Yunews യൂന്യൂസ്

14/08/2025

ഏവർക്കും സ്വാതന്ത്ര്യ ദിനാശംസകൾ
🧡🤍💚

07/08/2025

ഇന്ന് ദേശീയ കൈത്തറി ദിനം. രാജ്യത്തിന്റെ സാമൂഹിക സാമ്പത്തിക വികസനത്തിന് കൈത്തറി വ്യവസായത്തിന്റെ പ്രാധാന്യത്തെക്കുറിച്ച് അവബോധം സൃഷ്ടിക്കുക എന്ന ലക്ഷ്യത്തോടെ 2015 ജൂലൈയിൽ കേന്ദ്ര സർക്കാർ ഓഗസ്റ്റ് 7 ദേശീയ കൈത്തറി ദിനമായി പ്രഖ്യാപിച്ചു. ബ്രിട്ടീഷ് സർക്കാറിന്റെ ബംഗാൾ വിഭജനത്തിനെതിരെ പ്രതിഷേധിച്ച് 1905-ൽ കൽക്കട്ട ടൗൺ ഹാളിൽ ആരംഭിച്ച സ്വദേശി പ്രസ്ഥാനത്തിന്റെ സ്മരണയ്ക്കായാണ് ഓഗസ്റ്റ് 7 ദേശീയ കൈത്തറി ദിനമായി തിരഞ്ഞെടുത്തത്. ആഭ്യന്തര ഉൽപ്പന്നങ്ങളും ഉൽപാദന പ്രക്രിയകളും പുനരുജ്ജീവിപ്പിക്കുക എന്നതായിരുന്നു ഈ പ്രസ്ഥാനത്തിന്റെ ലക്ഷ്യം.

രാജ്യത്തിന്റെ മഹത്തായ സാംസ്കാരിക പൈതൃകത്തിന്റെ പ്രതീകവും രാജ്യത്തെ ഒരു പ്രധാന ഉപജീവന മാർഗ്ഗവുമാണ് കൈത്തറി മേഖല. കൈത്തറി നെയ്ത്തുകാരുടെയും അനുബന്ധ തൊഴിലാളികളുടെയും 70%-ത്തിലധികവും സ്ത്രീകളായതിനാൽ ഈ മേഖല സ്ത്രീ ശാക്തീകരണത്തിന് പ്രധാനവുമാണ്.

06/08/2025

മരുഭൂമിയിൽ വഴിതെറ്റിപ്പോകുന്ന യാത്രക്കാരെ, ജലസ്സ്രോതസുകളിലേക്ക് വഴിതിരിച്ചുവിടുന്നതിനായി സൗദി അറേബ്യ, അൽ നഫുദ് മരുഭൂമിയിൽ സൗരോർജ്ജ ലേസർ ബീക്കണുകൾ പ്രവർത്തനം ആരംഭിച്ചു.

04/08/2025

കോഴിക്കോട്: നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ ഒരുപറ്റം ശാസ്ത്രജ്ഞർ മാരകമായ സെപ്സിസ് അണുബാധകൾ വേഗത്തിൽ കണ്ടെത്താനും ചികിത്സാ ഫലങ്ങൾ വർദ്ധിപ്പിക്കാനും കഴിയുന്ന ഇലക്ട്രോകെമിക്കൽ ബയോസെൻസർ ഉള്ള പോയിന്റ് ഓഫ് കെയർ എന്ന ഒരു ഉപകരണം വികസിപ്പിച്ചു. ഉയർന്ന സംവേദനക്ഷമതയുളളതും വിലകുറഞ്ഞതുമായ ഈ ഉപകരണം രോഗികൾക്ക് ഏറെ ആശ്വാസകരമാണ്.

ഒന്നിലധികം അവയവങ്ങളുടെ തളർച്ച, ആഘാതം, മാത്രമല്ല മരണത്തിന് പോലും കാരണമായേക്കാവുന്ന ഒരു അണുബാധ മൂലമുണ്ടാകുന്ന ഗുരുതരമായ ഒരു രോഗാവസ്ഥയാണ് സെപ്സിസ്.

