03/06/2026
Romani i Dostojevskit “Adoleshenti” u drejtohet të gjitha moshave, por kryesisht adoleshentëve, duke arritur të përshkruajë sjelljen dhe veprimtaritë e tyre, dashurinë si një temë e madhe dhe e fuqishme, marrëdhëniet midis të rinjve, por nga ana tjetër edhe karaktere të gdhendura bukur, sidomos personazhet kryesore, të cilët veçohen për më tepër se kanë një anë tipike që nuk e kanë kurrë të tjerët.
Kjo zgjedhje dhe analizë i nënshtrohet edhe marrëdhënieve që ka shoqëria e asaj kohe, por gjithnjë me një tingëllim të fuqishëm aktual. Nga ana tjetër ngrihet “muri” i një morali që depërton thellë në qenien njerëzore, ndonëse vepra nuk është aspak moralizuese. Ky moral, vlerësimi mbi aktet e shëmtuara edhe me pamje kriminale dhe fakti që ndaj tyre duhet të ngrihet e gjithë shoqëria përbën një dukuri të zakonshme në këtë vepër, e cila është shkruar me sinqeritet dhe sigurisht me art, pa anashkaluar edhe bashkëshoqërimin e tij psikanalitik në vepër.
