16/07/2026
Shqipëria nis përgatitjet ligjore për adoptimin e euros
Shqipëria ka nisur zyrtarisht përgatitjet ligjore për adoptimin e euros, duke hedhur një hap të rëndësishëm drejt integrimit në Eurozonë. Projektligji i ri “Për Bankën e Shqipërisë”, i nxjerrë për konsultim publik, parashikon për herë të parë rregullat që do të zbatohen pas hyrjes së vendit në Eurozonë. Sipas draftit, euro do të bëhet monedha zyrtare e vendit në momentin e plotësimit të kushteve për anëtarësim.
Projektligji përcakton se Banka e Shqipërisë do të jetë përgjegjëse për hedhjen në qarkullim dhe tërheqjen e kartëmonedhave e monedhave euro, në përputhje me rregullat e Bashkimit Evropian dhe Bankës Qendrore Evropiane. Institucioni do të ketë gjithashtu kompetencën për të përcaktuar dizajnin e monedhave metalike euro që do të emetohen nga Shqipëria. Megjithatë, autoritetet sqarojnë se këto ndryshime nuk nënkuptojnë adoptim të menjëhershëm të euros, pasi kjo do të ndodhë vetëm pas anëtarësimit në BE dhe përmbushjes së kritereve ekonomike të kërkuara.
