05/01/2026
Vangjel Zguro bën parashikim: Pogradeci në fund të sezonit shpallet kampion i Kategorisë së Parë
Kapiteni i Pogradecit, Vangjel Zguro, është nga ata futbollistë i cili përveç performancës prej lideri në fushën e lojës, shquhet për deklaratat e tij të drejtpërdrejta në studiot televizive.
Në një lidhje të drejtpërdrejtë për emisionin “Mega Sport” nga Altin Sulçe në A2 CNN, 32-vjeçari ka folur me doza optimiste, duke besuar se në fund të sezonit, skuadra liqenore do të shpallet kampione e Kategorisë së Parë, pavarësisht diferencës prej 8 pikësh nga kryesuesit e Skënderbeut.
“Duroni dhe nja 4 muaj dhe do të jemi në Superiore. Të sigurt s’ka asgjë, por do ta provojmë siç e provuam vjet. Kur ika nga Partizani iu thashë që Pogradeci ka një projekt të madh.
Vjet nuk ishte fati me ne, po e vazhdojmë tani, shpresojmë që ta realizojmë këtë sezon. Kemi dy rivalë të fortë si Skënderbeu dhe Laçi.
Trajneri Çela ka gjetur çelësin e suksesit, të gjithë lojtarëve po iu merr maksimumin. Shpresojmë që të mbajmë ritmin dhe shumë shpejt të kapim dy vendet e para. Skënderbeu dhe Laçi e kanë super të vështirë me ne.
Dy ndeshje me Laçin kemi 4 pikë, dy ndeshje me Korçën kemi 3 pikë. Po ta kapim nga përvoja, s’duhet të dalë Egnatia kampion fare, t’ia japin këtyre ekipeve me eksperiencë”, tha Zguro.
