02/09/2026
പുതിയ അധ്യയന വർഷം ആരംഭിച്ച പശ്ചാത്തലത്തിൽ ദുബായിലെ അഞ്ഞൂറിലധികം സ്കൂളുകളിലും വിദ്യാഭ്യാസ സ്ഥാപനങ്ങളിലും സുരക്ഷയും ശുചിത്വവും ഉറപ്പാക്കാൻ പരിശോധന കർശനമാക്കി ദുബായ് മുൻസിപ്പാലിറ്റി. മുൻസിപ്പാലിറ്റിയുടെ സിറ്റി ഇൻസ്പെക്ടർമാർ സ്കൂൾ ക്യാന്റീനുകൾ, വാട്ടർ ടാങ്കുകൾ, എയർ കണ്ടീഷണറുകൾ, നീന്തൽക്കുളങ്ങൾ എന്നിവയ്ക്ക് പുറമെ വിദ്യാർത്ഥികൾ ഉപയോഗിക്കുന്ന എണ്ണൂറോളം ഭക്ഷണ പാത്രങ്ങൾ, കുടിവെള്ള ബോട്ടിലുകൾ, സ്കൂൾ യൂണിഫോമുകൾ എന്നിവയും വിശദമായ പരിശോധനയ്ക്കായി ലബോറട്ടറിയിലേക്ക് അയച്ചു. ക്യാന്റീനുകളിൽ വിതരണം ചെയ്യുന്ന ഭക്ഷണത്തിന്റെ ഗുണനിലവാരം ഉറപ്പുവരുത്തുന്നതോടൊപ്പം കെട്ടിടങ്ങളുടെ വെന്റിലേഷൻ, എസി ഫിൽട്ടറുകൾ, കുടിവെള്ള ലഭ്യത എന്നിവ നിർദ്ദിഷ്ട മാനദണ്ഡങ്ങൾ പാലിക്കുന്നുണ്ടോ എന്ന് സുരക്ഷാ ഉദ്യോഗസ്ഥർ നേരിട്ടെത്തി വിലയിരുത്തുന്നുണ്ട്. വിദ്യാർത്ഥികൾക്കും അധ്യാപകർക്കും പൂർണ്ണമായും സുരക്ഷിതവും ആരോഗ്യകരവുമായ പഠനാന്തരീക്ഷം ഒരുക്കുന്നതിനാണ് ഈ വിപുലമായ പരിശോധനയെന്ന് അധികൃതർ വ്യക്തമാക്കി.
