11/10/2025
لغمان کې د کلبونو په کچه لوبو کې د ځلېدلو لوبغاړو تمرینات پیل شول
د افغانستان کرکټ بورډ د ظرفیت لوړونې څانګې په لارښوونه په لغمان ولایت کې د کلبونو په کچه لوبو کې د ځلېدلو لوبغاړو لپاره تمریناتي کمپ پیل شو. د لغمان د کرکټ مسوولین وایي دغه کمپ چې د سپین غر زون د مشر روزونکي تاج ملک عالم او د فزیکي تکړښت روزونکي اسدالله نظري له لوري ترسره کیږي، یوه اونۍ به دوام وکړي، چې ۳۴ لوبغاړي پکې ګډون لري.
د یاد روزنیز تمریناتي کمپ موخه د وزیر محمد اکبر خان دویمې درجې ولایتي سیالیو لپاره د لغمان لوبډله په مسلکي ډول چمتو کول دي. په کمپ کې به لوبغاړو ته د فزیکي وړتیا، تخنیکي مهارتونو، ذهني پیاوړتیا او ستراتیژیک لوبو اړوند روزنه ورکول کېږي.
دا کمپ نه یوازې د ولایتي لوبډلې لپاره د استعدادونو موندلو یو اغېزناک ګام بلل کېږي، بلکې د ځوانو لوبغاړو لپاره یو ښه فرصت دی چې ځانونه ثابت کړي او لوړو کچو ته د رسېدو لپاره بنسټ کیږدي.
