JOQ News

21/12/2025

Banorët e lagjes përballë kopshtit nr.2 në Sarandë po përballen me një situatë të papranueshme. Sipas tyre, një tubacion për shkarkimin e ujrave të zeza është vendosur në mënyrë të papërshtatshme, duke shkaktuar përhapjen e ujërave të ndotura në rrugë dhe zonën përreth.

“Gjithçka është e mbushur me fekale dhe ujëra të zeza. Nuk mund të kalojmë dot në rrugë dhe nuk hapim dot as dritaret për shkak të erës së keqe dhe numrit të madh të mizave,” shprehet banorët.

Banorët thonë se kanë bërë ankesa të vazhdueshme pranë Bashkisë për më shumë se tre muaj, por deri tani nuk është marrë asnjë masë për zgjidhjen e problemit.

Ata kërkojnë ndërhyrje urgjente nga Bashkia e Sarandës për pastrimin e zonës dhe riparimin e tubacionit, për të siguruar kushtet minimale të higjienës dhe sigurisë në një zonë që frekuentohet edhe nga fëmijët.

21/12/2025

Një qytetar i është drejtuar redaksisë tonë për të denoncuar gjendjen e rënduar të rrugës në zonën e Ishmit, në Durrës.

Sipas tij, prej më shumë se një muaji rruga ndodhet në kushte tejet të rrezikshme, pa asnjë ndërhyrje apo vendim nga institucionet përgjegjëse.

Qytetari shprehet se kjo situatë përbën një rrezik serioz dhe burim aksidenti, duke paralajmëruar se mund të ketë pasoja fatale nëse nuk merren masa urgjente.

Ai i bën thirrje autoriteteve përkatëse të reagojnë sa më parë për të shmangur ngjarje të rënda dhe për të garantuar sigurinë e banorëve dhe kalimtarëve.

Denoncimi i qytetarit:

Pershendetje JOQ Doja te ndaja ne shqetesim me ju… Ju lutem shperndajeni Kete problem. Kjo eshte gjendja e Rruges ne Zonen Ishmit te Durresit …askush Nuk ka marre asnje vendim per Kete Problem te madh. Ky eshte nje burim aksidenti qe dikush mund te vdesi Nje muaj e ca ka qe eshte keshtu

21/12/2025

Në hyrje të Unazës së Madhe, në fundin e Bulevardit të Ri, trafiku është kthyer në një problem të përditshëm dhe një burim stresi për qytetarët. Radhë të gjata automjetesh krijohen pothuajse në çdo orë të ditës, duke shkaktuar vonesa të konsiderueshme. Mungesa e menaxhimit efektiv të qarkullimit e përkeqëson edhe më shumë situatën. Drejtuesit e mjeteve përballen me nervozizëm dhe humbje kohe, ndërsa zona po kthehet në një pikë kritike të trafikut urban. Qytetarët kërkojnë zgjidhje të menjëhershme për t’i dhënë fund këtij tmerri të përditshëm.

21/12/2025

Banorët e fshatit Boçovë në Levan kanë dalë sërish në protestë, duke kundërshtuar regjistrimin e tokave bujqësore që ata i kanë punuar prej gati 30 vitesh në emër të kompanisë “Brevi Konstruksion”, me administratore Afërdita Salillarin. Sipas tyre, këto toka përbëjnë burimin e vetëm të jetesës dhe humbja e tyre do t’i linte pa asnjë mjet mbijetese, ndaj kërkojnë rikthimin e menjëhershëm të pronës.

Fermerët pretendojnë se, ndonëse kanë përfituar tokat me ligjin 7501, nuk janë pajisur asnjëherë me certifikata pronësie, ndërkohë që në Kadastrë sipërfaqet rezultojnë të jenë kaluar në pronësi të kompanisë rreth një vit më parë. Ata denoncojnë se janë penguar të futen në parcelat që kanë punuar për dekada dhe shprehin dyshime se në këto toka parashikohet ndërtimi i një parku fotovoltaik, gjë që sipas tyre bie ndesh me destinacionin bujqësor të tokës.

