Mazen Alfa7al - مازن الفحل

15/09/2025

أهم حاجة ممكن تعملها في حق نفسك ولي يوم الليلة ندمان إن عرفته متأخر هو التحصين

زمان أيام الجامعة ( كنت بقرأ في أمدرمان الإسلامية طبعا 😂) كنت شاب طموح وحركتي كتيرة ، جاري من نشاط لي نشاط ، كنت البرلوم داك البتعرفه الجامعة كلها وليدر الدفعة

ونشاطاتي برة الجامعة برضو كانت كتيرة كنت شغال في شركة زين ، وكنت سفير طلاب في منظمة هولندية إسمها orange corners ومشارك في منظمة سودانية لريادة الأعمال وكنت برضو يادوب داخل في شغل الميديا والتصوير

لكن في فترة كدا فجأة مات عندي الشغف ومتذكر والله كنت ما بطلع من البيت بالأسابيع وإستمر الحال كدا لكم سنة لدرجة إتعودت علي العزلة وإن أعيش براي

لكن سبحان الله في يوم من الايام قابلتني عبارة 'لو عرفت ما في نفوس الناس ما كان حتتحرك حركة الا تتحصن' وفعلا بديت
إتحصن كل يوم وإستمريت فترة من الزمن علي كدا

وبديت ألاحظ الفرق الكبير في حياتي ، أحوالي بقت تتصلح وتاني بقيت أرجع إجتماعي وتجيني فرص وحياتي بقت ترجع ذي زمان شوية شوية

في زمنا الصعب دا وفي كل الأزمان التحصين ضرورة لان التحصين اعتصام بالله من كل الشرور

والانسان ضعيف قدام البلاء والأمراض، وأنا متأكد لو عرفت الغل والحسد اللي في قلوب الحاقدين ما كان صبرت ساعة من غير تتحصن

07/09/2025

بستغرب من الناس البتحارب الزواج المبكر بحجة: "حتصرف عليها من وين؟ إنت فطرت "

مع إنه الزواج من تجربتي سبب أساسي للسعي والنجاح والرزق


أنا اتزوجت وعُمري 24 سنة. في الفترة قبل الزواج كنت بسمع كلام كتير ذي

"الزواج مسؤولية مالية كبيرة، كوِّن نفسك الأول، اعمل بيت وعربية، وبعد داك في بداية الثلاثينات عرس… عشان تكون استقريت وعشت حياتك"

لكن كنت شايف إن طريقة التفكير دي غلط!

زمان أهلنا كانوا ببدوا حياتهم بالزواج… ما كانوا ينتظروا ويعيشوا حياتهم بعدين يتزوجوا.

لأن الزواج في حد ذاته حياة؛ ووجود شريك معاك بخليك تواجه مصاعبها وأنت أقوى و مليان مسؤولية وعندك أهداف واضحة ودي الحاجة البتساعدك تكوّن نفسك أسرع.

على العكس الحاصل اليوم في مجتمعات بتفضل فكرة تأخير الزواج فبتلقي فيها الشباب: بيهربوا من مسؤوليات الحياة بعلاقات محرمة و عادات سيئة، وضياع وقت وتشتيت… وفي النهاية يكتشفوا بعد سنوات إنهم ما كوّنوا نفسهم ولا حققوا استقرار.

كلامي ما معناته يا جماعة كلكم أمشوا أتزوجوا هسع… في النهاية الموضوع أرزاق وربنا هو القاسم.

أنا بس نويت الزواج، وسبحان الله ربنا رزقني أهل واثقين فيني وفي قراراتي وزوجة جميلة، وقفت معاي وخففت عني التكاليف.

وكانت شايفة زيي: بدل ما نصرف مبالغ كبيرة في مراسم وحاجات شكلية، الأوْلى نخت القروش في بيتنا ومستقبلنا.

تم الزواج وعشنا ايام حلوة وإتشاكلنا كتير وواجهنا مصاعب وتحديات لان فعلا الزواج تحدي ومحتاج صبر والحياة ما وردية


لكن في النهاية الدنيا بتمشي وكل مرة بنحس إن المستقبل أحسن وماشين في الدرب البرضي ربنا

فحتى لو شايف الزواج بعيد ومستحيل، خلي نيتك طيبة وشوف العجايب وهي تتحقق.

