08/05/2026
"നിര്മിതബുദ്ധി മനുഷ്യബുദ്ധിയെ അപ്രസക്തമാക്കുമോ?’ ‘എ ഐ എന്റെ തൊഴില് തട്ടിയെടുക്കുമോ?’ ‘ബുദ്ധിവിപ്ലവകാലത്ത് എങ്ങനെയാണ് തൊഴില് അതിജീവനം?’ ഈ ചോദ്യങ്ങള് മനസ്സുകളെ ഭരിക്കുകയാണ്. എന്നാല് മനുഷ്യമഹാ ചരിത്രത്തില് ജീവിതചിത്രങ്ങളെ മാറ്റിവരച്ച സന്ദര്ഭങ്ങള് ഇതുപോലെ ഒരുപാടുണ്ടായിട്ടുണ്ട്; വൈദ്യുതി, റേഡിയോ, പെന്സിലിന്, ഇന്റര്നെറ്റ്, മൊബൈല്ഫോണ്...എന്നാല് നിര്മിതബുദ്ധി കളം നിറയുമ്പോള് തീര്ച്ചയായും നാം ഉണരേണ്ടതുണ്ട്. കാരണം ആവര്ത്തനവിരസമായ അനേകായിരം തൊഴിലുകളെ എ ഐ പിടിച്ചടക്കുന്നുണ്ട്. പരിഹാരം തിരിച്ചറിവുകളിലും വൈദഗ്ധ്യവികസനത്തിലുമാണ്.
എ ഐ യുടെ വരവോടെ പ്രവാസലോകത്തും വലിയ പരിണാമങ്ങള് സംഭവിക്കുകയാണ്. ഗള്ഫ്രാജ്യങ്ങളില് ഈ മാറ്റം ദ്രുതഗതിയിലാണ്. ‘എ ഐ വര്ക്ഫോഴ്സ് ട്രാന്സ്ഫര്മേഷന് പ്രോഗ്രാം’ 2026-ല് തന്നെ നടപ്പിലാക്കാന് ഒരുങ്ങുകയാണ് ദുബായ് സര്കാര്. അരലക്ഷം ഗവണ്മെന്റ് ഉദ്യോഗസ്ഥര്ക് എ ഐ പരിശീലനം നല്കുകയാണവര്. ഭാവിയിലേക്ക് തൊഴിലാളികളെ ഉയര്ത്തുക എന്ന ലക്ഷ്യത്തോടെ സഊദി അറേബ്യയും, ‘നാഷനല് ഡേറ്റ ആന്ഡ് എ ഐ സ്ട്രാറ്റജി’യുമായി മുന്നിലുണ്ട്. അപ്പോള് പുതുതലമുറയിലെയും പഴയതലമുറയിലെയും പരദേശികള് എങ്ങനെയാണ് ക്രിയാത്മകമായി ഈ മാറ്റത്തെ നേരിടേണ്ടത്? ഉത്തരങ്ങളിലേക്ക് ചൂണ്ടുകയാണ് ഈ ലക്കം പ്രധാനസ്റ്റോറി.
എ ഐ തൊഴില്നഷ്ടമാക്കുകയല്ല, നവീകരിക്കാനും ജോലിയില് കൃത്യത കണ്ടെത്താനും നമ്മെ സഹായിക്കുകയാണ് എന്ന ചിന്ത പ്രധാനമാണ്. മാറ്റങ്ങളെ ഉള്ക്കൊള്ളാന് തീര്ച്ചയായും നാം തയ്യാറാകണം. അല്ലെങ്കില് പുറന്തള്ളപ്പെടും. വരുംകാലങ്ങളില് ഓരോ ജോലിയുടെയും ഒഴിവാക്കാന് ആകാത്ത ഭാഗമായി നിര്മിതബുദ്ധി മാറും. ഈ മേഖലയില് മികവ് നേടാന് സൗജന്യമായ പാഠ്യപദ്ധതികള് തന്നെ ലഭ്യമാണ്. ആലോചനയോടെ ഈ നിര്മിതസഹായിയെ ഉപയോഗിക്കുക. ഒരു നിശ്ചിത സംഖ്യ നല്കി ഉപയോഗിക്കാവുന്ന ഡിജിറ്റല് സഹായം പലരുടെയും ജീവിതത്തിന്റെ ഭാഗമായിക്കഴിഞ്ഞു. ചുരുക്കമിതാണ്, സമീപഭാവിയില് തൊഴിലിടങ്ങളില് വലിയ മാറ്റങ്ങള്ക്ക് പുതിയ സാങ്കേതികവിദ്യ തുടക്കം കുറിക്കും. ശാരീരികവും മാനസികവുമായ അധ്വാനങ്ങള് വളരെ എളുപ്പത്തില് എ ഐ ഏറ്റെടുക്കും. തൊഴില് മേഖലയിലെ മാറ്റങ്ങളെ സംബന്ധിച്ച്, നാം ഓരോരുത്തരും അവബോധരാകണം. ഏതൊക്കെ ജോലികളാണ് എ ഐ ഏറ്റെടുക്കുക. ഏതൊക്കെ ഭാഗങ്ങളാണ് എന്റെ തൊഴിലില് നിന്ന് നഷ്ടമാകുക? ഈ ചോദ്യങ്ങള് ചോദിക്കുക. ജാഗ്രതാ നിര്ഭരമായ ഒരു മുന്നറിയിപ്പായി ഈ ലക്കം തുറക്കുക.
__________________________________________
വായിക്കാം, കേൾക്കാം;
പ്രവാസി രിസാലയിൽ
'Risala Update' മൊബൈൽ ആപ്പ് ഡൗൺലോഡ് ചെയ്യാൻ
📌 Download Android App: https://play.google.com/store/apps/details?id=com.risala.update
📌 Download iOS App: https://apps.apple.com/app/id6449769617
𝐏𝐑𝐀𝐕𝐀𝐒𝐈 𝐑𝐈𝐒𝐀𝐋𝐀
facebook: https://www.facebook.com/pravasirisala
instagram: https://www.instagram.com/pravasirisala/
| |
| |