Fermeri Sandër Mujo i ka bërë thirrje Prokurorisë së Fierit të hetojë me urgjencë çështjen, ndërsa apeli është drejtuar edhe kreut të ri të SPAK, Klodian Braho. Banorët paralajmërojnë se nëse institucionet vijojnë të heshtin, situata mund të përshkallëzohet. Ndërkohë, Njësia Administrative Levan i ka kërkuar zyrtarisht kompanisë “Brevi Konstruksion”, ish-“Salillari Construction”, të paraqesë dokumentacionin ligjor për shfrytëzimin e rreth 10 hektarëve tokë, por deri më tani nuk ka marrë asnjë përgjigje.

21/12/2025

Një qytetar nga Lezha i është drejtuar redaksisë sonë për të denoncuar një problem serioz që, rrezikon çdo ditë jetën e banorëve të lagjes “Lalm i Ri”. Në mes të rrugës, në një zonë të banuar dhe të frekuentuar, qëndron prej kohësh një shtyllë e tensionit të lartë, e cila është kthyer në një burim real rreziku për qytetarët.

Sipas denoncimit, situata bëhet edhe më alarmante gjatë orëve të natës, pasi rruga nuk ka ndriçim publik. Në errësirë totale, shtylla është pothuajse e padukshme, duke u shndërruar në një “kurth” për këmbësorët, drejtuesit e mjeteve dhe veçanërisht për fëmijët.

Gishti i përgjegjësisë këtë herë drejtohet nga Bashkia Lezhë dhe konkretisht nga kryebashkiaku Pjerin Ndreu, i cili, sipas banorëve, nuk ka marrë asnjë masë për zgjidhjen e këtij problemi, pavarësisht rrezikut të dukshëm. Vendosja e shtyllave të tensionit të lartë në mes të rrugës shihet nga qytetarët si një vendim absurd dhe i pajustifikueshëm, që tregon mungesë planifikimi dhe neglizhencë ndaj sigurisë publike.

Banorët e lagjes “Lalm i Ri” kërkojnë ndërhyrje të menjëhershme nga Bashkia Lezhë dhe institucionet përgjegjëse për të larguar këtë rrezik përpara se të ndodhë një tragjedi e paralajmëruar.

21/12/2025

Shoqëria e transportit Interbuz Vlorë ka njoftuar se ditën e hënë, më 22 dhjetor 2025, do të hyjë në grevë dhe protestë paqësore, si reagim ndaj konkurrencës së hapur dhe të jashtëligjshme që, sipas saj, prej kohësh po vepron në linjën Vlorë–Tiranë, duke e çuar këtë linjë drejt falimentimit të plotë.

Në njoftimin zyrtar drejtuar mediave dhe opinionit publik, Interbuz Vlorë thekson se operon me licencë të rregullt, respekton të gjitha detyrimet ligjore, përfshirë pagesën e taksave dhe sigurimeve, si dhe garanton sigurinë e pasagjerëve. Megjithatë, kompania shpreh shqetësimin se institucionet përgjegjëse kanë dështuar të ushtrojnë kontrolle efektive dhe të zbatojnë ligjin, duke lejuar subjekte të palicencuara të ofrojnë shërbime transporti pa asnjë përgjegjësi ligjore.

Sipas Interbuz Vlorë, kjo situatë është e papranueshme dhe alarmante, pasi konkurrenca e pandershme po shkatërron transportin e ligjshëm, po dëmton operatorët korrektë dhe po cenon drejtpërdrejt interesin publik. Në këto kushte, vijimi normal i aktivitetit konsiderohet i pamundur.

Përmes kësaj proteste, shoqëria kërkon:

Ndërprerjen e menjëhershme të aktivitetit të paligjshëm në transportin e udhëtarëve;

Zbatimin e ligjit dhe kryerjen e kontrolleve reale në terren nga institucionet përgjegjëse;

Mbrojtjen e operatorëve të licencuar dhe të shërbimit publik të transportit.