05/09/2025

شهادة حق محمد التاج من أكثر الناس نزاهة القابلتهم في حياتي، إتعاملت معاه في مواضيع مالية كثيرة وفي يوم من الايام كان حسابي البنكي عنده عشان كنت مسافر ودي ثقة ما أديتها لانسان في حياتي

إنسان دغري وواضح وما بيحب الاتفاقات المبهمة ومع إن متفقه في الدين ودرسه ولا مرة شفته مركب مكنة رجل الدين عشان
الناس تثق فيه زيادة ذي ما بحصل في عالم البيزنيس لكن علي العكس لمن سألته قال درسه عشان يبعد الحرام من شغلة

فبستغرب لمن بعض الناس يهاجموه بدون ما يعرفوا القصة شنو وهو بقدم شنو ؟

في البوست دا جانب من القصة فياريت الناس تفتش الحقيقة بنفسها لان في النهاية الحق هو البظهر

الحاصل شنو 😳؟
الفترة الفاتت في 3 شخصيات نزلت بوستات بتهاجمني وتهاجم شركتي .. في الأول ما إهتميت لأن ماكل واحد حيجيب سيرتي حاوقف شغلي وامشي ارد ليه 🤷‍♂️.. بس الموضوع زاد عن حده وبقا فيه تطاول واساءات لطلابي نفسهم ..
عشان كدا في البوست دا حاكتب بالتفاصيل الحقيقية كلها ..

⭕ أولا لازم تعرف نحنا بنشتغل كيف ..
نحنا بنعمل كورسات بنعلم فيها الطلاب البزنس والتسويق .. وبعدها بنعمل امتحانات للدفعة .. البينجح منهم بنديه فرصة يشتغل معانا ..
بيكون في فترة إختبار لو طلع فعلا بيطبق المحاضرات كويس بيستمر معانا وبياخد مرتبه من الشركة .. لو طلع مابيطبق كويس ومانجح في الشغل بنعتذر ليه (بالمنطق كدا حأعمل شنو بموظف ما محقق لي اي فايدة في الشركة) .. الكلام دا الطالب عارفه وبيوقع عليه عديل في مستند رسمي.

فكدا متفقين ان كلللل الطلاب عندهم فرصة متساوية انهم يتعلمو ويتوظفو والبيحدد الواحد حيكمل ولا لا هو مجهوده فقط ..

⚠️ النظام دا بنشرحه من الاول للطلاب .. ومؤخرا بقيت بنزله في بوست عديل عشان كل الجمهور يعرف .. وماحصل جبرنا طالب يسجل معانا .. اللي رافض النظام دا بنقول ليه بنعتذر منك ومابنسجله في الكورس اصلا ❌ ..

من كذا اسبوع في واحد (خلينا نسميه حموكشة🤭) نزل بوست يشتم فيني .. ليه؟ مابعرف 🤷‍♂️ .. "لغرض" في نفسه .. انا ماعندي علاقه بيه اصلا .. بس لمن الطلاب كلموني بالموضوع ما اهتميت وحظرته وخلاص (واحد بيشتم حامشي احنسه يرضى عني؟ 🙄)

المهم جاب في البوست بتاعه 4 او 5 طلاب من الكان درسو معانا بس فشلو في انهم يطبقو الكورس فطلعناهم من الشركة بعد الفترة الأولى من العمل (وديل تقريرهم عند الادارة لحد الان قاعد .. ناس حرفيا ما حققو اي فايدة في الشركة).

المهم .. البوست بتاعه ماجاب تفاعل .. لانه ببساطة اي زول بيقرا البوست بيعرف انه كذب وهو منفعل في الفاضي ساي.
وكان فيه اتهامات غريبة في التعليقات (من ضمنها اني مابنجح الطلاب السودانيين 🤨) .. هل انتو عارفين انه انا مابتوسط في وظائف لغير سودانيين اصلا؟ انا عندي تحيز عديل ناحية السودانيين وبجتهد أدخلهم في أي وظيفة بلقاها في الخليج هنا.

