22/05/2025
د FFWO موسسې په شمول، د یو شمېر نوې رامنځته شوو داخلي مؤسسو استازو، د TSDO په همکارۍ، د اکبر موسسې له مسؤلینو سره یوه مهمه همغږیزه ناسته ترسره کړه. دا ناسته چې د ټولنیز خدمت، مؤسسو ترمنځ د همغږۍ، او د ګډو موخو په پار جوړه شوې وه، د مشارکتي بحثونو یوه ښکلې بېلګه وه.
په ناسته کې د اکبر موسسې غړیتوب ته د داخلي مؤسسو د احتمالي شمولیت او د هغو ترمنځ د اړیکو د لا ښه تنظیم موضوعات وڅېړل شول. ګډونوالو د خدمتونو د مؤثریت، د شفافیت د لوړې کچې، او د منابعو د غوره مدیریت په اړه خپل نظریات وړاندې کړل. ګډونوالو ټینګار وکړ چې د داخلي موسسو یووالی او مؤثره همغږي کولای شي د ټولنیزو ستونزو په حل کې ستره ونډه ولري.
د ناستې په پای کې، ګډونوال د دوامداره همکارۍ، متقابل ملاتړ، او ګډو ابتکاراتو د پیاوړتیا پر لارو چارو هوکړې ته ورسېدل. تمه کېږي چې دغه ډول ناستې به د مؤسسو ترمنځ یو قوي مشارکتي چوکاټ رامنځته کړي او د ټولنې له بېوزله او اړمنو قشرونو سره د مرستې هڅې لا اغېزمنې کړي.
