13/07/2025
Bou ’n nalatenskap! – Só lui vanjaar se tema van die KragDag 2025 ekspo.
In ‘n tyd van krisisse en onsekerheid, is daar plekke waar hoop geplant en oplossings gevier word. KragDag 2025, die inspirerende selfstandigheid-ekspo, nooi mense van alle ouderdomme om van 7 tot 9 Augustus 2025 na die Diamantvallei Landgoed buite Pretoria te kom – om saam te geniet, saam te leer en saam ‘n nalatenskap te vestig.
Met die tema “Bou ’n Nalatenskap” wil KragDag elke besoeker, gesin, boerdery en onderneming inspireer en toerus vir huishoudelike selfstandigheid, dade van gemeenskapsbou, die aanpak van roepingsgedrewe inisiatiewe en die ontginning van selfstandige oplossings wat ‘n blywende impak op komende geslagte sal hê.
“By KragDag glo ons dat ’n nalatenskap nie iets is wat jy eendag agterlaat nie, maar iets wat jy vandag reeds bou,” sê HP Steyn, bestuurshoof van KragDag. “Om te bly en te bou, vereis geloof, visie en aksie – nie net vir onsself nie, maar vir geslagte wat kom. KragDag is die plek waar daardie besluit konkretiseer.”
By verlede jaar se KragDag ekspo het 660 ondernemings uitgestal en is dit oor die vier dae bygewoon deur 34 000 ekspodeelnemers – ‘n kragtige bewys dat daar ‘n groeiende behoefte is aan onafhanklike oplossings, vryheidsgerigte denke en volhoubare gemeenskapsontwikkeling.
KragDag word vanjaar vir die eerste keer deur ‘n indrukwekkende span vaandelborge ondersteun, bestaande uit Sakeliga, NEASA, City Gates, die AP Akademie, PretoriaFM, KingPrice en ontbytSAKE, wie dit moontlik maak om die ekspo op luisterryke wyse aan te bied. Hierdie organisasies deel ’n visie van selfstandigheid, vryheid en verantwoordelike toekomsbou.
Die ekspo se uitstallings is gerig op bestandheid teen risiko’s veroorsaak deur die staat en ‘n vryheidsgevulde alternatiewe lewenstyl met fokusareas soos alternatiewe energie, waterbestuur, onafhanklike onderwys, veiligheid, jag en buitelewe, selfdoenoplossings, entrepreneurskap, implemente en gereedskap, ‘n volledige landbou-ekspo en gemeenskap- en diensorganisasies. Met opvoedkundige aktiwiteite vir kinders, ‘n kopskuifateljee, demonstrasies en gemeenskapskuierareas, bied KragDag ‘n unieke ervaring vir die hele gesin.
In 2025 bou jy nie net aan jou eie nalatenskap nie – jy help ook bou aan ’n monument vir Afrikaanse hoër onderwys. Vanjaar skenk KragDag R5 van elke kaartjie wat verkoop word aan die Akademia Skenkingsfonds, vir die oprigting van Akademia se nuwe kampus in Pretoria-Oos. Só maak elke besoeker se deelname ‘n konkrete verskil vir geslagte wat kom.
Besoek www.kragdag.co.za vir kaartjies, programinligting en hoe jy kan deel wees van ‘n beweging wat nie net praat van verandering nie – maar dit aktief leef, bou en oordra om die gang van die geskiedenis te verander.
Boermedia sal ook daar wees en deurlopend verslag doen om diegene wat nie daar kan wees nie dmv ons regstreekse uitsendings deel van KragDag te maak.
https://tickets.tixsa.co.za/event/kragdag-ekspo-2025