وفي واحد من البوستات حموكشة هاجم واحدة من البنات الطلاب عندي واتهمها انها بتدافع لي وبتغش الناس ووو كلام كتير .. فهي وصاحباتها دخلو أفحموه بالرد .. وتاني يوم حذف المنشورات وسكت.

بعد شهر من عدم التفاعل مشا "حموكشة" دا يطلب من ناس تاني يكتبو بوستات تسيء لي (احساس عليكم الله اشتمو محمد التاج معاي 😫) .. وكلم واحدة قاعدة في مصر (مابتعرف عني شي ولا حصل درست معانا كورس اصلا) .. البت سمعت كلامه ونزلت بوست طويييل (محمد التاج بتاع تسويق شبكي ووو ..)
واخر البوست ختمته ب(مازي شخصي الضعيف انا بحب اساعدكم بدون مقابل وبديكم من الاتعلمته)
طيب انت كن عايزة تلمعي نفسك قولي انك رهيبة وبتعلمي الناس مجان .. انا مالي ي لمبي؟ 🙂

وقالت للناس بنزل ليكم روابط مدربين مصريين اتعلمو منهم هم (والسودانيين كعبين يعني ولا شنو).

هنا في طلاب ماقدرو يتحملو الاهانة فيني وردو ليها ان نحنا اتعلمنا منه وكورساته ممتازة وووو .. فجا منو؟ حموكشة .. دخل منفعل يرد ويتهم الطلاب انهم بيطبلو لي (كيف يعني تقولو راي تاني غير القلناه نحنا؟ 🤬) .. ووصل الامر انه الاخت والناس المعلقين عندها بيوصفو الطلاب ب(الذباب) وكلمات غير مهذبة.

خلصنا من دي حموكشة مشا لدكتور جامعة (وبرضو مابيعرفني ولا حصل شاف لي محاضرة ولا فيديو بالغلط ساي) .. وكالعادة حفظه نفس الكلام المكرر البيقوله حموكشة والماجاب تفاعل في صفحته .. يقوم الدكتور ينشر الكلام زي ماهو وعليه زيادات ..
طيب يادكتور يا مدرب .. مادام سمعت كلام عني وعايز تكون منصف للحق .. تعال اسأل صاحب الشأن بصورة واضحة الحاصل شنو .. ماتسمع من زول غريب وتنفعل تنزل بوست ساي .. دا حتى ربنا عاتب سيدنا داؤود لانه حكم بدون يسمع للطرف التاني في النزاع.

في النهاية حصل نفس الشي الطلاب بياخدو البوست اسكرين وبيردو عليه .. وبيجي حموكشة يدور فيهم ردود واتهامات كانه بيستمتع باذى الطلاب ديل والهجوم عليهم.

⭕ دي القصة كدا لحد الآن .. عندي تعليقين في الموضوع دا:

#اولا .. انت زول جاك حموكشة بيتهم مدرب انه عمل مشاكل مع الطلاب .. بتجري تنشر الموضوع ساي بدون تسأل المدرب نفسه ليه؟ .. اعرف اول الزول الحتتكلم عنه دا شغال شنو وقدم شنو للطلاب قبل تطلع بلافته اتهامات عشوائية.

#تانيا .. بالنسبة للشخص البيتفاعل مع نوعية المنشورات الزي دي وبيعلق فيها شمتان او مصدوم .. انا قاعد في المجال دا لي كم سنة بعلم وبدرس ولفيت ع الجامعات السودانية أعلم الطلاب البزنس مجان .. عملت كورسات للأمهات والبنات مجان .. آلاف الطلاب بدربهم كل سنة عشان يبنو مشاريعهم .. مئات الطلاب بتوسط ليهم عشان يتوظفو في شركات .. وظايف بنزلها في صفحتي والاستوري حقت الواتس بيقدمو فيها السودانيين مجان.
كلللل دا ما خلا في نفسك رصيد ترد بيه غيبتي لمن تسمع زول اغتابني في بوست؟ 🤨 .. ياخ ماعايز شكر .. ربنا هو البيجزي الأجر .. بس ع الأقل قل خيراً أو أصمت.

