BLU TV

10/08/2026

Edicioni Informativ | Ora 14:00 | 10/08/2026

10/08/2026

Një aksident i rëndë rrugor është regjistruar sot në aksin Levan–Tepelenë, në zonën e Mollajt, ku dy automjete janë përplasur me njëra-tjetrën. Si pasojë, një automjet tip “Benz” ka përfunduar në kanalin anësor të rrugës. Drejtuesi, bashkëshortja dhe dy vajzat e tij janë transportuar me urgjencë në Spitalin Rajonal Fier. Policia dhe grupi hetimor po punojnë për zbardhjen e shkaqeve të aksidentit.

10/08/2026

Durrësi vijon të jetë një nga destinacionet më të frekuentuara nga pushuesit vendas dhe të huaj. Deti, trashëgimia historike, kultura dhe mikpritja e bëjnë qytetin bregdetar një prej pikave më tërheqëse të sezonit turistik.

10/08/2026

Vijojnë punimet për restaurimin e mureve antike të zbuluara në vitin 2022 pranë shkollës “Eftali Koçi” në Durrës. Projekti i IKTK-së përfshin edhe rehabilitimin e zonës përreth, me synim ruajtjen dhe promovimin e strukturave arkeologjike, mes tyre pjesë të fortifikimit antik, puse dhe mbetje të një akuadukti romak.

10/08/2026

Vangjel Tavo shkrin IMT-në e Himarës, pas konstatimit të ndërtimeve pa leje

Kryetari i Bashkisë Himarë, Vangjel Tavo, ka vendosur të shkrijë tërësisht strukturën e Inspektoratit të Mbrojtjes së Territorit (IMT) në Bashkinë Himarë, pas konstatimit të ndërtimeve pa leje në territorin e bashkisë.

Vendimi vjen në një kohë kur problematika e ndërtimeve pa leje dhe mënyra e kontrollit të territorit janë kthyer në një prej çështjeve më të diskutuara në Himarë. Sipas burimeve, neglizhenca në ushtrimin e detyrës dhe favorizimi i ndërtimeve të paligjshme janë ndër arsyet që kanë çuar në këtë vendim.

Me shkrirjen e strukturës, Bashkia Himarë pritet të riorganizojë mënyrën e kontrollit dhe inspektimit të territorit, duke synuar një strukturë të re që do të ketë përgjegjësi për evidentimin dhe parandalimin e ndërtimeve pa leje.

Ky është rasti i dytë që kryebashkiaku Vangjel Tavo vendos të shkrijë strukturën e IMT-së në Himarë. Një vendim i ngjashëm ishte marrë edhe më 9 qershor 2025, kur struktura ishte shkrirë më parë.

Vendimi i fundit i kryebashkiakut vjen pas evidentimit të rasteve të reja të ndërtimeve pa leje dhe ngre pikëpyetje mbi mënyrën se si është ushtruar kontrolli i territorit nga strukturat përgjegjëse deri më tani.

Tashmë pritet të shihet se cila do të jetë struktura e re dhe nëse riorganizimi do të sjellë një kontroll më të rreptë ndaj ndërtimeve pa leje në territorin e Bashkisë Himarë.

10/08/2026

Situata e zjarreve në zonën pyjore të Drënies dhe Vloshtit paraqitet e qetësuar, ndërsa aktualisht nuk ka më fronte apo vatra aktive. Forcat zjarrfikëse dhe Forcat e Armatosura vijojnë monitorimin në terren dhe ndërhyjnë në zona ku trungje e dru të djegur vijojnë të nxjerrin tym, për të shmangur çdo mundësi riaktivizimi nga era dhe temperaturat e larta.

10/08/2026

Kalaja e Gjirokastrës përgjatë këtij viti ka mirëpritur 162 mijë turistë duke u renditur ndër monumentet e kulturës më të vizituara në Shqipëri. Pjesën më të madhe të vizitorëve e përbëjnë turistët e huaj, të cilët kanë mbërritur nga vende të ndryshme të botës për ta kthyer Gjirokastrën në një nga destinacionet më të preferuara të turizmit kulturor. E ndërtuar mbi kodrën që mbikëqyr qytetin, Kalaja e Argjiros është një nga fortesat më të mëdha në Ballkan dhe simboli më i rëndësishëm i Gjirokastrës. Kalaja me vlera të veçanta historike dhe ndërtimore është vizituar nga turistë francezë,gjermanë,amerikanë, italianë, grekë, etj.Në mjediset e saj nuk kanë munguar edhe turistët vendas

10/08/2026

Trigliceridet e larta, kolesteroli i çrregulluar dhe dhjamosja e mëlçisë lidhen shpesh me mbipeshën, diabetin, rezistencën ndaj insulinës dhe hipertensionin.

Sipas ekspertëve, hapi i parë për përmirësimin e gjendjes është ndryshimi i stilit të jetesës. Rekomandohen dieta mesdhetare, aktiviteti fizik i rregullt, humbja graduale në peshë dhe kufizimi i alkoolit.

Ushqyerja duhet të bazohet te perimet, frutat, bishtajoret, drithërat integrale, peshku, vaji i ullirit dhe frutat e thata. Duhet të shmangen pijet me sheqer, ushqimet e përpunuara, fruktoza e shtuar dhe yndyrat e ngopura.

Humbja e 5–10% të peshës trupore mund të ulë dhjamin në mëlçi dhe trigliceridet, ndërsa humbja më e madhe mund të ndihmojë në përmirësimin e inflamacionit dhe fibrozës.

Në rastet më të rënda, mjeku mund të rekomandojë edhe medikamente. Analizat dhe trajtimi duhet të vlerësohen gjithmonë nga një specialist

Trigliceridet e larta, kolesteroli i çrregulluar dhe dhjamosja e mëlçisë lidhen shpesh me mbipeshën, diabetin, rezistencën ndaj insulinës dhe hipertensionin.

10/08/2026

Eklipsi total i Diellit më 12 gusht, Europa përgatitet për spektaklin qiellor

Një nga fenomenet astronomike më të rralla të vitit do të ndodhë më 12 gusht 2026, kur një eklips total i Diellit do të jetë i dukshëm në disa zona të Europës Veriore dhe Perëndimore.

10/08/2026

Fluksi i lartë vijon në Pikën e Kalimit Kufitar të Kakavijës. Sipas Policisë Kufitare, gjatë 24 orëve të fundit janë regjistruar 12.674 shtetas në hyrje-dalje, prej të cilëve 8.453 kanë hyrë në Shqipëri dhe 4.221 kanë dalë. Gjithashtu, kanë lëvizur 3.513 automjete, ndërsa janë shtuar sportelet për të shmangur radhët e pritjes.