02/04/2026
اقتصاد وزیرلیگی: ۹ ولایتده مینگلب عایله‌لر کوچیشگه مجبور بولگن.
اقتصاد وزیرلیگی افغانستان‌نینگ چیگره منطقه‌لریگه پاکستان‌نینگ سونگگی هجوملری آقیبتیده اون مینگلب عایله‌لر اوی‌لرینی ترک ایتیشگه مجبور بولگنلرینی معلوم قیلگن.
اقتصاد وزیری قاری دین‌محمد حنیف بیر خبری ییغین‌ده ایتیشیچه، حاضرگچه بو هجوملر آقیبتیده مملکت ۹ ولایتیده ۲۷ مینگ ۳۴۴ عایله کوچیشگه مجبور بولگن. اونینگ سوزلریگه کوره، بو عایله‌لر حاضرده قیین انسانی وضعیتده یشه‌ماقده‌لر و تیزلیکده یاردمگه احتیاجلری بار.
حکومتی مقام‌لرنینگ ایتیشیچه، نورستان، کنر، ننگرهار، لغمان، پکتیا، خوست، پکتیکا، زابل و قندهار ولایتلری بو هجوملردن اینگ کوپ زیان کورگن منطقه‌لردن دیر. بو منطقه‌لرنینگ کوپینچه یشاوچیلری اوی‌لری و مال-مولکلرینی قولدن بیریب، خوفسیزراق منطقه‌لرگه پناه تاپگنلر.
اقتصاد وزیری کوچگنلرنینگ وضعیتی‌دن خواطر بیلدیرگن حالده، خلق‌ارا تشکیلاتلردن، خصوصاً بیرلشگن ملت‌لر تشکیلاتی دفتری و یاردم کورسه‌تووچی موسسه‌لردن بو عایله‌لرگه تیز و موثر یاردم کورسه‌تیشنی سوره‌گن. او، باشپناه، ییگولیک ماده‌لر، ساغلیق خدمتلری و ایچیملی سوو کبی اساسی احتیاجلرنینگ بیرینچی اوریندا توریشینی تاکیدله‌گن.
بو وضعیتده، یاردم کورسه‌تووچی تشکیلاتلر هم چیگره منطقه‌لریده انسانی بحران‌نینگ کوچه‌ییشی‌دن آگاهلنتیرگنلر و خلق‌ارا جامعه‌دن کوچگنلرنینگ وضعیتیگه تیزلیکده توجه قیلیشنی طلب قیلگنلر.
www.elmedia.news
