Portali Veriu Sot

09/10/2026

🇦🇱 Shqipëri - Uells 🏴󠁧󠁢󠁷󠁬󠁳󠁿
Play-off ⚽ | FIFA Women's World Cup 🏆
📆 9 tetor | 🕑 18:00 | 🏟️ “Loro Boriçi”
🎟️ Hyrja falas

09/10/2026

Harta me 46 bashki në duart e Presidentit, Begaj ka 20 ditë kohë për vendimin.

Harta e re territoriale, që parashikon reduktimin e numrit të bashkive në 46, pritet të kalojë në shqyrtimin e Presidentit të Republikës, Bajram Begaj. Kreu i shtetit do të ketë 20 ditë kohë për të vendosur nëse do ta dekretojë ligjin, do ta kthejë për rishqyrtim apo do të lejojë hyrjen e tij në fuqi pa një vendim të shprehur.

Reforma parashikon shkrirjen e 15 bashkive, duke e vendosur Presidentin përballë një vendimmarrjeje të rëndësishme për organizimin e ri të pushtetit vendor.

09/10/2026

"Kam 13 orë që pres të dëgjoj justifikimin e Erion Braçes për votën pro reformës territoriale. Hiçgjë ende. Erioni po mendohet. Akoma! Dhe do të mendohet gjatë se si e lëpiu atë që pështyu me neveri, kur kundërshtonte siç do të bënte çdo njeri me integritet.

Çfarë ndryshoi? Presioni, shantazhi, apo “dashuria” për partinë doli më e fortë se bindjet? Po ç’do humbiste Braçja nëse përjashtohej? Asgjë! Veç i fituar do të dilte: para njerëzve që e kanë votuar, para atyre që i kanë besuar dhe para atyre që nisën ta simpatizonin pikërisht për kundërshtimin e një reforme asgjësuese.

Sa pak burrëri! Sa pak këllqe nga një njeri me 30 e kusur vite si deputet! Çfarë hendeku mes asaj që mendon dhe thotë dhe asaj që bën. Erion Braçe kishte shansin të hynte në histori për qëndresën e tij, ashtu si Mariana Koçeku. Mjerisht, zgjodhi rreshtimin. Do të mbahet mend vetëm si një koleg i Zeqinesë, e cila të paktën është më e sinqertë në puthadoren e saj!

Fundja asgjë e re nga fronti i socialistëve të Ramës (se atë të Nanos e ka harruar Erioni). Nënshtrimi i kafshës ndaj të zotit është total dhe ka shkërmoqur çdo ndërgjegje njerëzore apo politike. Ndaj me vjen ta mbyll me një shprehje të Fatos Nanos: Ti Erion nuk vlen as sa një lavatriçe! "

Shkruan Beti Njuma, gazetare, opinioniste

09/10/2026

Kryeministri Edi Rama ka marrë pjesë sot në një takim ku u prezantua platforma ‘Shkalla e Meritës’, e cila ka si qëllim përmirësimin e punës në administratën publike, për të ndihmuar vendin në rrugën drejt anëtarësimit në BE.

Gjatë fjalës së tij Rama tha se platforma ka si qëllim vendosjen e ‘Meritës’ në administratë, për të garantuar që gjithësecili të vlerësohet sipas punës që bën.

Rama tha se në sistemin e ri Qeveria do të ketë si aleat Inteligjencën Artificiale dhe shtoi se konkurset që do të zhvillohen për një vend pune, do të kenë një nivel të lartë transparence.

“Për të gjithë ata që në Shqipëri apo jashtë Shqipërisë që duan të bëhen pjesë e administratës, do të duhet ta paraqesin në mënyrë proaktive disponimin e tyre. Të gjithë do të kenë mundësinë që të marrin pjesë në konkurse që do të jenë të një niveli tjetër për nga transparenca. Do të përpiqemi që jo vetëm rekrutimet, por edhe karriera të mbështetet në të dhëna të disponueshme nga shteti shqiptar, përtej raportit të individit me një epror.

