14/05/2026
Shqipëria ngjitet sonte në skenën e Eurovision-it me “Nan”
ATSH/ Mbrëmjen e sotme, këngëtari Alis do të ngjitet në skenën e arenën “Wiener Stadthalle” në Vjenë, në kuadër të edicionit të 70-të të “Eurovision Song Contest”.
Alis do të përfaqësojë Shqipërinë me këngën “Nan”, në gjysmëfinalen e dytë të festivalit më të madh muzikor në Evropë, i cili çeli siparin e tij ditën e mërkurë.
Pas provës gjenerale të zhvilluar një ditë më parë, artisti shqiptar synon të sigurojë një vend në natën finale të Eurovision-it, që do të mbahet të shtunën. Kënga “Nan” përcjell një mesazh të fuqishëm dhe emocional mbi figurën e nënës në familjen shqiptare.
Sipas rregullores së Eurovision-it, shqiptarët që ndodhen brenda territorit të Shqipërisë nuk mund të votojnë për përfaqësuesin e vendit të tyre. Për këtë arsye, mbështetja kryesore pritet të vijë nga diaspora shqiptare dhe publiku jashtë vendit.
Shqipëria do të konkurrojë sonte së bashku me 14 shtete të tjera, mes tyre Bullgaria, Azerbajxhani, Rumania, Luksemburgu, Çekia, Armenia, Zvicra, Qiproja, Letonia, Danimarka, Australia, Ukraina, Malta dhe Norvegjia.
Me moton “Të Bashkuar nga Muzika”, 35 vende konkurrojnë për kurorën e Eurovision-it, ndërsa ky vit shënon rikthimin e Austrisë si vend mikpritës pas 11 vitesh, falë fitores së JJ në vitin 2025.
/a.f/r.e/