لي كم سنة بنزل محتوى عن محاربة التسويق الشبكي وعن الاحكام الشرعية فيه .. يجي زول معدي من الشارع ساي يقول ليك محمد التاج شغال تسويق شبكي تقول ليه (اااي والله كلامك صح وانا اتصدمت فيه) .. احلف 😒

#الللمهم .. شركاتي شغالة من سنوات في بحري والابيض وبنوزع لكل السودان .. وحاليا الشركة الجديدة في الشارقة ..
وماتعليم بس .. عندي شركة الكترونيات من زمن حفرو البحر ولحد الليلة شغالين بنورد للسودان .. ياما وظفنا ناس ممتازين .. وياما اختلفنا مع موظفين سيئين .. الموضوع شغل مافيه مجاملة .. فدايما في زول بيطلعك (الشرير في روايته) ..

هل انا غالبني اقول ماعايز اي طالب يشتغل معاي في شركتي؟ والله لا .. عادي بكرة أقفل الباب دا وخلاص خلصنا ..
السبب الوحيد الخلاني اجتهد افتش وظايف للطلاب لانه لمن جيت الخليج لقيت الناس بالجد قاعدين مالاقين شغل وظروفهم سيئة .. فبقيت اعلمهم في كورسات عشان يترقو في مهاراتهم .. واربطهم بالشركات الهنا والفي السودان وكل الطلاب عندهم نفس الفرص المتساوية. (شوفو الاسكرينات الفي التعليقات لطلاب اتعلمو وحياتهم اتطورت للاحسن)

#الخلاصة
انا مابحب أمور المطاعنات والقوالات .. عندي شغل واضح ودغري .. الماعايز يتعامل معاي ما بسأله .. ف الاخر دا بزنس عرض وطلب ..

ولحد بداية الشهر دا انا وزعت كل المرتبات المستحقة علينا للموظفين الشغالين معانا من الدبلوم المصغر الفات (اي زول اشتغل معانا وسلم تقريره الشهري من الدبلوم المصغر اخد مرتبه) .. ولسا في ناس حيصرفو مرتبهم يوم 15 .. وفي ناس حيصرفو يوم 30 .. ومستمرين في شغلنا ..

فالبوست دا كتبته لرد الغيبة .. وعشان ادافع عن طلابي البيتم الاساءة ليهم .. اخد البوست واديه في وش اي زول بينتقص مني او من المدربين المعاي او من شركتنا .. من ناحية كورسات فنحنا اجتهدنا أفضل محتوى وأكتر مدربين محترمين زي محمد بابكر ومحمد المجتبى وأحمد فائز وغيرهم.

#وأخيرا عندي سؤال أختم بيه البوست دا .. هل الناس البينشرو ديل حيرتاحو لو قلت انا علي بنفسي وقررت أقفل باب التوظيف وتاني ما اشغل طالب سوداني معاي؟

😌💰
#بزنس

05/09/2025

أنا اسمي سيسي. أتربيت في جوبا، جنوب السودان. فقدت أمي وأبوي لمن كان عمري ٧ سنين بس

وبقيت أنا الكبيرة في بيت فيه تسعة إخوة. كنت ذاتي محتاجة حضن يضمني، لكن فجأة بقيت أنا الأم، وأنا الأب، وأنا السند ليهم

كنا ساكنين في حلة ما فيها كهرباء ، لا موية منتظمة، لا دعم من أي جهة. اشتغلت خدامة، بعت عسل، وزبدة فول، وصنعت حاجات بسيطة من البلاستيك عشان نعيش يوم بيوم. كنت صغيرة في العمر، لكن همّي في أخواني كبير .

أكبر مشكلة واجهتني إني ما عندي قروش، لا تعليم، لا زول يورّيني الطريق.

كنت بنوم بمغص الجوع والتفكير، وببكي من الهم والجوع … لا
صوتي بسمعه زول، ولا عندي أب وأم يساعدوني.