E fundit që kam është ajo që ndodh me ekselencën dhe me ata që hyjnë për të bërë një program njohjeje apo për të hedhur një hap drejt administratës, të cilët në shumë raste, pasi iu mbaron viti i punës, mbeten jashtë sistemit dhe përballen me një pamundësi për të vijuar edhe në rastet kur janë shumë të mirë. Kjo duhet parë me kujdes, që të mos kemi një ndërprerje brutale të marrëdhënies, në pikën që shumëkush pastaj nis e krijon idera në kohë si ‘kjo ndodhi si rezultat që nuk kisha mik’.

Shkalla e Meritës është një tjetër komponent i një sistemi të ri ku ne do të kemi aleat inteligjencën artificiale dhe ku përmes saj do të mund të bëjmë shumë më tepër në funksion të transparencës dhe mbledhjes së të dhënave të proceseve që na japin të kuptojmë ekzaktësisht që deri ku ne arrijmë qoftë në thellësinë e informimit të njerëzve të interesuar për t’u bërë pjesë e administratës, qoftë edhe në garancitë për secilin që përpjekja për t’u bërë pjesë e administratës është e bazuar mbi meritën”, tha mes të tjerash Rama.

09/10/2026

Pas 31 vitesh, atletika shkodrane me sallë force dhe dhoma të reja zhveshjeje

Pas 31 vitesh, atletika shkodrane bëhet me sallë force dhe dhoma zh...

09/10/2026

Kardinali Francesco Montenegro përcjell mesazhe besimi dhe shprese në Bazilikën e Zojës së Këshillit të Mirë, në Shkodër.

Kardinali Francesco Montenegro, gjatë Meshës së Shenjtë në Bazilikën e Zojës së Këshillit të Mirë, në Shkodër, përcolli mesazhe besimi, solidariteti dhe shprese.
Në fjalën e tij, kardinali ftoi besimtarët që ta shprehin fenë përmes veprave konkrete të dashurisë dhe solidaritetit, duke vënë në qendër kujdesin për tjetrin.
Gjatë meshës, Montenegro përcolli gjithashtu përshëndetjet e Papa Leonit XIV për besimtarët katolikë të Shkodrës dhe të gjithë Shqipërisë.

09/10/2026

Fondi Shqiptar i Zhvillimit ka shpallur garën për hartimin e projektit të detajuar për transformimin e aksit Veri–Jug të Shkodrës, përmes ndërhyrjes së emërtuar “Kopshti Linear dhe Aksi Multimodal Veri–Jug”. Fondi limit i procedurës është 28 milionë e 57 mijë lekë.

Projekti parashikon riorganizimin e një prej korridoreve kryesore të qytetit, nga lagjja “Rus” deri te rrethrrotullimi i Bypass-it në jug, duke përfshirë rrugën “Mbreti Gent”, bulevardin “Zogu i Parë”, rrugën “Studenti” dhe disa prej shesheve kryesore të Shkodrës.

Sipas dokumentacionit të tenderit, synimi është krijimi i një hapësire urbane më funksionale, ku përparësi do të kenë këmbësorët, çiklistët dhe transporti publik. Ndërhyrjet e parashikuara përfshijnë përmirësimin e trotuareve, krijimin e korsive të mbrojtura për biçikletat, riorganizimin e parkimit dhe rritjen e sigurisë në kryqëzime.

Një tjetër element i projektit është krijimi i kopshtit linear përgjatë bulevardit, përmes shtimit të pemëve, sipërfaqeve të gjelbra dhe përmirësimit të ndriçimit publik. Parashikohen gjithashtu ndërhyrje për menaxhimin e ujërave të shiut dhe përmirësimin e aksesueshmërisë për personat me aftësi të kufizuara.

