက်ချက်ကိုယ်စီနဲ့ အမျိုးသမီးတစ်စုအကြောင်း
သူဇာဘုန်းမြင့် (ထက်ထက်မိုးဦး)🥀
သူဇာဘုန်းမြင့်ရဲ့ ကာရိုက်တာကို စကြည့်ခါစမှာ
အဖြည့်ခံ ဇာတ်ပို့အနေနဲ့လို့ တွေးလိုက်မိပေမယ့်
အဓိက tempo မြင့် ဇာတ်၀င်ခန်းတိုင်းမှာ သူဟာ လျှို့ဝှက်ချက်များစွာနဲ့ ခန့်မှန်းမရတဲ့ သူဇာဘုန်းမြင့်ဖြစ်ခဲ့တယ် ...
ရုပ်ရှင်တစ်ခုလုံးမှာ အကြိုက်ဆုံးကတော့ သူ့ရဲ့ flashback အခန်းတွေပါပဲ ၊ အကယ်ဒမီရ ဝါရင့်မင်းသမီးကြီးဖြစ်တဲ့အတိုင်း သူ့ကာရိုက်တာကို အကောင်းဆုံးဆိုတာထက် ပိုအောင် မျက်နှာအမူအရာ မျက်လုံးအကြည့် အငြိမ် အလှုပ် သရုပ်ဆောင်ခြင်းအတက်ပညာကို ပါးပါးလေးနဲ့ပြပြီး မာယာရထားကို ဦးဆောင်ခုတ်မောင်းသွားတယ် ...
နရဏီ (အိချောပို) 🥀
ဒီဇာတ်လမ်းရဲ့ စတင်ဦးတည်ရာ ဘူတာဆီကို မာယာရထားနဲ့ ခုတ်မောင်းသူတွေထဲက ဆူးပန်းပွင့် တစ်ယောက် ...
ညှို့အားပြင်းတဲ့ သူ့အလှကို နရဏီကာရိုက်တာနဲ့ တွဲစပ်လိုက်တဲ့အခါ မာယာရနံ့တွေ ထုံမွှမ်းပြီး
ဆူးတွေနဲ့ ထိုးနှက်မယ့် ပန်းတစ်ပွင့်နေရာဟာ တော်တော့်ကို ထပ်တူညီသွားပါတယ် ...
နရဏီရဲ့ မာယာဆူးတွေဟာ ဘယ်သူတွေအတွက် ထိုးနှက်မှုအနေနဲ့ ဖြစ်ပေါ်လာတာလဲ...
ခင်နန်းဘုံ (နန်းဆုဦး) 🥀
ဖြူစင်တဲ့နှင်းဆီမှသည် နီရဲသော လှပသော ချွန်ထက်သော နှင်းဆီနီတစ်ပွင့်ကို အသွင်ကူးပြောင်းသွားတဲ့ မာယာရထားပေါ်က အမျိုးသမီးတစ်ယောက် ...
သရုပ်ဆောင်ကောင်းလို့ သူ့ရုပ်ရှင်များစွာကို မျှော်တဲ့သူထဲမှာ ကျွန်တော်ပါပါတယ် ၊ မျှော်ရကျိုးနပ်အောင် သူ့အလှ သူ့အိုက်တင် နှစ်ခုပေါင်းပြီး ခင်နန်းဘုံအဖြစ် ပြသသွားတယ်...
မေရှား ( ရွှေအိမ်စည် )🥀
နရဏီဆိုတဲ့ ဆူးပန်းတစ်ပွင့်နဲ့အတူ မာယာရထားပေါ်ကို လိုက်ပါခဲ့သူ နက်စွေးနေတဲ့ နှင်းဆီလို အမျိုးသမီးတစ်ယောက် ...
ရွှေအိမ်စည်ကို သဘောတကျဖြစ်တဲ့အထဲမှာ အရင်က ကျွန်တော်မပါခဲ့ပါဘူး ၊ မေရှားကာရိုက်တာကို ကြည့်ပြီးနောက်မှာတော့ စိတ်ပါလက်ပါ လက်ခုပ်တီး ဂုဏ်ပြုမိတယ် ....
" ကျွန်မရှင့်ပါးကို ပြန်မရိုက်ဘဲ ရှင့်နှလုံးသားကို ပြန်ရိုက်ပြမယ် " ဆိုတဲ့ ခပ်မိုက်မိုက် ဒိုင်ယာလော့ခ်လို စကားအများကြီးကို ပြောရင်း သူ့ရဲ့အလှကောက်ကြောင်းကို မေရှားအမူအရာနဲ့ တွဲလို့ ဗီလိန်ဆန်ဆန် ကာရိုက်တာတစ်ခုနဲ့ သူက သရုပ်ပြသွားတယ် .....
တေဇာဘုန်းမြင့် (ရဲရင့်အောင်) 🚂
မာယာများတဲ့ အမျိုးသမီး(၄)ဦး ရထားတစ်စင်းပေါ်မှာ ခုတ်မောင်းရင်း ဦးတည်နေတဲ့ လားရာက ဘူတာရုံလို အမျိုးသားတစ်ယောက် ...