സമയബന്ധിതമായ ചികിത്സാ ഇടപെടലിനും രോഗിയുടെ ഫലങ്ങൾ മെച്ചപ്പെടുത്തുന്നതിനും, നേരത്തെയുള്ളതും കൃത്യവുമായ രോഗനിർണയം നിർണായകമാണ്, അങ്ങനെയെങ്കിൽ മാത്രം മരണനിരക്ക് കുറക്കാവുന്നതാണ്.
നിർദ്ദിഷ്ട ബയോമാർക്കറുകളുടെ കൃത്യവും സംവേദനക്ഷമവുമായ ഇടപെടലുകൾ വഴി പെട്ടെന്നു തന്നെ രോഗനിർണയം നടത്താൻ സാധ്യമാണ്.

എത്രയും വേഗത്തിൽ എൻഡോടോക്സിൻ(Endotoxin) കണ്ടെത്താനായി NIT ടീം വ്യത്യസ്തമായ എട്ട് സെൻസറുകൾ വികസിപ്പിച്ചിട്ടുണ്ട്. അതിൽ ഏഴെണ്ണം ഇലക്ട്രോകെമിക്കൽ കണ്ടെത്താനും ബാക്കിയുളള ഒന്ന് ഒപ്റ്റികൽ ഡിറ്റക്ഷനുമാണെന്ന് ഗവേഷക സംഘത്തിന്റെ ലീഡർ പ്രഫസർ എൻ. സന്ധ്യാ റാണി വിശദീകരിച്ചു

28/07/2025

ജൂലൈ 28 ലോക പ്രകൃതി സംരക്ഷണ ദിനമായി ആചരിക്കുന്നു. ആരോഗ്യകരമായ ഒരു സമൂഹത്തിന്റെ അടിത്തറ ആരോഗ്യകരമായ പരിസ്ഥിതിയാണെന്ന് ഈ ദിനം നമ്മെ ഉണർത്തുന്നു. നമ്മുടെ പ്രകൃതിവിഭവങ്ങൾ സംരക്ഷിക്കേണ്ടതിന്റെ പ്രാധാന്യത്തെക്കുറിച്ചുള്ള അവബോധം സൃഷ്ടിക്കലാണ് ഈ ദിനംകൊണ്ട് ഉദ്ദേശിക്കുന്നത്.

27/07/2025

ചന്ദ്രനിലെ മണ്ണ്, മനുഷ്യവാസ യോഗ്യമെന്ന് ഗവേഷകർ. ഭാവിയിൽ, മനുഷ്യൻ സൗരയൂഥത്തിലേക്ക് കൂടുതൽ സഞ്ചരിക്കുന്നതിന് മുമ്പ് ചന്ദ്രനിൽ താമസിക്കാൻ കഴിയുമെന്ന വിവിധ രാജ്യങ്ങളുടെ പ്രതീക്ഷയ്ക്ക്, കൂടുതൽ നിറം പകരാൻ ഈ വാർത്ത സഹായിക്കും.

അത്യാവശ്യ ഇന്ധനങ്ങളും വെളളവും മറ്റു അവശ്യ വസ്തുക്കളും 'അമ്പിളി' കനിഞ്ഞാൽ മാത്രമേ ഇത് സാധ്യമാകുകയുളളൂ. ആവശ്യ വസ്തുക്കൾ ഭൂമിയിൽ നിന്നും കൊണ്ടു പോകൽ അസാധ്യവുമാണ്. ഒരു ഗ്യാലൻ വെളളം മാത്രം ചന്ദ്രനിലെത്തിക്കാൻ 83000ഡോളർ വേണ്ടി വരും, ഒരു ദിവസം ഒരു ബഹിരാകാശ സഞ്ചാരിക്കു തന്നെ നാലു ഗ്യാലൻ വെളളം വേണമെന്നാണ് കണക്ക്.

