Հոգևոր Այբբենարան / Spiritual Alphabet

13/08/2025

ԱՂՈԹՔ ՉՈՐԵՔՇԱԲԹԻ ՕՐՎԱ

Աղաչում եմ քեզ, քո առջև ընկնելով, Տեր իմ և Աստված իմ, անճառ ճառագայթ և անհասանելի լույս և լուսեղեն դասերի ստեղծող, երկնքի լուսավորներին հորինող, Սուրբ Երրորդություն, որ այս օրը գոյացրիր արեգակը, լուսինն ու աստղերը և նրանց տեղավորեցիր երկնքում` լուսավորելու արարածներիս և ցույց տալու ժամ ու ժամանակ, օր ու տարի, և արդ, ես` լույսից զրկվածս և մեղքի խավարով պատածս, լուսաշող ողորմությունիցդ հայցում եմ` ինչպես տարրեղեն լուսավորներիդ շնորհեցիր լույս, ինձ ևս շնորհիր մի փոքր մաս ու բաժին առատ և անհամեմատելի լույսիցդ, և ինձնից փարատիր հանցանքի մեգն ու խավարը, և անանց լույսովդ առաջնորդիր ինձ երկնային արքայությունդ` բոլոր սրբերի հետ փառավորելու ամենազոր տերությունդ` Հորը, Որդուն և Սուրբ Հոգուն. այժմ և միշտ և հավիտյանս հավիտենից. ամեն:

13/08/2025

Ուշադրությու՛ն․ սույն ձայնագրությունը պաշտպանված է «Հեղինակային իրավունքի և հարակից իրավունքների մասին» ՀՀ օրենքով։ Ձայնագրությունը տարածելը և ցանկացած ձևով ...

13/08/2025

13/08/2025

Ըստ Հայ Եկեղեցու տոնացույցի

13/08/2025

ԱՅՍՕՐ
Գ օր Աստվածածնի պահքի

13/08/2025

Հա՛յր մեր, որ յերկինս ես, սուրբ եղիցի անուն Քո:
Եկեսցէ արքայութիւն Քո:
Եղիցին կամք Քո որպէս յերկինս եւ յերկրի:
Զհաց մեր հանապազորդ տո՛ւր մեզ այսօր:
Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց:
Եւ մի՛ տանիր զմեզ ի փորձութիւն:
Այլ փրկեա՛ զմեզ ի չարէ:
Զի Քո է արքայութիւն եւ զօրութիւն եւ փառք յաւիտեանս. ամէն:

12/08/2025

ԱՂՈԹՔ ՍՈՒՐԲ ՀՈՎՀԱՆՆԵՍ ԳԱՌՆԵՑՈՒ ԵՐԵՔՇԱԲԹԻ ՕՐՎԱ

Վերին վայելչություններիդ վերանորոգող և ստորիններիս ստեղծող, Տեր իմ և Աստված իմ, որ այս օրը անհատակ ջրերին հրամայեցիր կուտակվելու իրար վրա, ուր երևաց ցամաքը բարեբողբոջ բույսերով ու տունկերով, ծառերով ու ծաղիկներով և ամեն տեսակ բարի պտուղներով, ընկնում եմ քո առջև ու խնդրում քեզնից` հոգու ծաղիկներից մեղքով թառամածիս և բարի արգասիքներից անպտուղիս, նայի՛ր, Տեր, անմեղ մատներիդ ստեղծածիս, և անարատ ձեռքիդ գործիս մի՛ անտեսիր, այլ նախախնամական սիրովդ խնայիր խախտվածիս ու մեղքով տարակուսածիս, որովհետև նենգավորի նետերն ինձ խոցոտեցին, և իմ մեջ ծլեցին բանսարկուի փշերը, ինձ վիրավորեց ահագին վիշապը, և մահաբեր գազանի թույները թափվեցին վրաս: Այլ տեղից փրկություն չկա և ոչ` բժշկություն իմ հոգուն և մարմնին: Արդ, ամենամեղս հայցում եմ ամենազոր տերությունիցդ, բուժիր բեկված սիրտս, կապիր, մարդասեր Տեր, խոր վերքերս, և ինչպես այսօր անջատեցիր ջուրը ցամաքից, նույնպես անջատիր ինձնից բոլոր անօրինություններս և արժանացրու երկնային արքայությանդ` բոլոր սրբերի հետ փառավորելու ամենազոր տերությունդ. հավիտյանս հավիտենից. ամեն:

12/08/2025

Ուշադրությու՛ն․ սույն ձայնագրությունը պաշտպանված է «Հեղինակային իրավունքի և հարակից իրավունքների մասին» ՀՀ օրենքով։ Ձայնագրությունը տարածելը և ցանկացած ձևով ...

