18/07/2025
غزه کې روغتیايي سرچینې وايي چې د اسراییلو له لوري د بریدونو له امله د نن ورځې له پیل راهیسې، ۳۰ کسانو خپل ژوند له لاسه ورکړی دی.
الجزیرې خبري شبکې نن جمعه، جولای ۱۸مه په یوه راپور کې ویلي چې په وژل شویو کې اووه مرسته ترلاسه کوونکي هم شامل دي.
په راپور کې ویل شوي چې د قربانیانو منځ کې دوه کسان د رفح شمال لوېدیځ الشکوش په سیمه کې وژل شوي دي.
په قربانیانو کې هغه درې کسان هم شامل دي چې د غزې ښار د ختیځې برخې په طوفه ګاونډ کې د اسراییلو په برید کې وژل شوي وو.
په غزه کې د اسراییلو له لوري د روانو بریدونو پیل راهیسې تر دې مهاله څه باندې ۵۸زره کسانو خپل ژوند له لاسه ورکړی دی.
د بریدونو پرمهال شاوخوا ۱۴۰زره کسان ټپیان شوي او زرګونه کورنۍ د روانې جګړې له امله له خپلو مېنو بېځایه شوي دي.
#سلاموطندار