ഏതായാലും, ഒരു ചൈനീസ് ദൗത്യസംഘം ചന്ദ്രനിലേക്ക് കൊണ്ടുവന്ന സാമ്പിളുകൾ ഉപയോഗിച്ച്, ബഹിരാകാശയാത്രികർക്ക് ചന്ദ്രന്റെ മണ്ണിൽ നിന്ന് ആവശ്യമായ വെള്ളം ലഭിക്കാൻ സാധിക്കുന്ന ഒരു പുതിയ രീതി കണ്ടെത്താൻ ശാസ്ത്രജ്ഞർക്ക് കഴിഞ്ഞിട്ടുണ്ട് എന്നത് പ്രത്യാശയ്ക്ക് ആക്കം കൂട്ടുന്നതു തന്നെയാണ്. മുമ്പ് നടന്ന ശ്രമങ്ങളെല്ലാം, കാർബൺ ഡയോക്സൈഡ് ബ്രേക് ചെയ്യാനാവാതെ പരാജയപ്പെടുകയായിരുന്നു. പുതിയ സംവിധാനം ആ വിഘ്നവും മറികടന്നൂവെന്നത് മനുഷ്യ വംശത്തിന് വളരെ പ്രയോജനകരമായ ദൗത്യമാണെന്ന് ചൈനീസ് ശാസ്ത്രജ്ഞർ ചൂണ്ടിക്കാട്ടി.

13/07/2025

പുരാതനകാലത്ത് തകർന്നടിഞ്ഞ ടാപോസിരിസ് മഗ്ന (Taposiris magna) പട്ടണത്തിലെ ക്ഷേത്രാവശിഷ്ടങ്ങൾക്കടിയിൽ വിശാലമായ തുരങ്കം കണ്ടെത്തിയതായി പുരാവസ്തു ഗവേഷകർ. 13മീറ്റർ താഴെ ഭൂമിക്കടിയിൽ കണ്ടെത്തിയ ഈ തുരങ്ക ഘടനയെ
"ജ്യാമിതീയാത്ഭുതം" എന്നാണ് വിദഗ്ധർ വിശേഷിപ്പിച്ചത്.

കരീബിയൻ രാജ്യമായ ഡൊമിനികൻ റിപ്പബ്ലിക്കിലെ എസ്.എം യൂണിവേഴ്സിറ്റി നടത്തിയ ക്ഷേത്ര ഖനനത്തിനിടയിലാണ് ഈ ജ്യാമിതീയാത്ഭുതം കാണാൻ കഴിഞ്ഞത്. 2മീറ്റർ ഉയരമുളള ഈ തുരങ്കം 1305മീറ്റർ ദൂരം പാറക്കല്ല് തുരന്നാണ് നിർമ്മിച്ചത് എന്നതാണ് ഗവേഷകരെ ഏറെ അത്ഭുതപ്പെടുത്തിയത്.

എഞ്ചിനീയറിങ്ങ് വിസ്മയമായി പരിഗണിക്കപ്പെടുന്ന, ബി സി ആറാം നൂറ്റാണ്ടിൽ ഗ്രീക് ദ്വീപ് സാമോസിൽ പണിത 1306മീറ്റർ "ജലസംഭരണി തുരങ്കം" Eupalions പോലെയാണ് ഈ തുരങ്കത്തിന്റെ രൂപകൽപന എന്നാണ് ഈജിപ്ഷ്യൻ മന്ത്രാലയത്തിന്റെ അഭിപ്രായം.

തുരങ്കത്തിന്റെ പല ഭാഗങ്ങളും വെളളത്തിനടിയിലായതിനാലാവാം, എന്തിനു വേണ്ടി നിർമ്മിച്ചതായിരുന്നൂവെന്ന് ഇതുവരെ കണ്ടെത്താനായിട്ടില്ല.

"ഈ തുരങ്കം ഒരു പ്രതീക്ഷാ വഴിത്തിരിവാകാം"
എന്നാണ്, ക്ലിയോപാട്ര Vllന്റെ ശവക്കല്ലറ കണ്ടെത്താൻ 2004മുതൽ ടാപോസിരിസിൽ ഖനനം നടത്തുന്ന ഗവേഷകരിൽ ഒരാളായ മാർട്ടിൻസ് വിശ്വാസിക്കുന്നത്.

