20/08/2026
*"غلنئی ہسپتال کی مرمت کے نام پر 70 کروڑ کا ڈاکہ"*
: غریب عوام کے پیسے پر ہاتھ صاف کرنے کی بجائے ہسپتال میں بنیادی کام کیا جائے۔ مولانا محمد عارف حقانی صدر مہمند سیاسی اتحاد ۔
*مہمند:* جے یو آئی ضلع مہمند کے امیر اور مہمند سیاسی اتحاد کے صدر *مولانا محمد عارف حقانی* نے پاکستان پیپلز پارٹی کے *فضل ہادی خان* اور جماعت اسلامی کے *ملک خاندان خان* کے ہمراہ ڈسٹرکٹ ہیڈکوارٹر ہسپتال غلنئی کے جاری مرمتی کام کا تفصیلی دورہ کیا۔
دورے کے بعد جاری کردہ بیان میں مہمند سیاسی اتحاد کے صدر مولانا محمد عارف حقانی نے شدید تحفظات کا اظہار کرتے ہوئے کہا کہ *ورلڈ بینک کے پراجیکٹ کے 70 کروڑ روپے* کو "مرمت" کے نام پر *بغیر ٹینڈر* من پسند ٹھیکہ دار کی جھولی میں ڈالا جا رہا ہے۔
انہوں نے الزام عائد کیا کہ *صوبائی حکومت کے اعلی عہدیدار* کے مبینہ گٹھ جوڑ سے یہ خطیر رقم ضائع کی جا رہی ہے۔
*"بل نکالنے کے لیے اچھی عمارت توڑی جا رہی ہے"*
مولانا عارف حقانی نے کہا کہ افسوس ناک امر یہ ہے کہ ڈسٹرکٹ ہسپتال غلنئی کی جو ٹائلز، چھتیں، دروازے اور کھڑکیاں بالکل قابلِ استعمال اور اچھی حالت میں ہیں، انہیں جان بوجھ کر اکھاڑ کر نئی لگائی جا رہی ہیں۔ مقصد صرف 70 کروڑ کے بل بنانا ہے۔
انہوں نے کہا یہ کھلی ناانصافی ہے کہ ضلع مہمند کے ساڑھے چھ لاکھ آبادی کے لئے واحد ہسپتال میں نئے وارڈز، نئی بلڈنگز ، پینے کے پانی کی اور دیگر سہولت کی شدید ضرورت ہے۔ ڈسٹرکٹ ہسپتال میں واٹر سپلائی کا نظام موجود نہیں۔ اگر یہ 70 کروڑ اس پر خرچ ہوتے تو عوام کو حقیقی ریلیف ملتا۔
*اپ گریڈیشن کے نام پر مذاق*
مولانا محمد عارف حقانی نے مزید کہا کہ صوبائی حکومت نے خود ہی غلنئی ہسپتال کو *کیٹیگری C سے B* میں اپ گریڈ کرنے کی منظوری دی ہے۔ رواں سال کے بجٹ میں اس مد میں صرف *1 ہزار روپے* رکھے گئے ہیں جبکہ اگلے سال فنڈز ملنے پر نئی بلڈنگز اور وارڈز بنیں گے۔
"جب نئی بلڈنگ بننی ہے تو پھر ابھی مرمت پر 70 کروڑ کیوں ضائع کیے جا رہے ہیں؟ چند ماہ بعد یہی سب کچھ دوبارہ توڑ دیا جائے گا"۔
انہوں نے انکشاف کیا کہ اس پورے منصوبے میں *ڈسٹرکٹ ہسپتال کے میڈیکل سپرنٹینڈنٹ* کو بھی آمد و خرچ اور پراجیکٹ سے مکمل لاعلم رکھا گیا ہے.
