03/07/2025
I verbëri që "sheh" dritë
Enea Laho eci në tapetin e kuq bashkë me Parashqevinë, shoqen e tij të bangës. Në Ersekë u mbajt mbrëmja e maturës dhe ceremonia nisi me Enean, ai eci i pari. Kjo ishte dëshira e gjithë shokëve, të cilët u larguan nga tapeti dhe kërkuan që vëmendjen ta merrte shoku i tyre.
Më bëri përshtypje dhe u afrova. Mësova që Enea vuan nga mungesa e shikimit që në vegjëli ndërsa në krah kishte shoqen e ngushtë, e cila i ka ndenjur afër gjithë kohën e gjimnazit.
E keni parasysh gratë e vajzat që komentojnë për veshjet, make up, orën, varësen në të tilla raste? Në Ersekë pavarësisht se po luhej muzika në sfond dukej si një heshtje e madhe. Të gjithë po shihnin Enean kur kalonte në tapetin e kuq, ashtu, i lumtur, pa asnjë siklet, pa frikën e paragjykimit
U afrova dhe e pyes Parashqevinë.
Si ndihesh sot?
-E plotësuar. E kisha ëndërr ta shoqëroja Enean në mbrëmjen e maturës. Ishim bashkë 3 vite në bangë. Dimë çdo dëshirë e hall tonin. I besojmë shumë njeri tjetrit. Enea më ka ndihmuar shumë me mësimet, është shumë i zgjuar, sidmos në histori.
I kthehem Eneas
Sot je veshur shumë bukur, ama je çun me fat. Shoqëruesen e ke shume te bukur
Ma kthen menjëherë
-Të gjithë këtu janë të bukur. Të gjithë janë të bukur. E di pse? Me kanë qëndruar afër dhe me kanë trajtuar me dinjitet. Nuk kam dëgjuar ndonjëherë e as ndjerë në ndonjë moment se unë jam ndryshe nga ta. Madje unë fitoj nganjëherë se më lënë të parin në këto eventet. I dua shumë se fundja me ta kam kaluar shumë kohë. Më bënë të shihja dritë...
Më bënë të shihja dritë... Më bënë të shihja dritë...
Kjo fjali më shoqëroi shumë minuta më pas.
Eh. Nganjëherë për disa bëhemi dritë e disa i çojmë në errësirë. Ndaj duhet vlerësuar momenti dhe njeriu. Sepse harrojmë sa ndikim kemi tek të tjerët. Për t'u dhënë dritë...
Credit: Xhensil Shkëmbi