11/07/2025

ഇന്ന്ലോക ജനസംഖ്യാദിനം.
ആഗോള ജനസംഖ്യാ പ്രശ്‌നങ്ങളെക്കുറിച്ച് അവബോധം വളർത്തുന്നതിനായി എല്ലാ വർഷവും ജൂലൈ 11 ന് ലോക ജനസംഖ്യാ ദിനം ആചരിക്കുന്നു.
1987 ജൂലൈ 11 ന് ലോകജനസംഖ്യ 500കോടി തികഞ്ഞതിന്റെ പ്രചോദനത്തിലാണ് 1989 ൽ ഐക്യരാഷ്ട്രസഭ ഈ ദിനം ആചരിച്ചു തുടങ്ങിയത്.

06/07/2025

02/07/2025

മുതിർന്നവരുടെ ക്ഷേമവും പ്രതിരോധവും വർധിപ്പിക്കാൻ പുതിയ 'ആപ്പു'മായി ഓസ്ട്രേലിയൻ ഗവേഷകർ.

റിന്യൂവെൽ(ReNeuWell) എന്ന പേരിലുളള ഈ പുത്തൻ മൊബൈൽ ആപ്പ്, ദുരിത പൂർണ്ണമായ കാര്യങ്ങൾ ചിന്തിക്കുന്നതിൽ നിന്നും ശ്രദ്ധയെ മാനസിക അഭിവൃദ്ധി സജീവമായി പ്രോത്സാഹിപ്പിക്കുന്നതിലേക്ക് മാറ്റുന്നു എന്നതാണ് ഒരു പ്രത്യേകത. മാത്രമല്ല അവരുടെ മാനസികാരോഗ്യത്തിന് ന്യൂറോ സയൻസ് അടിസ്ഥാനമാക്കിയുള്ളതും വ്യക്തിഗതമാക്കിയതുമായ ഒരു സമീപനം വാഗ്ദാനം ചെയ്യുന്നുമുണ്ട് ഈ ആപ്ലിക്കേഷൻ.

"സ്വന്തം മാനസികാരോഗ്യ നില മനസ്സിലാക്കാനും അതു മെച്ചപ്പെടുത്താനും ആഗ്രഹിക്കുന്നവർക്ക് വേണ്ടിയാണ് ഈ ആപ്പ് രൂപപ്പെടുത്തിയിട്ടുളളത്" ഗവേഷകരിലൊരാളായ ജസ്റ്റിൻ ഗാട്ട് വ്യക്തമാക്കി. വ്യക്തികളെ മികച്ച മാനസികാരോഗ്യത്തിലേക്ക് നയിക്കുന്നതിൽ ആപ്പിന്റെ പങ്കിനെക്കുറിച്ച് അദ്ദേഹം ഊന്നിപ്പറയുകയും ചെയ്തു.

ഗവേഷകരുടെ അഭിപ്രായത്തിൽ, റിന്യൂവൽ ആപ്പ്(ReNeuWell) മനസ്സമാധാനം, ധ്യാനം, സ്വയം കാരുണ്യം, ലക്ഷ്യ ക്രമീകരണം തുടങ്ങിയ മനഃശാസ്ത്ര ആശയങ്ങളെ അടിസ്ഥാനമാക്കി, നാലാഴ്ച്ച നീണ്ടു നിൽക്കുന്ന വ്യക്തിപരമായ ഒരു സവിശേഷ പ്രവർത്തന പദ്ധതി വാഗ്ദാനം ചെയ്യുന്നുണ്ട്.

12 ആഴ്ചത്തെ ക്ലിനിക്കൽ ട്രയൽ നിലവിൽ നടക്കുന്നുണ്ട്, അതിൽ കുറഞ്ഞത് 500 മുതിർന്നവരെയെങ്കിലും സജീവമായി നിയമിക്കുന്നുമുണ്ട്. യോഗ്യരായ വ്യക്തികൾക്ക് ആപ്പിലേക്ക് സൗജന്യ ആക്‌സസ് ലഭിക്കും, ദിവസേന വെറും 10 മിനിറ്റ് ഉപയോഗവും മൂന്ന് ചെറിയ സർവേകളും നടത്താം. ആപ്പിന്റെ ഫലപ്രാപ്തി കൂടുതൽ വിലയിരുത്താനും പരിഷ്കരക്കരിക്കാനായി ഫീഡ്‌ബാക്ക് ശേഖരിക്കുന്നതിനും ഈ ട്രയൽ ലക്ഷ്യമിടുന്നു.

