17/09/2025
سر له سبا، د انټرنېټ د نشتوالي له امله به په هغو ولایتونو کې چې د فایبر نوري شبکې بندې شي، لاندې ادارې او خدمتونه له فعالیت څخه ولوېږي او جدي ستونزې به رامنځته شي:
۱. ټول مخابراتي واړه شرکتونه به بند شي.
۲. ټول بانکونه به د انټرنېټي سیستمونو د نشتوالي له امله غیرفعاله شي.
۳. هغه روغتونونه چې انټرنېټي سیسټمونو ته اړتیا لري، فعالیت به یې ځنډېږي.
۴. د احصایې ادارې به د معلوماتو د پروسس نشتوالي له امله بندې پاتې شي.
۵. د پاسپورټ ادارې به د خدماتو وړاندې کولو توان ونه لري.
۶. د مخابراتو ادارې به خپل فعالیتونه ودروي.
۷. د بهرنیو چارو وزارت اړوند زیاتره مدیریتونه به غیرفعاله وي.
۸. ټولې قونسلګرۍ به خپل کارونه وځنډوي.
۹. د هوايي ټکټونو شرکتونه به وتړل شي.
۱۰. د هوايي پروازونو کنټرول سیسټم به فلج شي.
۱۱. د الوتکو د پروازونو د معلوماتو او تنظیم سیسټم به هم بند شي.
12. وزارتونو اي ټي شعبي به بيکاره شي
13. پوهنتونونو څيړنيز شعبي به بندي شي
د ادارو عایدات به له نامعلوم برخلیک سره مخ شي، او ښايي دا پیسې د ناسم مدیریت یا غلا له امله ضایع شي. د حیرتان بندر به وتړل شي، د ګمرک عایدات به له منځه ولاړ شي، او خصوصي بانکونه به د پیسو د راکړې-ورکړې توان ونه لري. د افغانستان بانک د ټولو زونونو استازولي به هم غیرفعاله شي، او ټولې تعرفې به بندې شي.
په دغو ولایتونو کې سوداګر او پانګوال چې هره ورځ لویې راکړې-ورکړې ترسره کوي، له جدي خنډونو سره به مخ شي. دا حالت به د بازار د نقدینې کمښت لامل شي، د افغانیو ارزښت به راټیټ شي، او د تېلو، ګازو او خوراکي توکو بیې به په چټکۍ لوړې شي. دا ټول به د اقتصادي بحران او ټولنیزو ستونزو د پراخېدو لامل وګرځي.