Projekti përfshin edhe sheshet “Balshaj”, “Parrucë” dhe “Demokracia”, si dhe zonat përreth institucioneve arsimore, kulturore dhe hapësirave publike.

Ndërhyrja është pjesë e programit “Porta e Alpeve”, të financuar përmes një huaje kuadër nga Banka Evropiane e Investimeve dhe të zbatuar nga Fondi Shqiptar i Zhvillimit. Ajo lidhet me Planin e Lëvizshmërisë së Qëndrueshme Urbane të Shkodrës dhe Velipojës, të miratuar nga Këshilli Bashkiak në nëntor 2025, dhe synon të harmonizohet me investime të tjera të planifikuara në qytet, duke ndërthurur mobilitetin, hapësirat publike, trashëgiminë kulturore dhe zhvillimin turistik.

09/10/2026

Genc Reçi largohet nga Shkodra, emërohet shef i “Shqiponjave” në Dibër

Genc Reçi është transferuar nga Drejtoria Vendore e Policisë Shkodër në atë të Dibrës, ku do të mbajë të njëjtën detyrë, si shef i forcave “Shqiponja”.

Gjatë detyrës në Shkodër, Reçi dhe efektivët në varësi të tij kanë goditur të paktën 10 raste të armëmbajtjes pa leje që nga janari, si dhe kanë zhvilluar operacione kundër trafikimit të lëndëve narkotike.

Ndërkohë, pas vizitës së ministrit të Brendshëm Ervin Demo dhe drejtorit të Përgjithshëm të Policisë, Skënder Hita, në Policinë e Shkodrës priten ndryshime të tjera në nivel drejtuesish.

09/10/2026

Dy investime të reja në shkollat e Shkodrës, rikonstruktohet “Skënderbej” dhe përmirësohen ambientet sportive të “Oso Kukës”

Dy institucione arsimore në Shkodër pritet të përfitojnë investime të reja nga qeveria. Ministrja e Arsimit, Mirela Kumbaro, ka njoftuar financimin e rikonstruksionit të plotë të shkollës “Skënderbej” dhe të mjediseve sportive në gjimnazin “Oso Kuka”.

Këto ndërhyrje janë pjesë e një pakete prej 39 investimesh të reja për shkollat në të gjithë Shqipërinë, të cilat do të financohen nga qeveria pas përgatitjes së projekteve nga bashkitë.

Sipas ministres Kumbaro, investimet synojnë përmirësimin e kushteve të mësimit për mijëra nxënës dhe të ambienteve të punës për mësuesit.

09/10/2026

Më shumë se një shekull në shërbim të dijes dhe edukimit të brezave. Shkolla “Prek Gjoni” në Bajzë të Malësisë së Madhe shënon 110-vjetorin e themelimit, duke përfaqësuar një histori të gjatë arsimore dhe një traditë të rëndësishme në formimin e brezave të rinj.

Në këtë përvjetor, deputeti Bujar Rexha ka vlerësuar kontributin e shkollës në jetën arsimore, kulturore dhe shoqërore të Malësisë së Madhe, duke shprehur mirënjohje për të gjithë ata që kanë qenë pjesë e rrugëtimit të saj ndër vite.

Statusi i plotë i deputetit Bujar Rexha:

Sot, në 110-vjetorin e themelimit të Shkollës “Prek Gjoni” në Bajzë, kujtojmë me respekt dhe mirënjohje historinë, traditën dhe kontributin e saj të çmuar në edukimin e brezave.

Për më shumë se një shekull, kjo shkollë ka qenë një vatër e dijes, kulturës dhe formimit qytetar, duke luajtur një rol të rëndësishëm në jetën arsimore dhe shoqërore të Malësisë së Madhe.

Mirënjohje për mësuesit ndër breza, drejtuesit, nxënësit, prindërit dhe të gjithë ata që kanë kontribuar në rrugëtimin e saj 110-vjeçar.