الدنيا كانت قاسية علي لكن كان لازم إشتغل عشان أخواني إحتمال بكرة أحسن


ربنا كتب لي طريق، دخلت عن طريق منظمة بتهتم بالبنيات، وجاني تدريب بسيط من برنامج الـUNDP. علموني كيف أحسب دخلي ومصروفي، كيف أعمل خطة، وكيف أتعامل مع الزبائن. بعد التدريب أخدت دين صغير، وفتحت محل صغير.

أنا لمن قررت أبدأ البزنس، سألت روحي سؤال واحد:

"شنو الحاجة البعرفها؟ وشنو المتوفر حولي؟"

ما كان عندي رأس مال كبير ولا معدات متطورة، لكن كان عندي حاجتين مهمات كانوا معاي طول الطريق وهم: العسل والفول السوداني.

العسل ده تحديداً، من زمان وأنا شايفه إنو فيهو خير. أولاً سهل التخزين، ما بيحتاج تبريد، وما بتلف بسرعه. وثانياً، فيهو فوائد صحية كتيرة، وده خلاني أفكر كيف أخلّيه جذاب أكتر، أغلفه بطريقة مرتبة، وأبيعه بجودة كويسة للزبون.

الفول السوداني كمان بنزرعو في منطقتنا، وقلت ليه ما نعمل منو زبدة طبيعية؟ حاجة بسيطة لكن الناس بتحبها، وسهلة في التصنيع.

أنا ما كنت دايرة أشتغل شغل معقد، أنا دايرة أبدأ من حاجات حوليني. وكنت بقول لنفسي:

"بدل أمشي أفتش على القروش، أخلي القروش تجي من الحاجات البنعرفها وبنقدر عليها."

بعد شهور من التعب والشيل والهم، الحمد لله، شغلي كبر… بقيت ببيع بحوالي ٣٠ ألف جنيه في اليوم، رجّعت الدين، ودخلت أخواني المدرسة، وبنيت ليهم بيت صغير من الطوب.

وما وقفت كدا بس…

قررت أرجّع الجميل وأساعد غيري ودربت بنات معاي في الحله .
علّمتهم كيف يصنعوا زبدة الفول والعسل، كيف يسووا تغليف بسيط وجاذب، كيف يتعاملوا مع الزبائن، ويحافظوا على الجودة، وكيف يؤمنوا بروحهم حتى لو المجتمع ما مصدّق فيهم.

أنا الليلة عايشة بكرامة… وعندي قيمة. والناس بقوا يحترموني ويشوفوني قدوة

وهسي، أنا بحلم أكبر من كدا… عايزة شغلي ييطلع من جوبا، ومن
جنوب السودان كلو.

عايزة الناس في نيروبي، وأديس أبابا، وكيب تاون، ودبي يشربوا شايهم مع عسل سيسي… ياكلوا بي زبدة فول سيسي.

عايزة العالم يعرف جودة منتجاتنا وقيمتها.

قصتي أنا، من يتيمة لاجئة لرائدة أعمال، هي بس دليل بسيط إنو الزول ممكن يغيّر حياتو مهما كانت قاسية، لو كان عنده العزيمة والرغبة .

تابعني لو بتحب القصص الملهمة و ما تنسي تعمل شير ولايك عشان تنفع غيرك ❤️

29/08/2025

كم ممكن تربح لو فتحت فود ترك بطاطس وكم بتكلف ؟ |

28/08/2025

الخير في الكتبه لينا ربنا

21/08/2025

في الفيديو حجرب لأول مرة أطير بطيارة وصراحة التجربة كانت جميلة جدا ، تابع الفيديو وعلق لي برأيك

20/08/2025

لمن أحكي قصص نجاح السودانيين بكون هدفي أبين قدر شنو نحن شعب جميل وعظيم وأزرع الأمل في قلوب الناس التعبت لكن مرات حتي أنا بجيني اليأس بسبب الأزمة الحاصلة في بلدنا

لكن فجأة بتظهر لي قصة ذي قصة الدكتورة الإتجمعت ليها 800 الف ريال في يوم واحد وتذكرني تاني من أول لي نحن أعظم شعب في العالم ومفروض أبدا ما نستسلم مهما كان الوضع ♥️

12/08/2025

الفاشر.. حكاية ناس ما بتنكسر

الفاشر ما بس مدينة ساي في الخريطة ، دي سيرة طويلة من الصبر والقوة والكرامة .

