07/05/2025
Հայ օգնության ֆոնդի (ՀՕՖ) նախաձեռնությամբ 2025թ․ մայիսի 10-31 կազմակերպվելու է
ամերիկահայ անվանի դաշնակահար, ՀՕՖ-ի մեծ բարեկամ և աջակից Շահան Արծրունու համերգային
շրջագայությունը Հայաստանի մարզերում և համայնքներում։ Այս նախաձեռնությունը սկիզբ է առել 2016 թվականին
և արդեն իր դրական ազդեցությունն է ունեցել երաժշտական դպրոցների սաների կրթության և կատարողական
ունակությունների հետագա զարգացման վրա։
Անվանի երաժշտի համերգաշարը մեկնարկում է մայիսի 10-ին և տևելու է մինչև մայիսի 31-ը։ Համերգներով ու
վարպետաց դասերով հանդես է գալու Թբիլիսիում, Արմավիրում, Վայքում, Եղեգնաձորում, Գավառում,
Աբովյանում, Չարենցավանում, Հրազդանում, Թալինում ու Ապարանում։
Մարզային համերգները բարեգործական են և անվճար։ Համերգներին նախորդում են վարպետության դասերը
երաժշտական դպրոցների սաների հետ, որոնց հետ վարպետը հանդես է գալիս նաև բեմում։
Մարզային հյուրախաղերի գլխավոր կազմակերպիչը Հայ օգնության ֆոնդն է։
***
Շահան Արծրունին ծնվել է Ստամբուլում։ Նախակրթարանն ավարտելուց հետո 1964թ մեկնել է Նյու Յորք՝
Ջուլիարդ քոլեջում մասնագիտական կրթությունը շարունակելու համար, և հաստատվել է այնտեղ։
Մարդասիրությունն ու բարեգործությունն այս արվեստագետի գործունեության կարևոր մասն է։ Նա բազմիցս է
հանդես եկել բարեգործական համերգներով՝ օգնելու ու աջակցելու համար Հայաստանում ապրող խոցելի
խմբերին՝ տարեցներին ու երեխաներին։
Անվանի երաժշտին՝ որպես բարձրակարգ դաշնակահար, ըստ արժանվույն գնահատել են օտարազգի այնպիսի
կոմպոզիտորներ, ինչպիսիք են Ջորջ Քրամբը, Լուիս Թալման, Ուիլյամ Մայերը և այլք։ Նրա մասին հոդվածներ են
տպագրվել «The New York Times», «Fanfare», «Musical America», «American Record Guide»,
«La Nation», «Cumhuriyet» և այլ թերթերում ու պարբերականներում։
***
Հավելյալ տեղեկությունների համար կարող եք զանգահարել ՀՕՖ-ի հայաստանյան գրասենյակի հաղորդակցության պատասխանատու
Մարգարիտա Առաքելյանին՝ +374 93 52 10 16 կամ գրել
[email protected] էլ-հասցեին:
