23/12/2025
Mjaft më me mashtrime politike.
Krerët e Partisë Demokratike kanë vite që u flasin shqiptarëve me një refren banal: “Mos u merrni me problemet e brendshme të PD-së, mendoni vetëm si të rrëzojmë Edi Ramën.” Kjo nuk është strategji. Kjo është arratisje nga përgjegjësia. Populli nuk është budalla. Shqiptarët nuk refuzojnë PD-në se “ i mashtron propaganda e qeverisë ”, por sepse nuk duan të shohin të njëjtët njerëz në pushtet. Flamur Noka Ministër ? Jo. Agron Gjekmarkaj Ministër ? Jo. Oerd Bylykbashi Ministër ? Jo. Fatmir Mediu Jo. Jozefina Topalli Jo Arben Imami Jo dhe jo te gjithe ish ministrave te korruptuar te PD. Nuk duan asnjë të vjetër. Emrat e vjetra nuk përfaqësojnë ndryshimin. Përfaqësojnë kapjen e opozitës, riciklimin e dështimit dhe arrogancën e një klase politike që nuk ikën kurrë. Shqiptarët janë futur në një kurth të ndyrë politik: Qeveria vjedh, gënjen dhe sillet si pronare e shtetit. Ndërsa Opozita akuzon, por me duar të pista nga e shkuara. Hajdutët e djeshëm bërtasin kundër hajdutëve të sotëm, jo për drejtësi, por për rradhë. Jo për shtet ligjor, por për të rikthyer pazaret e vjetra. Jo për qytetarët, por për kolltukët. Kjo është arsyeja pse populli nuk ngrihet. Kjo është arsyeja pse vota nuk digjet për opozitën. Sepse askush nuk sakrifikon për një mashtrim të ri me fytyra të vjetra. A duhet PD të lançoje emra të rinj ? Po, urgjentisht. Pa emra të rinj, PD nuk ka as moral, as besueshmëri, as shpresë për fitore. Një parti që hyn në zgjedhje me të njëjtët drejtues e kandidatë prej 20–30 vitesh nuk kërkon mandat, por kërkon rikthim privilegjesh. Politika nuk është pension i përjetshëm. Nëse humb vazhdimisht dhe nuk ikën, je pjesë e problemit. A ka PD emra të rinj ? Po, ka. Por ata, mbahen në hije, por ata përdoren si dekor, por ata largohen me përbuzje sapo tregojnë mendim të pavarur. PD ka të rinj të arsimuar në SHBA, Itali, Francë, Gjermani, Austri, Angli, e kudo ne shtetet e BE, PD ka të rinj profesionistë, juristë, ekonomistë, mjekë, akademikë, njerëz të pakonsumuar nga politika dhe pushteti. Por ata nuk janë të bindur, nuk janë të kapur dhe nuk janë të kontrollueshëm, prandaj nuk lançohen. Sepse emrat e vjetër kanë frikë nga konkurrenca, lidershipi e sheh partinë si pronë private, rinovimi do të thotë fund i pushtetit personal. Është më e lehtë të humbasësh zgjedhje me njerëz të vjetër, sesa të fitosh dhe të mos jesh më ti në krye. Ju politikane “te vjeter” të PS e PD e dini shumë mirë se çfarë kërkon sot populli ? Jo thjesht “kundër Ramës”, “kundër Berishës” por fytyra të reja, biografi të pastra, kompetencë reale, distancë të qartë e të prerë nga korrupsioni i djeshëm dhe i sotëm. Pa këtë, çdo fushatë e PD-së është teatër i lodhur, ku aktorët janë të njëjtët “surretër” dhe vendi i publiku është bosh. Konkluzioni: Nëse PD nuk lançon emra të rinj, nuk është opozitë, është rezervë pushteti për veten e saj. Dhe po t’i kishte vërtet interesat e Shqipërisë mbi interesat personale, rinovimi do të kishte ndodhur prej kohësh.