Protesta do të zhvillohet në mënyrë paqësore dhe synon sensibilizimin urgjent të institucioneve shtetërore dhe opinionit publik për një problem që, sipas Interbuz Vlorë, po injorohet prej një kohe të gjatë dhe po rrezikon seriozisht funksionimin e transportit të ligjshëm ndërqytetës.

21/12/2025

Kina do të vendosë për herë të parë pas më shumë se tre dekadash taksë mbi kontraceptivët, në një masë që përputhet me përpjekjet e qeverisë për të nxitur rritjen e lindshmërisë. Sipas ligjeve më të fundit fiskale, duke nisur nga 1 janari, barnat dhe produktet kontraceptive, përfshirë prezervativët, nuk do të jenë më të përjashtuara nga TVSH-ja prej 13%.

Vendimi vjen në një kohë kur norma e lindjeve në Kinë vijon të bjerë. Sipas të dhënave të Byrosë Kombëtare të Statistikave, në vitin 2024 në Kinë lindën 9.5 milionë foshnja, rreth një e treta më pak krahasuar me 14.7 milionë lindje në vitin 2019. Për shkak se vdekjet kanë tejkaluar lindjet, India e ka kaluar Kinën si vendi më i populluar në botë që në vitin 2023.

Megjithatë, ndryshimi i taksimit është pritur me ironi dhe kritika në rrjetet sociale kineze. Shumë përdorues kanë komentuar se është absurde të mendohet se taksimi i prezervativëve do t’i nxisë njerëzit të kenë më shumë fëmijë, kur rritja e një fëmije kushton shumë më tepër sesa përdorimi i kontraceptivëve, edhe me taksë.

Ekspertët paralajmërojnë se rritja e çmimeve të kontraceptivëve mund të çojë në pasoja serioze, përfshirë shtimin e shtatzënive të paplanifikuara dhe sëmundjeve seksualisht të transmetueshme.

Në dekadat e mëparshme, rritja e shpejtë e popullsisë e kishte shtyrë Partinë Komuniste Kineze të vendoste politikën e një fëmije për familje, e zbatuar nga rreth viti 1980 deri në vitin 2015 përmes gjobave dhe ndëshkimeve të tjera. Në disa raste, gratë i nënshtroheshin aborteve të detyruara, ndërsa fëmijët e lindur mbi kufirin e lejuar nuk pajiseshin me dokumente identifikimi.

Në vitin 2015, qeveria lejoi dy fëmijë për familje dhe në vitin 2021 kufiri u rrit në tre fëmijë, ndërsa kontracepsioni më parë ishte i nxitur dhe lehtësisht i aksesueshëm, madje shpesh falas.

20/12/2025

Vetëm një muaj më parë, një grua rreth 65 vjeçe humbi jetën pasi u pengua në të njëjtat blloqe betoni.

Një grua rreth 35 vjeçe është rrëzuar gjatë pasdites së sotme në bulevardin “Ismail Qemali” në Vlorë, pasi është penguar në një prej blloqeve të betonit të vendosura përgjatë bulevardit. Si pasojë, ajo ka pësuar dëmtime në kokë dhe është...

20/12/2025

Një 40-vjeçar, i dënuar për dhunë në familje dhe ngacmim seksual të dy vajzave të tij të mitura, është arrestuar nga Policia e Kukësit. Shtetasi me iniciale Q. D., banues në fshatin Mamëz, ishte shpallur në kërkim dhe ndaj tij Gjykata e Kukësit kishte caktuar një dënim prej 5 vite e 8 muaj burgim.

Sipas policisë, 40-vjeçarit i kanë mbetur për të vuajtur edhe 3 vite, 6 muaj e 3 ditë burgim, për veprat penale “Dhuna në familje”, “Ngacmimi seksual” dhe “Mbajtja pa leje dhe prodhimi i armëve, armëve shpërthyese dhe municionit”. Vendimi i Gjykatës së Shkallës së Parë është lënë në fuqi edhe nga Gjykata e Apelit.