إنسان الفاشر ، بصحى من النوم على أبشع واقع ، لكن برضو بيمسح دموعه ويقول: الحمد لله.. ما دام الروح فينا بنقدر نعيش.

في عز الحصار والنار والرصاص ، المدافعين عنها واقفين زي الجبال…
ما انكسروا… ما استسلموا… وما خانوا .

الناس ديل حقيقة علمونا شنو الصبر وشنو الكرامة…
الفاشر دي ما مجرد مدينة…
دي حكاية قلوب حية، وأرواح نقية، وصمود ما ليهو حدود.

سمعتوا قصة الدكتورة هنادي؟
كانت بتجري بين المخيمات، تجبر بخاطر المصابين وتضمد الجروح

حتى في اللحظة الأخيرة، كانت واقفة شامخة
ما خافت من الرصاص

زغردت للمجد والمقاومة وخلت لينا سيرة ما بتتمحي.

والنسوان البكافحو ويصنعو اكل من ماف في عز المجاعه لاولادهم ، والرجال البيقيفوا على ناصية كل حي عشان يحموا الحِلّة. ديل ما ناس عاديين.. ديل ناس معدنهم صافي وقلوبهم مليانة شهامة.

الفاشر ما بتهتز.. حتى لو الليالي سواد، وصمودها حتي اليوم وإنتصارها أكبر دليل

يا زول، لو الدنيا قفلت في وشك يوم، اتذكّر ناس الفاشر.

اتذكّر البيوت الاتهدّت وأصحابها بنوها من تاني. اتذكّر الدموع المسحتها النسوان وشدن الحيل عشان أولادهن يفرحوا.

اتذكّر الشباب السهرانين يحموا الناس ويشتغلوا في التكايا عشان الغير وإتذكر المدافعين عنها بأرواحهم وحياتهم .

09/08/2025

من زمان من أنا صغير كان نفسي لمن أكبر أكون طيار 😂

والبوم حققت الحلم وعملت فيديو كامل عن تجربتي وشرحت كيف ممكن تاخد رخصة في شهرين ، لو بتحب عالم الطيران حتستمتع بالحلقة الموجودة في الرابط في التعليقات

02/08/2025

الحمد لله، نجحت عملية هبة المهندس… وانتصرت على السرطان بعد معاناة

ممكن كتير من الناس يعرفوا هبة من التلفزيون، لكن معرفتي بيها كانت مختلفة تمامًا، وخلوني أقول ليكم … هي من أجمل الشخصيات القابلتها في حياتي.

لسه متذكر اليوم الأول القابلت فيه هبة، كان في السنة الفاتت في مكان قريب من شغلي.
جاءتني بكل لطف، وقالت لي إنها بتحب المحتوى البقدمو، وإنها فخورة بي. كلامها كان دافي وبسيط، وفعلاً لمسني. عرفت إنها كانت جاية تعمل إنترفيو في نفس المنطقة، وشكرتها على كلامها اللطيف، وبعدها افترقنا.

بعد فترة، رجعت هبة لنفس المكان، وقبلوها في الشغل كـ مديرة التحربر في واحدة من أكبر منصات الإعلام الرقمي في الخليج.

وفي وقت قصير، جمعت السودانيين في الشركات الحولينا، وبقت تعمل لينا “لمات” جميلة، وتجيب لينا أكل سوداني من وقت للتاني، لأنها كانت حاسة بينا وبالغربة.

وبصراحة… في فترة قصيرة، بقت لينا زي الأم الحنين الفاقدنها في الغربة.

