13/07/2026
BA LAHLELA MAJOE KA HOLIM’A NTLO EA MOO A ROBILENG MONAKELI KA HO EONA
'Maboitumelo Mononela - Thaba-Tseka
Kapoko Kapoko (53) oa Linokong Mohlanapeng Thaba-Tseka, o hlahile Lekhotleng la 'Maseterata Thaba-Tseka, ka la 07 Phupu 2026; a qosoa ka polao ea motho.
O theohetse ka Setsing sa Tlhabollo ea Batšoaruoa, 'me o tla boela khotla ka la 21 Phupu 2026.
Puisanong le Detective Police Constable ( D/P/C ) Tšepo Nkholi ho hlaha Ofising ea Mafokising Thaba-Tseka, o re ofisi ea habo e fumane tlaleho ka mohala, e re Linokong ho na le motho ea bonoang ka lilomong, ka la 14 Phuptjane 2026.
A re ba ile ba potlakela sebakeng seo, ba fumana monna (25) lilomong tseo e se e le mofu. O re ka mor'a ho mo ntša, ba fumane h**e o na le leqeba le bulehileng phatleng.
D/P/C Nkholi a re ba ile ba isa mofu 'moshareng, ’me lipatlisiso tsa thakholoa, ke moo li utullotseng h**e bosiung ba la 13 Phuptjane 2026, mofu le motsoalla’e ba ne ba tsoa mothamahaneng.
A re bao ba ile ba pota moo moqosuoa a neng a chaketseng teng, a le bothoba-pelo ho na moo Linokong.
O re ba ile ba nyarela ka moo moqosuoa a leng ka teng, ba ba ba akhela majoe ka holim'a ntlo. A supa h**e moqosuoa o ile a tsoa a ba lelekisa empa ba mo siea, moo pelaelo e leng h**e o lemetse nakong eo.
O re letsatsi le hlahlamang, moqosuoa ha a feta lilomong tseo, a hlokomela h**e ho na le motho ea oeleng ka moo, eaba o hlaba mokhosi.
Sub-Inspector (Sub-Insp) Sechaba Letima o re tšebeliso e mpe ea tai, ke sesosa litlolong tsa molao tse ngata, ka ho na o ipiletsa ho basebelisi ba tai, ho ela hloko lintho tse ka ba behang tlokotsing ha ba noele.
