31/01/2025
ښاغلی جافر هاند و امثالهم هغه خلک دي چې د کرکټ له ادرس له ملت څخه کريډيټ اخلي او د يو کرکټ پوه په توګه يې ځان په ملت پېژندلی او ټپ کړی دی.
هغه څوک چې په کرکټ پوهېږي هغه نو بايد په کرکټ مسلکي وغږېږي او په کوم ځای کې که ستونزه وي مسلکي نقد پرې وکړي.
خو زموږ هاند صاحب ټوله ورځ اپډېټ مالومات خپروي، له ځان يې د لوبغاړو لوډسپيکر جوړ کړی دی هغه کومې خبرې چې لوبغاړي يې په ليګونو، کنفرانسونو او يا په مېډيا کې کوي، هاند صاحب دومره تکليف کوي چې هماغه خبرې فېسبوک کې په ليکلي بڼه خپروي.
هاند صاحب کله هم کرکټ بورډ نقد نکړ چې لوبغاړو ته ولې مياشتې مياشتې کېږي تنخواګانې نه ورکوئ، د کورني کرکټ بورډ پاليسي مو ولې ناکامه ده، لوبغاړي ولې درنه تښتي، له کرکټ نړيوالې شورا څومره مالي ملاتړ لرئ او په کومو ځايونو کې یې مصرفوئ، اوسنۍ بوديجه مو څومره ده؟
د دې تر څنګ لوبغاړي مو ولې له کارمندانو تر پوزې راغلي دي، خپلمنځي اختلافات يې اوج ته رسېدلي؛ نصيب خان يې جلا ډنګوي او ميرويس خان يې جلا ډنګوي.
دا او دې ته ورته ډېر موارد دي چې بايد تخنيکي کسان بحث پرې وکړي، ليکنې پرې وکړي. له بده مرغه زموږ ټول تخنيکي کسان د لوبغاړو په خندا او مجلسونو غږېږي.
که څه هم په تېرو کلونو کې په هاند صاحب باندې د حق السکوت تور هم و، چې هرې ادارې به د دې لپاره چې په دوی نقد ونکړي مياشتينۍ تنخوا به يې ورکوله.
د کرکټ مينوال له هاند صاحب غواړي چې د ګلبدين په ټوکيتوب او د فريد ملک په ګلاليتوب دې وغږيږي خلاف يې نه يو. خو د دې تر څنګ دي د اصلاح لپاره مسلکي نقد هم وکړي او که د تېرو کلونو په څېر د حق السکوت خبره وي؛ بيا تر تېرېږه.
