Radio Mariam Armenia

30/11/2025

Քո հանդեպ մեղանչածը խոնարհվի քո առաջ, թե չխոնարհվի` ների՜ր նրան, որպեսզի դո՛ւ ազատվես։

Գրիգոր Տաթևացի

27/11/2025

«Ո՜վ, Մարիամ, որ հղացար առանց մեղքի, աղոթիր մեզ համար, որ խնդրանքով դիմում են քեզ»։🌸🙏

Ավանդության համաձայն նոյեմբերի 27-ին Սուրբ Եկատերինան տեսիլքով տեսավ Մարիամ Աստվածամորը՝ կանգնած կիսագնդի վրա, ոտքերի տակ՝ ջախջախված օձ, իսկ ձեռքերը՝ մատանիներով զարդարված, ձեռքին պահելով փոքրիկ ոսկեգույն գունդ՝ վրան խաչի պատկեր։ Նրա մատանիների քարերից պայծառ լույս էր արձակում։ Հանկարծ փոքրիկ ոսկեգույն գունդը անհետացավ Մարիամի ձեռքերից, և նա տարածեց ձեռքերը դեպի դուրս։ Քարերից ճառագող լույսը դուրս եկավ նրա ձեռքերից, և տարածվեց շուրջը, իսկ վերևում հայտնվեց մի կիսաշրջան՝ ոսկեգույն գրությամբ. «Ո՜վ, Մարիամ, որ հղացար առանց մեղքի, աղոթիր մեզ համար, որ խնդրանքով դիմում են քեզ»։

Տեսիլքը, կարծես, պտտվեց, և հակառակ կողմում սուրբ Եկատերինան տեսավ «Մ» տառը՝ վրան խաչի պատկեր և շրջապատված տասներկու աստղերով։ Խաչը կանգնած էր հորիզոնական ձողի վրա։ «Մ» տառի տակ երկու սրտեր էին բռնկված կրակի մեջ, որոնցից մեկը պատված էր փշերով, իսկ մյուսը խոցված էր սրով։

Այնուհետև Մարիամը Եկատերինային ասաց. «Այս պատկերով թող մեդալիոն հատվի։ Նրանք, ովքեր կկրեն այն, մեծ շնորհների կարժանանան, հատկապես, եթե այն կկրեն պարանոցի շուրջ»։
Մարիամը մեդալիոնի իմաստը բացատրեց Եկատերինային հետևյալ կերպ. ինքն իր ոտքերի տակ ջախջախում է Սատանային, որն անզոր է իր առջև (տե՛ս Ծննդոց 3։15)։ Նրա ձեռքերը բաց են, իսկ մատանիների քարերից արձակվող լույսի ճառագայթները շնորհներ են, որոնք նա ստանում է նրանց համար, ովքեր խնդրում են։ Մատանիները, որոնք լույս չեն ճառագում, խորհրդանշում են այն շնորհները, որոնք հասանելի են, սակայն մարդիկ չեն ստանում, քանի որ չեն խնդրում դրանք։

«Ո՜վ, Մարիամ, որ հղացար առանց մեղքի, աղոթիր մեզ համար, որ խնդրանքով դիմում են քեզ» գրությունը վերաբերում է Մարիամի Անարատ Հղությանը, ինչը նշանակում է, որ իր հղիանալու առաջին իսկ պահից նա զերծ էր սկզբնական մեղքի բոլոր բծերից։
Մեդալիոնի հակառակ կողմում պատկերված տասներկու աստղերը խորհրդանշում են տասներկու Առաքյալներին, որոնք էլ, իրենց հերթին, խորհրդանշում են Եկեղեցին։ «Մ» տառը Մարիամի անվան սկզբնատառն է, իսկ խաչը՝ Քրիստոսի Խաչը՝ մեր փրկության խորհրդանիշը։ Հորիզոնական ձողը խորհրդանշում է երկիրը։ Խաչի և ձողի տեղադրումը «Մ» տառի վրա և դրա մեջ ցույց է տալիս Մարիամի մասնակցությունը Քրիստոսի Խաչին և նրա ներգրավվածությունը մարդկության կյանքի մեջ։
Երկու սրտերը Հիսուսի և Մարիամի սրտերն են, որոնք վառվում են մարդկության հանդեպ տածած սիրով։

