06/12/2025
Myftiu i Pukës Kopani: 61.7% e besimtarëve myslimanë janë larguar / Fshatrat të boshatisura
Myftiu i Pukës, Gezim Kopani, ngre alarmin për largimin masiv të besimtarëve myslimanë dhe boshatisjen e fshatrave në rrethin e Pukës.
Përmes një studimi të kryer për periudhën 2005–2025, bazuar në arkivin e Myftinisë së Pukës dhe të dhënat e aktiviteteve fetare, sociale dhe arsimore, Myftiu Kopani thotë se rrethi ka humbur rreth 61.7% të besimtarëve myslimanë, krahasuar me periudhën para viteve 1991–2005.
Sipas tij, emigracioni dhe lëvizjet e brendshme kanë boshatisur pothuajse të gjitha fshatrat me popullsi myslimane, si Pezhve, Meçe, Flet, Kulumri, Blerim (Sakat) dhe zonat e tjera të theksuara në studim.
Edhe qytetet Pukë dhe Fushë-Arrëz janë prekur rëndë nga largimet.
Censi 2023 e rendit Pukën me vetëm 11 100 banorë, shumë më pak se në vitin 1930, kur numëroheshin 14 437 banorë.
Rënia e popullsisë prek sidomos familjet me fëmijë dhe të rinjtë.
Sipas studimit, 40% e familjeve me fëmijë janë larguar nga qyteti, ndërsa 65% nga fshatrat.
Ndërkohë, nga të rinjtë, 78% e djemve dhe 59% e vajzave kanë braktisur rrethin.
Kopani shprehet se kjo situatë reflektohet dukshëm edhe në regjistrat e mejtepeve, ku vit pas viti numri i fëmijëve që ndjekin mësimin fetar vazhdon të bjerë.
Statusi i plotë i Myftiut Kopani:
"Për shkak të detyrës time 20-vjeçare si Myfti i rrethit Pukë, vendosa të bëj një studim mbi lëvizjen e besimtarëve myslimanë të rrethit Pukë. Pjesë e këtij studimi janë vendet: Pukë, Fushë-Arrëz, Qerret, Dedaj, Kabash, Meçe, Rrapë, Pezhve, Micoj, Vilë, Kryezi, Iballë, Flet, Xath, Kulumri, Blerim (Sakat) dhe Truen.
Nga të dhënat që kam grumbulluar ndër vite, por edhe në bazë të arkivit të Myftinisë Pukë të dalë nga aktivitetet sociale, fetare, arsimore etj., rezulton se:
Nga fillimi i vitit 2005 deri në fund të vitit 2025 përqindja e myslimanëve të larguar nga rrethi i Pukës është afërsisht 61.7%, në krahasim me përqindjen e myslimanëve para viteve 1991–2005, duke ulur ndjeshëm përqindjen e myslimanëve në rrethin e Pukës.
Si pasojë e largimit apo emigracionit etj., janë boshatisur pothuajse të gjithë fshatrat myslimanë, dhe jo vetëm. Kjo dallohet sidomos në: Pezhve, Meçe, Flet, Kulumri, Blerim (Sakat) etj. Largim të frikshëm ka edhe qyteti i Pukës dhe i Fushë-Arrëzit, të cilat, sipas CENS 2023, si rreth, Puka nuk ka më shumë se 11 100 banorë, shumë më pak se në vitin 1930 ku rrethi i Pukës kishte 14 437 banorë.
Një tregues tjetër shumë negativ është largimi i jashtëzakonshëm i familjarëve me fëmijë dhe largimi i rinisë. Nga vendbanimet e shënuara në grafik përqindja e familjeve me fëmijë të larguar është: qytet 40%, ndërsa në fshat 65%. Kjo fare lehtë mund të dallohet edhe në shkollat e fshatrave të sipërpërmendur. Ndërsa rinia e larguar sipas gjinisë afërsisht është: 78% djem dhe 59% vajza.
Ulja e rinisë dhe e fëmijëve reflektohet edhe në regjistrat e mejtepeve, ku çdo vit sa vjen dhe ulet numri i tyre, kjo për shkak të hemorragjisë së jashtëzakonshme që rrethi i Pukës ka përjetuar dhe po vazhdon të përjetojë!
VEMENDJE!
Studimi është vetëm për efekt analize për mbarëvajtje të punës time dhe nuk ka asnjë qëllim tjetër."
