https://www.facebook.com/105327582046592/

Lezha Press, Shëtitorja Gjergj Fishta,, Shqipëria, Lezhë (2026)

13/06/2026

Festa e Shna Ndout ne Laç, mijera pelegrinj ju bashkuan ritualit fetar.Besimtari: Lutem qe te rrezohet edhe qeveria e diktatorit Edi Rama

Me pjesëmarrjen e mijëra pelegrinëve nga qytete të ndryshme të Shqipërisë por edhe jashtë saj, është përmbyllur pelegrinazhi 13-javor në Kishën e Shna Ndout në Laç.Kremtimi kulmoi mbrëmjen e 12 qershorit, ku të shumtë ishin besimtarët që e kaluan natën në lutje pranë ambienteve të kishës, në pritje të ditës së festës së Shna Ndout.Të krishterë e myslimanë thone se Kisha e Shna Ndout është një vend i shenjtë ku kanë gjetur paqe shpirtërore, shpresë dhe forcë për të përballuar vështirësitë e jetës, ndaj rikthehen çdo vit per te adresuar lutjet e tyre.

Per mbarevajtjen e pelegrinazhit dhe garantimin e rendit dhe sigurisë, u angazhuan forca të shumta policie, si dhe ekipet e ndihmës së shpejtë mjekësore, ndersa fatmiresisht nuk u refgjistruan incidente.Kisha e Shna Ndout në Laç mbetet një prej pikave më të rëndësishme të pelegrinazhit fetar në Shqipëri. Ritualet e shenjta nisin në mesin e muajit mars, me të martën e parë të pelegrinazhit, dhe përfundojnë më 13 qershor, ditën kur kremtohet festa e këtij shenjti. Çdo vit, mijëra besimtarë zgjedhin të ngjiten drejt kishës për t’u lutur dhe për të ripërtërirë besimin e tyre, duke e kthyer këtë pelegrinazh në një nga traditat më të rëndësishme fetare në vend.

13/06/2026

Atletja Alisa Boçi shpallet kampione në not dhe sjell në Lezhë 2 medalje.

Turneu Kombëtar i Notit Special Olimpik u zhvillua sot në Tirana Aqua Park.
Ky event është një mundësi përgatitore për atletët që synojnë Lojërat Olimpike Speciale "Santiago 2027".

Atletja lezhjane Alisa Boçi mori pjesë denjësisht në këtë turne duke sjellë në Lezhë 2 medalje, një të vendit të parë dhe një të vendit të dytë.
Alisa Boçi u shpall kampione në garen 25 metër stil i lirë dhe nënkampione në 50 metër stil i lirë.

Ky aktivitet promovon përfshirjen, barazinë dhe fuqizimin e personave me aftësi të kufizuara intelektuale përmes sportit. Turneu shërben gjithashtu si një hap i rëndësishëm në procesin e përzgjedhjes së atletëve që do të përfaqësojnë Shqipërinë në Lojërat Olimpike Speciale “Santiago 2027”.

Atletja lezhjane Alisa Boçi ka marrë pjesë në vitin 2024 në garën e notit, në Kampionatin Rajonal Olimpik Special të organizuar nga Olimpiada Speciale e Maqedonisë së Veriut në disiplinën e notit 25m dhe 50m stil i lirë dhe solli në Shqipëri medaljen e vendit të tretë.

Ndërsa në qershor të vitit 2023 mori pjesë në "Lojrat Botërore Olimpike Speciale Berlin 2023", duke fituar medaljen e vendit të pestë për disiplinën e notit 25 m stil i lirë.

Kampione në 25 m dhe nënkampione në 50 m, Alisa Boçi do të jetë një ndër pjesënarrëset në Lojrat Olimpike Speciale "Santiago 227".
Alisa Jak Boçi me talentin, vendosmërinë dhe guximin e saj si edhe me mbështetjen e prindërve prej 3 vitesh merr pjesë në garat e notit mes atleteve nga e gjithë bota, edhe pse vështirësitë për t'u stërvitur janë të mëdha, pasi në Lezhë nuk ka ekip noti apo mundësi stërvitjeje.

Atletja Alisa Boçi ka forcë muskulore në krah, rrëshqitje natyrale në ujë, aftësi të mbajtjes së frymës në ujë, dhe noti është sporti i saj i preferuar, dhe ëndrra e kampiones është që të sjellë në Shqipëri medaljen e artë nga garat ndërkombëtare.