Եկեղեցու հաստատմամբ, առաջին «Անարատ Հղության մեդալիոնները» պատրաստվել են 1832 թվականին, և գրեթե անմիջապես հայտնվեցին հրաշագործ բուժումների մասին վկայություններ։ Այնքան շատ, որ մեդալիոնը հայտնի դարձավ հենց որպես «հրաշագործ մեդալիոն»։
Հայտնության ժամանակներից ի վեր միլիոնավոր մեդալներ են բաժանվել ամբողջ աշխարհում, հատկապես այնպիսի մարդկանց կողմից, ինչպիսին է Կալկաթայի Մայր Թերեզան: Հաղորդվում է, որ նրա «Գթության միսիոներները» ներկայումս տարեկան բաժանում են 1.8 միլիոն մեդալ։

Հրաշագործ մեդալիոնը 1895 թվականին ստացել է հատուկ ճանաչում և հաստատում՝ հանրային աղոթքի համար՝ Ալոիզի կարդինալ Մասելլայի՝ Սուրբ Ծիսակատարությունների ժողովի պրեֆեկտի ցուցումով:
Հեռու լինելով հաջողության թալիսմանի գաղափարից կամ սնահավատությունից՝ մեդալիոնը պարզապես միջոց է խթանելու մարդկանց հավատն ու ջերմեռանդությունը առ Աստված՝ Մարիամի միջնորդությամբ։

27/11/2025

Այսօրվանից՝ նոյեմբերի 27-ից մեկնարկում է Սուրբ Իգնատիոս Մալոյանի 9-օրյա աղոթքի հերթական շրջանը։ Մաղթում ենք, որ նախորդ շրջանների ընթացքում ձեր հղած նպատակներն ու նվիրական ցանկություններն իրականանան կամոքն Աստուծո։
Սիրելիներ, նոր շրջանի համար ևս կարող եք այս հրապարակման տակ կամ առանձին հաղորդագրության տեսքով մեզ փոխանցել ձեր նպատակները։

26/11/2025

Ինչո՞ւ ես ձգտում հեշտության և ուրախության, եթե քո գլուխը` Քրիստոս, որ Հոր իմաստությունն է, փախչելով աշխարհի ուրախությունից, կամավոր դիմեց մահվան: Քրիստոս ժխտեց ամեն երկրավոր բան, որպեսզի ցույց տա, որ դրանք մերժելի են։

Օգոստինոս Երանելի

25/11/2025

«Ռադիո Մարիամ»-ի սիրելի ունկնդիրներ և ֆեյսբուքյան էջի հետևորդներ, դեկտեմբերի 5-ին կլրանա մեր գործունեության 14-րդ տարեդարձը։ Ուրախությամբ անդրադառնում ենք, որ այս բոլոր տարիների ընթացքում «Ռադիո Մարիամ»-ը ձեռք բերեց մեծ լսարան և վայելեց շատերիդ համակրանքն ու սերը։
Այս օրը մեր եթերը վաղ առավոտից կտարբերվի տոնական շնչով, որի ընթացքում կարող եք զանգահարել մեզ, փոխանցել ձեր կարծիքները, մաղթանքները, քննադատությունները, խորհուրդներն ու առաջարկները։ Կարող եք նաև այցելել մեր գրասենյակ՝ քաղաք Գյումրի, Շչեդրինի 5/4 հասցեում։ Իհարկե, մեր դռները ձեր առջև բաց են բոլոր աշխատանքային օրերին, բայց այս օրն ակնկալում ենք առանձնապես։
Ինչպես շատերդ գիտեք, «Ռադիո Մարիամ»-ն իր գործունեությունը կարողանում է իրականացնել բացառապես հանգանակությունների և նվիրատվությունների շնորհիվ, որոնք կատարում են մեր ունկնդիրները Հայաստանից և սփյուռքից։ Ուստի մեր ծննդյան օրը՝ դեկտեմբերի 5-ին նաև անցկացնելու ենք Մարիաթոն, որի շրջանակում, եթե կարևորում եք մեր աշխատանքը և կուզենաք նպաստել մեր գործունեությանը, կարող եք դրամական փոխանցումներ կատարել հետևյալ հաշվեհամարներին՝
220003352535000 AMD
220003351867001 USD
220003351784002 EUR