11/06/2025

പത്തു വയസ്സു മാത്രമുളള മുസ്ലഹ് സഈദ് അൽഅരിയാനി, തന്റെ പേര് ലോക കർഷക ഭൂപടത്തിൽ സ്വയം അടയാളപ്പെടുത്തുന്ന തിരക്കിലാണ്. യു.എ.ഇ സ്വദേശിയായ ഈ കൊച്ചു മിടുക്കന്റെ ജൈത്ര യാത്ര തുടങ്ങുന്നത് തന്റെ നാലാം വയസ്സിൽ മുത്തശ്ശിയുടെ ഫാമിലെ സന്ദർശനത്തോടെയാണ്. ആ കൃഷിയിടവുമായുളള മുസ്ലഹിന്റെ സ്നേഹ ബന്ധമാണ് അവനെ കാർഷിക കലയിലേക്ക് നയിച്ചത്.

ഇന്ന്, അതായത് ആറു വർഷങ്ങൾക്കു ശേഷം തന്റെ വീടിന്റെ പിന്നാമ്പുറം, വ്യത്യസ്ഥ പഴ വർഗ്ഗങ്ങളും പച്ചക്കറികളും തഴച്ചു വളരുന്ന തോട്ടമാക്കി മാറ്റി പ്രകൃതിദത്തവും സസ്യാഹാരിയുമായ ചേരുവകളുടെ പോഷകസമൃദ്ധമായ മിശ്രിതം "പ്രോട്ടീൻ ബോംബുകൾ" ഉണ്ടാക്കാനുളള തന്റേതായ പാചകക്കുറിപ്പുകൾക്കായി ആ കർഷക ബാലൻ ഉപയോഗിക്കുന്നു.

യു.എ.ഇ പരിസ്ഥിതി മന്ത്രി ഡോ. അംന ബിൻത് അബ്ദുല്ല, ഈയടുത്ത് നടന്ന കാർഷിക എക്സിബിഷനിൽ കാർഷിക മേഖലയിലെ യുവ പ്രതിഭകളുടെ പ്രാധാന്യം എടുത്തുകാണിക്കുന്ന തന്റെ പ്രസംഗത്തിനിടയിലാണ് മുസ്ലഹിനെ പരിചയപ്പെടുത്തിയത്.

"പ്രിയപ്പെട്ട കൊച്ചു കർഷകൻ" എന്ന മന്ത്രിയുടെ വിശേഷണം തന്നെ വലിയ അംഗീകാരമായിട്ടാണ് മുസ്ലഹ് കരുതുന്നത്.

"എന്റെ ആദ്യ കൃഷി 'വാട്ടർക്രസ്' ആയിരുന്നു" മുസ്ലഹ് ഓർത്തെടുത്തു. "തുടക്കത്തിൽ, മുത്തശ്ശിയുടെ കൃഷി രീതി നോക്കി നിന്ന് അതേപടി ചെയ്യാൻ ശ്രമിക്കലായിരുന്നു ഞാൻ. ആദ്യമൊക്കെ എല്ലാം പിഴക്കുമായിരുന്നു, ഇപ്പോൾ ഞാനേറെ മെച്ചപ്പെട്ടിട്ടുണ്ട്..." കൊച്ചു കർഷകന്റെ മുഖത്ത് പുഞ്ചിരി വിരിഞ്ഞു.

" എനിക്ക് കൃഷി തരൂ, ഞാൻ നിങ്ങൾക്ക് നാഗരികത തരാം" എന്ന ശൈഖ് സായിദിന്റെ ആപ്ത വാക്യത്തെ പ്രതിഫലിപ്പിക്കുന്ന സമർപ്പണമാണ് അൽഅരിയാനിയുടേത്.