01/01/2026
: تحصیل چیئرمین کی مصالحتی کوشش ناکام، معاملہ دوبارہ الجھ گیا
وانا () گزشتہ دو ہفتوں سے جاری وانا پریس کلب کے اندرونی تنازع کو حل کرنے کے لیے تحصیل چیئرمین مولانا صالح نے گزشتہ روز خوش اسلوبی اور مصالحتی انداز میں کوشش کی، جو ابتدا میں کامیاب دکھائی دی۔
تحصیل چیئرمین کی کاوشوں کے نتیجے میں اس بات پر اتفاق کیا گیا کہ قسمت اللہ کو وانا پریس کلب کا صدر جبکہ محمد وسیم کو جنرل سیکرٹری مقرر کیا جائے گا۔ مولانا صالح نے دونوں عہدیداران کو پابند کیا کہ باقی کابینہ صدر اور جنرل سیکرٹری باہمی مشاورت سے تشکیل دیں گے۔ دونوں فریقین نے اس فیصلے پر رضامندی ظاہر کی اور اجلاس میں طے پایا کہ کابینہ کی باضابطہ تشکیل یکم جنوری کو عمل میں لائی جائے گی۔
اجلاس کے بعد محمد وسیم اور ان کے ساتھی تحصیل چیئرمین کا شکریہ ادا کرتے ہوئے اپنے علاقوں کو روانہ ہو گئے۔ تاہم تقریباً دو گھنٹے بعد صدر منتخب قسمت اللہ اور ان کے ساتھیوں نے تحصیل چیئرمین کے فیصلے کے برعکس یکطرفہ طور پر کابینہ تشکیل دے دی، جس میں تمام عہدیداران کا انتخاب صرف قسمت اللہ کے پینل سے کیا گیا جبکہ جنرل سیکرٹری محمد وسیم کو مکمل طور پر نظر انداز کیا گیا۔
آج صبح محمد وسیم کے ساتھی تحصیل چیئرمین مولانا صالح کے گھر پہنچے اور انہیں تمام صورتحال سے آگاہ کیا، جس پر چیئرمین نے حیرت اور افسوس کا اظہار کیا۔ وسیم کے ساتھیوں نے مؤقف اختیار کیا کہ اگر طے شدہ اصولوں کے مطابق کابینہ باہمی مشاورت سے تشکیل نہ دی گئی تو وہ اپنا آئینی اور قانونی حق محفوظ رکھتے ہیں۔
واضح رہے کہ پریس کلب کے آئین کے مطابق صدر اور جنرل سیکرٹری کے انتخاب کے بعد باقی کابینہ کی تشکیل دونوں منتخب عہدیداران کی مشترکہ مشاورت سے کی جاتی ہے۔ یہ بھی قابلِ ذکر ہے کہ محمد وسیم کے پینل میں دس جبکہ قسمت اللہ کے پینل میں آٹھ رجسٹرڈ ممبران شامل ہیں۔
