04/04/2026
ننګرهار کې د طبيعي پېښو له امله ۹ تنه شهيدان او ۲۹ ټپیان
ننګرهار – په ننګرهار ولايت کې د وروستيو طبيعي پېښو له امله د تېرو ۲۴ ساعتونو په ترڅ کې ۹ تنه شهيدان او ۲۹ نور ټپيان شوي دي.
د راپورونو له مخې، په يادو پېښو کې ۹۰ تنه هغه کسان چې د سېلابونو له امله بند پاتې وو، ژغورل شوي دي.
همدارنګه، د دغو پېښو له امله ۳۸۷ کورونه تخريب شوي او پراخې کرنيزې ځمکې او عامه پروژې هم زيانمنې شوې دي.
د ننګرهار والي د دغو ځاني او مالي زيانونو په اړه خواشيني څرګنده کړې او اړوندو ملکي او نظامي ادارو ته يې لارښوونه کړې چې له زيانمنو کورنيو سره بېړنۍ او لازمې مرستې ترسره کړي.
نوموړي زياته کړې چې د اورښتونو پر مهال د اړوندو ادارو چمتووالی تعقيب شوی او ډېر ژر به زيانمنو شويو کورنيو ته لازمې مرستې ورسول شي.
دا هم ويل شوي چې ياد معلومات وروستي نه دي او ښايي په ارقامو کې بدلون راشي
