09/09/2025
نصائح لطالب الجامعة الجديد 💚
طبعا خلونا نتفق يا جماعة ان الجامعة في السودان غير الشهادة ما بتديك شي ، وهسي فتحت الجامعات خلاص وبدات رحلة صناعة المستقبل للشباب السودانين ، ..
في البوست ده حاناقش فكرة الدراسة الجامعية في السودان وكيف الطالب ممكن يبنى مسار مهني ناجح ويتميز من فترة الجامعة وكيف ممكن سنوات الدراسة تبقى ليه هي المستقبل الحقيقي ...
اولاً خلونا نقسم المجالات الجامعية بطريقة مختلفة
شوية يمكن ما متعودين عليها 👌..
و هي القسم الاول الكليات السيادية .. ! ودي الكليات العشان تقدر تشتغل في المجال حقها لازمك شهادة جامعية ذي الطب والهندسة والقانون والتمريض والصيدلة والتربية ،..
,والنوع التاني هي الكليات المهارية ..! ودي الكليات العشان تشتغل في المجال حقها ما بالضرورة تكون عندك شهادة جامعية ودي ذي الادارة والمحاسبة او البرمجة و الموارد البشرية و الزراعة والعلاقات العامة والتسويق وغيرها بس يكون عندك المهاراة اللزمة وامورك طيبة ...
والطامة الكبرى ان المناهج عندنا في السودان للنوعين من الكليات قديمة جداً ما بتضيف ليك شي كتير في المجال الا معلومات سطحية في المجال وبتاخد بعض النظريات والمعاير لطرق البحث العلمي او الاطر العلمية في تخصصك ...
لكن خلينا واضحين الحاجات دي براها ما كفلية تشغلك في السوق ، السوق بيعرف لغة الانتاج والتطبيق والارباح والنتائج وعشان تطلع من الجامعة دي وانت زول سوق جاهز حاديك النقاط الاربعة دي حتغير فهمك للجامعة و ده طبعا اذا انت مقتنع بمجالك الدخلتو في الجامعة الان ، عشان ما يجي واحد يقول لي بقرا بدون رغبتي 🥲
# انغمس في المجال : 🔥
طبعا في الوقت الحالي المعلومات اصبح الحصول عليها ساهل ما ذي زمان( مراجع ومكتبة) يا حليلنا نحن 😅 زمان
الان امشي طوالي في مجالك ابدا اعرف المجال بعمق واقرا حاجات خارج المقرر وشوف الاوراق العلمية والاختراعات الموجودة المهم انغمس في المجال عشان لما تطلع للسوق ما تكون انت معرفتك سطحية ما بتساعدك على المنافسة بلاقي ناس خريجين هو ما مجاله فيه كم تخصص ما عارف 🧐. ..
# ابني شبكة علاقات في مجالك 🔥
، يعني ابحث عن كل المؤتمرات في المجال واحضرها اذا في طريقة تمشي او لو صعبة اونلاين ممكن تحضر وتابع الناس المؤثرين في مجالك كويس واتعرف عليهم واعمل ليهم طلبات صداقة صاحب السناير القدامك خش في مجتمعات اونلاين في مجالك فيسبوك لنكدان وتكون عالمية او اقليمية حتلقى نفسك انت زول بعيد في المجال قبل ما تتخرج وحتعرف توجهات السوق وكيف تتخصص 😎..
# تعلم المهارات الناعمة :
انت عارف ان العمل في السوق 80% بعتمد على مهارات ما بدوك ليها في الجامعة ذي العمل الجماعي والقيادة والذكاء الاجتماعي والشجاعة الادبية العرض والتقديم والاقناع اتخاذ القرارت والتحليل وانا من عندي ليك الذكاء الاصطناعي في مجالك يلا دي المهارات ما في زول بعلمك ليها 🥲..
فانت يا معلم لازم يكون عنك نشاط اثناء الجامعة يكون غير الدراسة الاكاديمية ذي التطوع في العمل الخيري ؛المنظمات ، العمل الطلابي النقابي او المبادارت المجتمعية لو في طريقة تعمل بزنس اثناء الدراسة ما يتعارض معها يكون تمام ، دي مع حبة كورسات وتعلم في اليوتيوب بتظبط ليك امورك ..
# سوق لنفسك :
التسويق الشخصي الان عامل ذي الطالب المتفوق زمان 🤣والحاجة المهمة جدا هي انك حاول كل النشاطات الانت بتعمل فيه كطالب تعكسها في حساباتك على السوشيل ميديا يعني اصنع محتوى في اي منصة انت شايفة مناسبة معاك ويكون الهدف منه ان تعرف مزيد من الناس وتوسع دائرة علاقات وتنفتح على العالم خلي وجودك في السوشيل ميديا بيخدم اهدافك الحياتية 👌..
انا بجزم بنسبة كبيرة عبر الخطوات دي باذن الله انت ممكن تكون افضل خيار للشركات في السوق لانو مدعوم بالعلاقات والبراند الشخصي التعمق في المجال 👌..
وازيدك من الشعر بيت كمان انت ممكن تلقى وظيفة قبل ما تتخرج اصلا ، بس اياك تقع في الفخ بتاع زول ماشي الجامعة مدلل يدينوا وراجع من الجامعة مدلل يدينو بتخسر اهلك رسوم جامعة وبضيع زمنك ساي عشان كده احسن تكسر الحنك طوالي 🤣
اذا عجبك البوست اعمل تاق لطالب جامعة جديد 🔥
في الختام بتمنى التوفيق للشباب الجدد وان شاء الله
حياة جامعية سعيدة 💚