وللناس اللي ما بعرفوها كويس، خلوني أحكي ليكم قصتها من البداية وكيف إتكونت الشخصية الجميلة دي علي رغم المعاناة العاشتها في حياتها

اسمها هبة جادالله، اتولدت سنة 1971 في مستشفى الراهبات بحي الخرطوم غرب، وكان بيتهم قريب من دار الكشافة السودانية.

كانت البنت الكبيرة في أسرة فيها ثلاث بنات وأخوهم خالد، اللي توفى في عز شبابه بذبحة صدرية مفاجئة.

وهم صغار، سافروا ليبيا بحكم شغل والدهم، وبعدها انتقلوا للكويت.
وكانت هبة بتحلم تسافر روسيا عشان تدرس اقتصاد وعلوم سياسية، وكل الأمور كانت ماشّة تمام…

لكن فجأة، غزو العراق للكويت سنة 1990 قلب كل حياتهم.
اضطروا يهربوا للأردن، ومن هناك رجعوا للخرطوم .

رجعوا للبيت العائلي، اللي كان اتقسم بالورثة، وسكنوا في جزء ما فيه لا موية ولا كهرباء، والحياة بقت ليهم صعبة شديد.

أبوها سافر السعودية يفتش على شغل، لكن للأسف ما رجع.

هبة، كبنت كبيرة، قررت تساعد أمها وتشيل المسؤولية.

دخلت جامعة الأحفاد للبنات، ودرست علم نفس ورياض أطفال، لأنه ده الخيار الممكن وقتها.

واتخرجت سنة 1995، وبدأت تعافر عشان تعيش وتعيل أسرتها، فاشتغلت كاشير في محل صيانة أجهزة كهربائية، رغم إنو بعيد تمامًا من تخصصها.

وفي يوم، كانت قاعدة مع صديقتها “أمل”، فقالت ليها:
“يا هبة، عندك حضور… ليه ما تقدمي في التلفزيون؟”

وفعلًا، قدمت لاختبارات التلفزيون القومي، وكان عدد المتقدمين حوالي 900 شخص.
بعد مراحل طويلة، اختاروا 11 فقط… وكانت هبة واحدة منهم.

ومن هنا بدأت رحلتها في الإعلام…

بدأت كمذيعة، وبعدها قدمت برامج شهيرة زي “من القلب إلى القلب” و**“مشوار المساء”** مع الطيب عبد الماجد، وظهرت لأول مرة على الهواء مباشرة.

عملت لقاءات مع كبار الفنانين، زي محمد وردي، يوسف شعبان، وأمينة رزق.
ومع الوقت، كبر جمهورها، وكبرت مسيرتها الإعلامية والمشاهدين بقوا يحبوها .

وفي يوم من الأيام جاتها دعوة من مهرجان دبي للتسوق، وقدّمت فقرة على قناة عجمان.
وبسبب تميزها، عرضوا عليها وظيفة… ووافقت.

وبدأت فصل جديد في الغربة، برضو كمقدمة برامج لكن واجهتها مشاكل جديدة !

اشتغلت في برنامج صباحي، لكن واجهت تحديات، من بينها موضوع الحجاب، لأنو طلبوا منها تظهر بـ”الطرحة”.
فقررت، بكل شجاعة، تتحوّل خلف الكواليس، وتشتغل في الإعداد والإنتاج… بدون ما تتنازل عن مبادئها.

بعدها، انتقلت لتلفزيون أبوظبي، وهناك اشتغلت كمنتجة ومعدة برامج،
وبعدها عملت في تلفزيون دبي لمدة 9 سنوات.

وفي سنة 2023، قررت ترجع للساحة الإعلامية بطريقتها الخاصة

وأطلقت برنامج بودكاست اسمو “هبة كاست”، واستضافت فيه شخصيات سودانية وعربية مهمة، منهم: نانسي عجاج، محمد تروس، والراحل محمد الجزار.

ومن بعدها، التحقت بمنصة عرب كاست، كـ رئيسة تحرير البرامج، وهناك حصل لي الشرف إني أتعرف عليها.

تابعني لو بتحب القصص الملهمة ♥️

01/08/2025

قصة نجاح ملهمة حقيقة 👏🏼👏🏼