21/12/2025
Festat e fundvitit gjallërojnë Divjakën.!
Dhjetori ka sjellë një pamje ndryshe për qytetin e Divjakës. Qendra e qytetit është zbukuruar me ndriçime shumëngjyrëshe, pemë festive dhe shtëpiza druri që japin një frymë europiane. Megjithatë, pavarësisht përpjekjeve për ta gjallëruar qytetin, pjesëmarrja e qytetarëve në mbrëmjet festive është e vakët, me një interes të moderuar ndaj aktiviteteve të ofruara.
Në sheshin qendror, ku janë organizuar koncerte me DJ dhe këngëtarë të njohur, atmosfera është e ngrohtë por jo e mbushur, ndërsa banorët e kthyer nga emigracioni dhe pak familje vendase shijojnë muzikën dhe ofertat ushqimore.
Disa prej të pranishmëve shprehen se festa të tilla janë të domosdoshme për ta thyer monotoninë e dimrit dhe për të nxitur jetën sociale në qytet, ndërsa të tjerë theksojnë nevojën për më shumë organizim dhe promovim.
Qëllimi i këtyre aktiviteteve është që Divjaka të mos mbetet vetëm një destinacion veror, por të pulsojë edhe në muajt e ftohtë me ngjyra, muzikë dhe jetë urbane.
Nga Gazetari Ndricim Gjoshi !