Կարող եք նաև զանգահարել մեզ հետևյալ հեռախոսահամարներով․
(0312)-37233
(+374) 93 72 33 32 (վերջինը՝ նաև Viber, WhatsApp)

22/11/2025

Դու աղոթում ես, որ ներվեն քեզ քո մեղքերը և խոստովանում, որ դու ևս ներում ես քո դեմ մեղանչածներին: Խորհի՛ր քո մտքում նախ՝ իսկապես ներո՞ւմ ես դու, և սուտ մի՛ լինիր Աստծո առաջ՝ ասելով՝ ներում եմ, երբ չես ներում: ։

Հակոբ Մծբնա Հայրապետ

21/11/2025

Պատարագ՝ նվիրված Սուրբ Կույս Մարիամի՝ տաճարին ընծայման տոնին

19/11/2025

Հայաստանի, Վրաստանի, Ռուսաստանի և Արևելյան Եվրոպայի կաթողիկե հայոց առաջնորդ Գևորգ արքեպիսկոպոս Նորատունկյանի ուղերձը՝ Հիսնակաց շրջանի առթիվ

19/11/2025

Ինչպես ջուրն է ճնշումից վեր բարձրանում, այդպես էլ փորձություններով հալածված հոգին է ապաշխարությամբ մոտենում Աստծուն։

Հովհաննես Սանդուղք

17/11/2025

Նվիրական սրբավայրեր ուխտագնացություն կատարելը բոլոր ժամանակներում և տարբեր կրոններում եղել է մարդու հոգևոր զգացումների դրսևորման ձևերից մեկը: Այն նաև քրիստոնյաների հոգևոր-բարեպաշտական կյանքի անքակտելի մաս է։ Քրիստոնեական ուխտագնացությունը ձևավորվել է վաղ շրջանում, երբ քրիստոնյաները Հիսուսի կյանքի նվիրական վայրերը տեսնելու ակնկալիքով գնացել են Տերունի սրբավայրեր՝ Բեթղեհեմ, Գողգոթա և այլն:

Ավանդական կենցաղում ամեն հայի համար, անկախ գտնվելու վայրից, բաղձալի է եղել երեք նվիրական ուխտագնացություն՝ Սուրբ Հարության օրը լինել Երուսաղեմի Սուրբ Հարության տաճարում, Մյուռոնօրհնեքին՝ Սուրբ Էջմիածնում, Վարդավառին՝ Մշո Սուրբ Կարապետ վանքում:

16/11/2025

«Ռադիո Մարիամ»-ի անձնակազմը սրտանց շնորհավորում է Սրբազան Հորը՝ մաղթելով քաջ առողջություն և հաջողություններ։

Այսօր Արհ. Տ. Գեւորգ Արքեպս. Նորատունկյանի ծննդյան տոնն է։ Թող Տերը երկար կյանք պարգեւի Սրբազանին եւ առավել զարդարի աստվածային շնորհներով եւ առաքելական ավյունով։ Արեւշատ եւ պայծառ օրեր։
Աղոթենք Առաջնորդ Հոր համար, որպեսզի մեր համայնքներն առաջնորդի դեպի նոր հորիզոններ, դեպի զարգացում եւ սրբություն։

16/11/2025

Նոյեմբերի 16-ին Կաթողիկե եկեղեցում սկսվում է Հիսնակաց շրջանը, որի ընթացքում ֆիզիկապես և հոգեպես պատրաստվում ենք Քրիստոսի Սուրբ Ծննդյան տոնին։ Հիսնակի պահոց շրջանը իր լրումին է հասնում դեկտեմբերի 25-ին՝ Սուրբ Ծննդյան ճրագալույցի Պատարագով։