Ngjarja lidhet me prillin e vitit 2024, kur bashkëshortja e tij kishte bërë kallëzim për dhunë në familje, ndërsa ai dyshohet se ka ngacmuar seksualisht dy vajzat e tij të mitura. Gjatë kontrollit në banesë, policia sekuestroi 14 kapsolla detonator, 2 fitilë zjarrpërcjellës, 1 granatë ofensive dhe 5 krëhera automatiku, ndërsa materialet procedurale iu referuan Prokurorisë për veprime të mëtejshme.

20/12/2025

Shoferët e paduruar, të cilët nuk dinë të respektojnë rregullat dhe të presin në trafik, po shndërrohen gjithnjë e më shpesh në burim aksidentesh për përdoruesit e tjerë të rrugës, duke ndërmarrë parakalime tejet të rrezikshme.

Një qytetar ka raportuar pranë redaksisë sonë një rast të tillë, ku një drejtues mjeti me automjet tip “Benz” ka treguar papërgjegjshmëri të plotë në qarkullim. Pa pritur si gjithë drejtuesit e tjerë, ai ka ndërmarrë një manovër të gabuar dhe të rrezikshme, e cila për pak sa nuk përfundoi në një aksident fatal.

Në videon e dërguar nga qytetari shihet qartë se mjeti tip “Benz”, me targë AB 835 NZ, lëviz me shpejtësi të frikshme dhe kryen parakalim të rrezikshëm, pa marrë parasysh faktin se nga krahu i kundërt po afrohej një tjetër automjet. Në atë moment, shoferi tenton të rikthehet me shpejtësi në korsinë e tij, duke e arritur me vështirësi këtë manovër për shkak të mungesës së hapësirës mes mjeteve.

Menjëherë pas kalimit të automjeteve nga krahu i kundërt, drejtuesi i paduruar nuk reflekton, por vijon sërish me të njëjtën sjellje të rrezikshme, duke bërë zig-zag në mes të rrugës deri sa arrin të kryejë parakalimin.

Raste të tilla, që rrezikojnë seriozisht jetën e qytetarëve, duhet të shërbejnë si shembull për ndërhyrje nga Policia e Shtetit. “Kamikazë” të tillë të rrugës nuk rrezikojnë vetëm jetën e tyre, por edhe atë të të gjithë përdoruesve të tjerë të rrugës.

20/12/2025

"Çkemi, si jeni? Ju lutem, postojeni këtë video, sepse më kanë vjedhur motorin në datën 14, te rruga Pjetër Budi. Kam lajmëruar policinë, por ka 6 ditë dhe ende nuk është gjetur autori, edhe pse është filmuar nga kamera me fytyrë të dukshme. Ju falënderoj", shkruan qytetari.

20/12/2025

Me afrimin e festave të fundvitit, mijëra emigrantë po rikthehen drejt vendlindjes për të festuar pranë familjarëve të tyre. Ky fluks i shtuar ka sjellë krijimin e radhëve të gjata në disa pika kufitare të vendit.

Situata më problematike paraqitet në pikën kufitare të Kakavijës, ku janë formuar radhë kilometrike automjetesh. Qytetarët raportojnë se prej më shumë se tre orësh po presin për të kaluar kufirin dhe për t’u futur në atdhe.

Ndërkohë, pavarësisht shtimit të vazhdueshëm të fluksit, sipas udhëtarëve pala greke nuk ka hapur sportele shtesë, duke vënë në funksion vetëm një sportel. Kjo ka shkaktuar bllokim dhe lodhje të madhe për qytetarët që presin në kufi.

Të gjendur përballë kësaj situate, shumë shqiptarë shprehen të zhgënjyer dhe të harruar edhe nga institucionet e shtetit të tyre, të cilat, ndonëse në dijeni të problematikës, nuk kanë ndërmarrë masa konkrete për të lehtësuar situatën.