Lindita Kokaj

13/06/2026

"PETICION" KUNDËR LARGIMIT TË MURGESHAVE NË RUBIK
Komuniteti i Mirditës kërkon vijimin e misionit të motrave, të cilat për më shumë se dy dekada kanë ndihmuar qindra njerëz në nevojë

Për më shumë se dy dekada, ato i kanë dhënë gjallëri zonës së Rubikut dhe kanë ndihmuar qindra familje e persona në nevojë, por misioni i tyre pritet të përfundojë në muajin shtator. Bëhet fjalë për tri murgeshat e kongregatës “Motrat e Dashurisë së Shenjtës Xhovana Antida Thouret”, të cilat prej vitesh zhvillojnë veprimtari bamirëse dhe sociale në këtë zonë.Vendimi për ndërprerjen e misionit të tyre po kundërshtohet nga komuniteti mirditor. Prej disa ditësh, banorët kanë nisur firmosjen e një peticioni me qëllim sensibilizimin e strukturave vendimmarrëse për të lejuar vazhdimin e shërbimit të motrave në Rubik.Sipas banorëve, institucioni social i drejtuar nga murgeshat ka bërë më shumë se pushteti për komunitetin, duke sjellë shpresë dhe mbështetje për shumë njerëz. Kontributi i tyre ka qenë i dukshëm në edukimin dhe argëtimin e fëmijëve, si dhe në ndihmën ndaj të moshuarve dhe familjeve në vështirësi ekonomike.

Edhe bashkëpunëtorët e motrave kërkojnë që misioni i tyre të vazhdojë, duke i cilësuar ato si një shtyllë të rëndësishme të jetës sociale, edukative, kulturore dhe shpirtërore të Rubikut.

Në harkun kohor të pak ditëve janë mbledhur rreth 1 mijë firma. Peticioni do t’u dërgohet strukturave vendimmarrëse të klerit katolik në Itali dhe Francë, me kërkesën që misioni i “Motrave të Dashurisë” në Rubik të vijojë edhe pas muajit shtator.

13/06/2026

Rinovimi i patentave dhe pagesa e taksës së automjeteve tashmë kryhen në Lezhë

Banorët e Bashkise Lezhë do të kenë më pranë një sërë shërbimesh të transportit rrugor, pasi Drejtoria e Përgjithshme e Shërbimeve të Transportit Rrugor (DPSHTRR) ka hapur zyrë të re shërbimi pranë sporteleve me një ndalesë në ambientet e Bashkisë Lezhë.

Përmes këtyre sporteleve, qytetarët mund të kryejnë disa nga procedurat më të kërkuara pa pasur nevojë të udhëtojnë drejt Laçit. Shërbimet që ofrohen përfshijnë aplikimin dhe rinovimin e lejeve të drejtimit, aplikimin dhe rinovimin e Certifikatës së Aftësisë Profesionale (CAP), pajisjen me leje drejtimi ndërkombëtare, si dhe procedurat për lejeqarkullimin ndërkombëtar të mjeteve.

Gjithashtu, në këto sportele mund të kryhen pagesat e gjobave të kontrollit teknik të automjeteve (KTV), pagesa e taksës vjetore të mjetit, si dhe transferimi i dosjes së drejtuesit të mjetit.

Sipas DPSHTRR-së, zgjerimi i rrjetit të shërbimeve synon t’i afrojë sa më shumë institucionet me qytetarët, duke reduktuar kohën dhe kostot për marrjen e dokumenteve dhe kryerjen e procedurave administrative.

Pika e re e shërbimit ndodhet në ambientet e Bashkisë Lezhë, në Sheshin “Gjergj Kastrioti”, ku qytetarët mund të paraqiten për të përfituar nga shërbimet e ofruara nga DPSHTRR.

13/06/2026

Lezhë/ Finalizohet operacioni “Llogaritë”, zbardhen vjedhjet e xhirove ditore në 12 subjekte

Policia e Lezhës ka finalizuar operacionin e koduar “Llogaritë”, duke zbardhur një seri vjedhjesh të ndodhura gjatë muajve të fundit në qytet.

Në kuadër të këtij operacioni është vënë në pranga shtetasi Manuel Medja, 21 vjeç, banues në Lezhë, ndërsa është shpallur në kërkim bashkëpunëtori i tij, shtetasi Elger Uka, 26 vjeç.

