09/06/2026
Jashtë rrezikut për jetën efektivi i plagosur në Maliq.
Efektivi i Policisë së Shtetit, Edison Adri, i cili mbeti i plagosur gjatë ngjarjes së rëndë të ndodhur në fshatin Bode ne Maliq, ka kaluar rrezikun për jetën.
36-vjeçari vijon të jetë i shtruar në Spitalin e Traumës në Tiranë, ku po merr trajtim të specializuar mjekësor. Sipas burimeve mjekësore, gjendja e tij shëndetësore është stabilizuar dhe aktualisht ai ndodhet jashtë rrezikut për jetën.
Mjekët bëjnë me dije se efektivi do të vazhdojë të qëndrojë nën kujdesin e tyre deri në rehabilitimin e plotë, ndërsa po i nënshtrohet procedurave të nevojshme për rikuperim.
Edison Adri u transportua me urgjencë drejt Spitalit të Traumës pas plagosjes së pësuar në ngjarjen e rëndë në Maliq. Ndërkohë, autoritetet po vijojnë hetimet për zbardhjen e plotë të rrethanave të kësaj ngjarjeje.
Lajmi për përmirësimin e gjendjes së tij shëndetësore është pritur me lehtësim nga familjarët, kolegët dhe qytetarët që kanë ndjekur me shqetësim zhvillimet e fundit.
