21/05/2025
د افغانستان ورزشي خبریالان وايي، د ورزشي خبریالانو فدراسیون پخواني رهبري ورته د منلو نه ده او د نوې رهبري د ټاکلو لپاره باید ټاکنې وشي.
دوی وايي، په قانوني ډول د پخوانۍ رهبري موده تېره ده؛ خو لا هم دا مشران له هېواده بهر د افغانستان د ورزشي خبریالانو له نوم ګټه پورته کوي.
په افغانستان کې مېشت دا خبریالان زیاتوي، چې د ورزشي خبریالانو فدراسیون اوسنۍ رهبري، چې قانوني موده یې پوره شوې، په کور دننه له ورزشي خبریالانو، حکومت او ورزشی ادارو سره هیڅ ډول همغږي نه لري.
د سیدعمر سهار په نوم خبریال چې د دغو خبریالانو د انسجام لپاره یې هڅې پیل کړې، پر خپله فیسبوکپاڼه لیکلي چې ډېر ژر به له سره ټاکنې وکړي او نوې رهبري به وټاکي.
د یادونې ده، چې د افغانستان د ورزشي خبریالانو فدراسیون لپاره ۲۰۲۰ کال کې ټاکنې شوې وې، چې د ۲۰۲۴ کال په نومبر میاشت کې یې قانوني موده پوره شوې ده.
