23/06/2025
Woraanni Addunyaa sadaffaan tartiiba humnaa amma jiruun ni ka’a jedhanii tilmaamuun ulfaataadha.
Waraana Addunyaa III kan fiduu danda’u: Wol-waraansa Russia, Ameeriika, Biyyota NATO, fi China hirmaachisuudha.
Fakkenyaaf, NATO’n otoo Ukraine irra goree Russia haleeluu jalqabe, ykn Russian biyyoota NATO isiif dhihoo jiran kan akka Norway ykn Finland weerartee; yeroma wolfakkaataa kana China-n ammoo Taiwan deeffadha jettee weerartee, Ameerikaan weerara China san dhaabsisuuf seentee— NATO (fi Ameerikaan) cinaa tokkoon— Chaayinaa fi Russian ammoo dirqama woliin ta’anii lolu.
Gaafas Kim Jung Un-iin (Kooriyaa Kaabaa) ganama itti aanu Kooriya Kibbaa fi Japan irratti misaa’eela darbachuu jalqabaa. Israa’eel ammoo haalli “Israa’el Guddittii” tolchuuf mijatu dhufe jettee Cairo fi Amman, Damasaqoo fi Beirut bombiin haleelti.
Deebiin cimaan Israa’eliif kennamuu yoo jalqabu, Ameerikaan Israa’el irra gortee haleelti. Paakistanii fi Hindi —Kaashmir dhuunfachuu irratti akka wol haleelaan worri woraana seene, eennu lolee innu dhiisaan, itti dhiibu.
Hanga dubbichi cimuuf—Türkiyen otoo jidduma deddeemaa dhiisaa jettuu; deebii Kooriyaan Kibbaa fi Japan Kim Jung Uniif deebisaniin— gurbaan aariin magala takka irratti jarjaree niwukulaaraa fayyadamuu danda’a. Afrikaa fi Ameerikaa Kibbaa keessatti fincilli adda addaa mootummoota irratti ka’e gara wolworaansaa deema.
San booda humni woraanicha dhaabu hin jiru. Qaroomni ilma namaas bilaasha ta’a. Worri qabeenya qabu dursee gara New Zealand, kan hin qabne ammoo manuma isaa taa’ee hiree eeggata. Qaalayinsii ni hammata. Wonti maallaqa jedhamu gatii dhaba. Woraanaan qixa beelli nama fixa. San booda worri hafu, jaarraa tokko duuba deebi’ee waan kana hunda akka haarawaatti tolchuuf xaara.
Garuu biyyi woraanni akkasii haa ka’uu barbaaddu, ykn namoonni siyaasaa waan akkasii fedhan erga ammaa hin muldhanne. Kanaaf, ammaatti haaloota gara Woraanni Addunyaa sadaffaa geessuu danda’antu muldhachaa jira malee, waaranicha irraa namni ykn biyyi fedha qabdu hin jirtu. Garuu gaafa Chayinaan Taiwan weerarte fi gaafa Russian biyyoota NATO weerarte, haalli woraanichi akka jalqabetti ilaaluu dandeenya. Ammaaf fataa jedhaa, waraanichi fagoo jira!