Sipas Policisë, dy të rinjtë dyshohet se në bashkëpunim me njëri-tjetrin kanë vjedhur xhirot ditore në 12 subjekte të ndryshme në qytetin e Lezhës, gjatë muajve maj dhe qershor 2026.

Operacioni u zhvillua pas kallëzimeve të bëra nga disa qytetarë, të cilët raportuan vjedhjen e të ardhurave ditore në bizneset që administronin. Si rezultat i veprimeve të shpejta hetimore, autoritetet arritën të identifikojnë dhe të ndalojnë njërin prej autorëve të dyshuar.

Ndërkohë, vijon puna për kapjen e 26-vjeçarit të shpallur në kërkim, si dhe për zbardhjen e rasteve të tjera të vjedhjeve që mund të jenë kryer nga këta shtetas.

Materialet procedurale i janë referuar Prokurorisë së Lezhës për veprime të mëtejshme.

12/06/2026

Thirrje për aplikim.
H.A.N.A Youth Center hap International Youth Newsroom për të rinjtë

Në kuadër të projektit “EU FACTOR”, të financuar nga Bashkimi Europian, H.A.N.A Youth Center ka shpallur thirrjen për aplikim për të rinjtë që duan të angazhohen në fushën e gazetarisë digjitale, fact-checking dhe krijimit të përmbajtjes.

Kjo iniciativë synon të përfshijë të rinj të moshës 15–29 vjeç, që jetojnë në ose pranë Lezhës, duke u ofruar mundësinë të bëhen pjesë e një ekipi rinor ndërkombëtar së bashku me bashkëmoshatarë nga Shqipëria, Franca dhe Italia.

Të përzgjedhurit do të kenë mundësi të zhvillojnë aftësi praktike në raportim, verifikim faktesh dhe prodhim përmbajtjeje, duke kontribuar në një newsroom ndërkombëtar të dedikuar për të rinjtë.

Afati i fundit për aplikim është 31 korrik 2026.

Të interesuarit mund të aplikojnë përmes formularit online në linkun:
https://forms.gle/gsM2okuNB6RaqtHf6

12/06/2026

Mbahet në Lezhë dita olimpike.
Disiplinat sportive prezantojnë sukseset e tyre.

Në kuadër të Ditës Olimpike, qyteti i Lezhës u shndërrua në një arenë të vërtetë sportive, ku u prezantuan disiplinat që mbështeten nga bashkia dhe arritjet që sportistët lezhjane kanë regjistruar në vite. Sheshi Gjergj Kastrioti u mbush me energji, demonstrime dhe pasion, duke përcjellë një mesazh të qartë, sporti nuk është vetem medalje por edhe rruga drejt një jete aktive dhe të shëndetshme.

Përfaqësues të pushtetit vendor, Komitetit Olimpik dhe arsimit theksuan se investimi në sport nuk matet vetëm me podiume dhe medalje, por me ndikimin që ai ka në formimin e të rinjve, duke i orientuar drejt disiplinës, përkushtimit dhe frymës së garës së ndershme.

Ky aktivitet erdhi si një thirrje e hapur për fëmijët dhe të rinjtë që t’i bashkohen botës së sportit, ndërsa u ritheksua angazhimi për ta kthyer Lezhën në një qendër të zhvillimit sportiv në nivel kombëtar.

12/06/2026

Lezha investon në riciklim. Qyteti drejt një modeli të ri për menaxhimin e mbetjeve

Transformimi i sistemit të pastrimit në Lezhë po shoqërohet me investime të reja që synojnë reduktimin e ndotjes dhe rritjen e riciklimit. Pas ndryshimeve të ndërmarra në grumbullimin e mbetjeve urbane, Bashkia e Lezhës ka nisur ndërtimin e një qendre të posaçme riciklimi, projekt që po realizohet me mbështetjen e organizatës gjermane GIZ.

Bashkia e konsideron këtë investim si një element kyç të reformës së re në sektorin e pastrimit, e cila ka sjellë një mënyrë tjetër organizimi për depozitimin dhe grumbullimin e mbetjeve nga qytetarët dhe bizneset.

Kryebashkiaku Pjerin Ndreu deklaroi se qendra e riciklimit do të ndikojë në uljen e volumit të mbetjeve që transportohen drejt landfillit, duke krijuar një sistem më efikas dhe më pak të kushtueshëm për komunitetin. Ai theksoi se ndarja e mbetjeve sipas kategorive do të ketë përfitime të drejtpërdrejta edhe për familjet dhe bizneset, të cilat mund të përfitojnë lehtësime në tarifën e pastrimit.