မိန်းမတွေရဲ့ မာယာထက် ယောင်္ကျားတွေရဲ့မာယာက ပိုကြောက်စရာကောင်းတယ်ဆိုတာကို သူက ပေါ့ပေါ့ပါးပါးပဲ ရပ်တည်ပြသွားတယ် ...
ဒေါ်ခင်ခင် ( မေသဉ္ဇာဦး ) 🥀
မာယာရထားပေါ်မှာ သာမန်ခရီးသည်အနေနဲ့ လိုက်ပါစီးနင်းသူတွေထဲက အမျိုးသမီးတစ်ယောက် ...
သူ့ကာရိုက်တာက မထူးခြားသလိုလိုနဲ့ မာယာရထားပေါ်မှာ စီးနင်းလိုက်ပါသူပီပီ မာယာလှည့်ကွက်တစ်ခုကို သူက လုပ်ပြသွားတယ် ...
ရုပ်ရှင်ရဲ့ ၄ပုံ ၁ပုံတောင် သူ့ဇာတ်၀င်ခန်း မပါပေမယ့် ပါတဲ့ ဇာတ်၀င်ခန်းတိုင်းမှာ အကယ်ဒမီဇာတ်ပို့ဆုရ မင်းသမီးကြီး ပီသစွာ စီးမြောသွားတယ် ...
🚂 ရထားပေါ်က မာယာသီချင်းသည်
ဒီရုပ်ရှင်မှာ အဓိကအသက်လိုဖြစ်တဲ့ ဇာတ်၀င်တေးကို ဇာတ်နဲ့ လိုက်ဖက်စွာ တေးရေး ကိုမိုးမိုးက ရေးပြီး တင်ဇာမော်က သီဆိုတင်ဆက်သွားခဲ့တယ် ...
ဇာတ်ရဲ့မြှုပ်ကွက်နဲ့ ဇာတ်၀င်တေးကို ယှဉ်တွဲပြထားတာဟာ အလွန်လှပသော တင်ဆက်မှုပါပဲ ...
🚂 မာယာဆန်သော ကူးပြောင်းမှု
ဇာတ်လမ်း ဇာတ်ညွှန်း ဒါရိုက်တာ မင်းသားမင်းသမီး အကုန် ဘယ်လောက်ကောင်းကောင်း editor သတ်ရင် အားလုံး အနိစ္စရောက်ပါတယ် ...
ဒီရုပ်ရှင်ရဲ့ Editor က အရှေ့မှာ ဒါရိုက်တာ မင်းသားမင်းသမီးတွေရဲ့ ကောင်းမွန်မှုကို သူ့ရဲ့ပညာနဲ့ ထပ်ပေါင်းပြီး တမူထူးခြားအောင် လူငယ်ဆန်အောင် ဇာတ်နဲ့လိုက်အောင် တည်းဖြတ်ထားတာဟာ ပစ်ရက်စရာမရှိ အနိစ္စမရောက်ဘဲ နိဗ္ဗာန်ကို ရောက်စေခဲ့ပါတယ် ...
အလှည့်အပြောင်းကောင်းတဲ့ ဒါရိုက်တာရိုက်ချက်တွေကို မာယာဆန်တဲ့ ပြကွက်နဲ့ တည်းဖြတ်မှုပါပဲ ...
အဆုံးသတ်အနေနဲ့ ပြောရရင်တော့ ဒီရုပ်ရှင်ဟာ
ထုတ်လုပ်ရေး ၊ ဒါရိုက်တာ ၊ ဇာတ်လမ်း ၊ဇာတ်ညွှန်း မင်းသားမင်းသမီး အစစအရာရာ မြိုင်မြိုင်ဆိုင်ဆိုင်နဲ့ အားထုတ်ပြီး ရိုက်ကူးတင်ဆက်ထားလို့ သင့်အတွက် အချိန်ကုန် ငွေကုန်ရကျိုးနပ်စေမယ့် ရုပ်ရှင်တစ်ကားဖြစ်ပါတယ်...
မာယာရထားမောင်းတဲ့မိန်းမရုပ်ရှင်ကို Personal Rating နဲ့ပြောရရင်
Story Script 9/10
Director 8/10
Actor Actress 9/10
Overall အနေနဲ့ဆိုရင် 9/10 ပါ
ထုတ်လုပ်ရေး - လာဗင်ဒါ
ဇာတ်လမ်း ဇာတ်ညွှန်း ဒါရိုက်တာ - ရာဇ၀င်ကို
သရုပ်ဆောင်များ - ရဲရင့်အောင် ၊ ထက်ထက်မိုးဦး ၊ အိချောပို ၊ နန်းဆုဦး ၊ ရွှေအိမ်စည် ၊ မေသဉ္ဇာဦး ၊ ရဲအောင် ၊ စိုင်းစည်တွမ်ခမ်း ၊ ချမ်းမင်းရဲထွဋ်နှင့် သရုပ်ဆောင်များစွာ
#မာယာရထားမောင်းတဲ့မိန်းမ
#၂၀၂၅ရုံတင်ရုပ်ရှင်များ
