01/02/2025
SERETO SA KGOŠI SEKHUKHUNE WA MATHOMO.
1. Ke Phaswa a makwa o retwa matebeleng,
O retwa ke Kgetša Moshabane a Maredi,
Morwa Mmamagase a Tšate,
A swara Phaswa ka tsebe a re,
Shala o bona motse wa Ledimo ke owe,
Oa bona motse ke tšhidi nkokoto.
2. Babang ba senyetša Theledi motse,
Ba tšea motse wa Ledimo ba o bea seboka,
Mampša a Ledimo setla selelekwa,
Morwa Loisa a Rakau,
Hlwaela - manyama,
Pitsi ya ngwana Phala sekatani,
Pitsi e šupa e šupile batho ka lešika,
Ngwaritsi a lefa kane.
3. Maru a mang a iša batho Mašegerepe,
Mola ba bona Sekwati a tswetše tau ya segafa,
Tau ya Sekwati ke hlatša marega,
Selemo se tlago kea gafa gafa,
Ke thopa dikgomo bashemane ba dišitje,
Makgatha a tšona ka nša nathamagana,
Ke nšitše nama e botse lehlakori.
4. Se seilego borwa se ka se ntšhite,
Ke tlo šitwa ke se seilego ka Madimatle moleteng wa ditau,
Gomme ke tlo tšea kotse ka di latela,
Kgomo tša phaphathela ka mabje thamaga,
Kua ga Phaahla di bolokwa letshadibja,
Le maratswana a go monwa.
5. Mapogo Letebele,
A o nthibela tsela leeto,
Afa oa ekwa ye e dijago,
Yona tau ya mathula dipitsi Bokone,
Yona tšhitšhila manyama?
6. Ka Borwa ke lle sehlana,
Ka re go ja ka gafela manong,
Ke gafetše diphiri tša tatago ngwanana Nkhumelo,
Ka ja le maratswana,
Ka re go ja ka pharela mereba,
Ka ba ka kona le mong wa mogopo,
Ke tloga ke konne rakgadi Mošopjadi Lekgolane la ga Molefe.
7. Hee wene Kgoputšo moja lodi,
Ge o lle pududu,
Nna ke lle ya mampampa theledi,
Phaahla a Bauba o letše a mputjisha boshego a re,
Ebago leina la gago la bogale o mang? Phomelelo Simon Mokibelo Malatjie
Ka na ka ena ka re,
Ke koma selaiwane koma selaiwa Moletši o mogolo wa Mabokanyane,
Kua ntshe ke itše ka hlaba waka sorong la kgoro,
Waka aba a wa matshomane,
Yake o lle ke pheko tša motse wowe.
8. Mohlang wola wa mohlo mogolo,
Ke epa magobotla,
Ke epile kgwadi-gwadi mapono ba wela ka ntshe,
Ka ba kwena sekati ka ba kata.
9. Mohlang wola Leolo e tsoga e etela mosego,
Ka ba tšhatšha khubedu mogatša kogola kae,
Kare fagahla-fagahla,
Noko dia tsogo go tsogile hlabana tša naga medumo.
10. Nna Maphikološe a matswaka la mabu Theledi a Marota,
Theledi ka Borwa o tšo senya Theledi a Marota,
Ke masenyeletše a Matuba mosenya magadi a batho.
11. Tšhukatswana mphatana lena madira tšhabang,
Tšhabang mantsokodi a etla,
Ke mantšana a lehlokwa sehwirihwiri semano,
Mphiri moloma serethe ke tatago ngwana-Mohube,
Ke sebolai sa matuba ntšee ka manaka dia lla,
Theledi a kgala-ntlole mešito,
Theledi a kgala-ntlole makwa.
12. Ke mogale ge a gatiša ka lekopelo,
Ke Mašile a bo-Diphale šibašiba sebatana,
Tlou kgolo dia gatana.
13. Lena ba mahlaka a makoro,
Ge le hloma nkutu nkutu,
Lekutu ke eng mole lekutu e le nna,
Ke tiba ka hlako gwa tiba nyekelele,
Kwa ga-Mahlaku a makoro.
14. Manaka difiša-seatla mashile a bo-Diphala,
O re gagešu ga re tsotsoropege rea purunkela,
Go tsotsoropega ke go lahla marumo,
Ke matopo a motšhobo a ga Moselekatsi.
15. Nokana ya Bakgatla ke nokana mang,
Ke nna ke moretele a noka ke retetše,
Ke reteletše Maburu a ga Jobere,
Ke tlilo retelela le masole a ga Ramapantane.
16. Bošego nka robala boroko,
Ga ke sa tlo lora Ramapantane,
Gobane tšhošwane tše tšweu,
Tše tšhweu bjalo ka yena dia moloma...