Përfaqësuesit e GIZ vlerësuan Lezhën si bashkinë e parë në vend që po zbaton në praktikë një model të tillë menaxhimi. Sipas tyre, standardet që po aplikohen aktualisht në qytet janë në përputhje me politikat europiane për ekonominë qarkulluese dhe mbrojtjen e mjedisit.

Ata bënë të ditur se ndarja e mbetjeve në burim dhe proceset e riciklimit pritet të marrin një bazë të detyrueshme ligjore në Shqipëri nga viti 2027, në kuadër të përafrimit të legjislacionit me atë të Bashkimit Europian.

Që prej muajit qershor, administrimi i shërbimit të pastrimit është marrë drejtpërdrejt nga Bashkia e Lezhës. Ndryshimet e para kanë përfshirë organizimin me orare të përcaktuara për nxjerrjen e mbetjeve dhe heqjen graduale të koshave në disa zona, një model që sipas bashkisë është pritur pozitivisht nga pjesa më e madhe e qytetarëve.

Me ngritjen e qendrës së riciklimit, Lezha synon të ulë sasinë e mbetjeve që depozitohen në landfill, duke u orientuar drejt një sistemi më modern dhe më të qëndrueshëm të menaxhimit të tyre, në përputhje me praktikat që zbatohen në vendet e Bashkimit Europian.

11/06/2026

Uji i Lezhës nuk pihet më, por askush nuk jep shpjegime

Prej disa muajsh, uji që del nga çezmat e lezhjanëve nuk konsiderohet më i pijshëm. Aroma e fortë e klorit është kthyer në një shqetësim të përditshëm, ndërsa në raste të caktuara qytetarët raportojnë se uji shfaqet edhe i ndotur. Megjithatë, ata që kanë detyrimin të japin shpjegime vazhdojnë të heshtin.

Në të njëjtën kohë, është rritur ndjeshëm konsumi i ujit të ambalazhuar. Familjet po shpenzojnë çdo muaj më shumë për të blerë ujë në supermarkete, ndërsa vazhdojnë të paguajnë edhe faturat e ujësjellësit për një shërbim që duhej të garantonte furnizim me ujë të pijshëm.

Heshtja e institucioneve po ngre gjithnjë e më shumë pikëpyetje. Pse nuk publikohen analizat e ujit? Pse nuk ka një shpjegim zyrtar për ndryshimin e cilësisë? Çfarë ka ndodhur me një ujë që deri pak muaj më parë konsiderohej i pijshëm?

Madje, në mungesë të transparencës, lindin edhe dyshime që në kushte normale do të dukeshin absurde: a po përfiton dikush nga kjo situatë? A është e rastësishme që cilësia e ujit ka rënë ndërsa sh*tjet e ujit të ambalazhuar janë rritur? A kanë blerë kompanitë e prodhimit të ujit heshtjen e institucioneve, apo kemi të bëjmë me një neglizhencë që po rëndon xhepat e qytetarëve? Këto janë pyetje që kërkojnë përgjigje dhe jo heshtje.

Aq më tepër kur asgjë tjetër nuk duket se ka ndryshuar. Nuk ka ndryshuar rrjeti i ujësjellësit, i cili është bërë tërësisht pak vite më parë, nuk kanë ndryshuar tubacionet apo çezmat e qytetarëve. Miliona euro janë investuar në sistemin e furnizimit me ujë të pijshëm. E vetmja gjë që ka ndryshuar është cilësia e ujit që del sot nga rubinetat.

Bashkia Lezhë, ndërmarrja e ujësjellësit, Zyra për Mbrojtjen e Konsumatorit, Njësia Vendore e Kujdesit Shëndetësor dhe Inspektoriati duhet të flasin, të publikojnë analizat dhe të japin zgjidhje. Sepse kur qytetarët pyesin dhe institucionet heshtin, përgjegjësia bie mbi ata që nuk japin llogari.

Lezha Press

13/06/2026

13/06/2026

13/06/2026

13/06/2026

13/06/2026

12/06/2026

12/06/2026

12/06/2026

11/06/2026

Address

Website

Alerts

Contact The Business

Shortcuts

Share

Category