12/08/2025

ԸՆԹԵՐՑՎԱԾՔ
Ավետարան ըստ Մարկոսի 2.23-3.5

23 Մի շաբաթ օրով նա անցնում էր ցորենի արտերի միջով: Եվ նրա աշակերտները գնալու ժամանակ սկսեցին հասկ պոկել և ուտել:
24 Եվ փարիսեցիները նրան ասացին. «Տե՛ս, քո աշակերտները շաբաթ օրով ինչ են անում, մի բան, որ օրինավոր չէ»:
25 Հիսուս նրանց ասաց. «Դուք երբևիցե չե՞ք կարդացել, թե ինչ արեց Դավիթը, երբ կարիք ունեցավ և քաղց զգաց ինքը և նրանք, որ իր հետ էին.
26 թե ինչպես Աբիաթար քահանայապետի օրով մտավ Աստծո տունը և կերավ առաջավորության հացը՝ տալով նաև նրանց, որ իր հետ էին. մի բան, որ, բացի քահանաներից, ուրիշների համար օրինավոր չէր ուտել»:
27 Եվ ասաց նրանց. «Շաբաթ օրը մարդու համար է, և ոչ թե մարդը՝ շաբաթ օրվա համար.
28 ապա ուրեմն, մարդու Որդին տերն է և շաբաթ օրվա»:
3
1 Եվ նա նորից ժողովարան մտավ. այնտեղ կար մի մարդ, որի ձեռքը չորացած էր:
2 Եվ ուշադրությամբ դիտում էին նրան՝ տեսնելու, թե շաբաթ օրով նրան կբժշկի՞, որպեսզի ամբաստանեն նրան:
3 Եվ Հիսուս ասաց այն մարդուն, որի ձեռքը չորացած էր. «Վե՛ր կաց, մեջտե՛ղ արի»:
4 Ապա ասաց նրանց. «Շաբաթ օրով ի՞նչ բան է օրինավոր անել. բարի գո՞րծ գործել, թե՞ չարիք անել. մի հոգի՞ ազատել, թե՞ կորստյան մատնել»: Եվ նրանք լռեցին:
5 Եվ Հիսուս, ցասումով լցված, նայելով նրանց և տրտմելով նրանց սրտի կուրության համար, ասաց մարդուն. «Երկարի՛ր ձեռքդ»: Եվ նա երկարեց, ու նրա ձեռքը առողջացավ:

12/08/2025

ԱՅՍՕՐ
Բ օր Աստվածածնի պահքի

11/08/2025

ԱՂՈԹՔ ՍՈՒՐԲ ՀՈՎՀԱՆՆԵՍ ԳԱՌՆԵՑՈՒ ԵՐԿՈՒՇԱԲԹԻ ՕՐՎԱ

Ո՛վ ամենակալ և ամենակարող Տեր և Աստված իմ, որ այս օրը քո ամենազոր և բարձրագույն խոսքով ջրերի զանգվածը անջրպետելով բաժանեցիր երկու մասի և անսուտ ամրությամբ սահմանեցիր երկնքի հաստատությունը ջրերի մեջ` բոլոր զվարթունների զբոսավայր: Ընկնում եմ քո առջև և աղաչում քեզ. Ասա՛ այդ խոսքդ ինձ` «Թողնված են քե՛զ մեղքերդ» բազում: Որովհետև իմ անօրինությունները բարձրացան իմ գլխից [վեր], և իմ հանցանքների բազմությունը ծածկեց ինձ: Չարասերիս չարիքին չափ չկա, և ոչ` թիվ ցավալի անօրինությանս: Հեռացրու ինձնից հանցանքներս, Տեր, և անջրպետելով վերացրու վերքերը վիրավորված ծառայիս, և արժանացրու անպիտան ծառայիս քո երկնային արքայությանը, քո բոլոր սրբերի մոտ, որ նրանց հետ փառավորեմ ամենասուրբ տերությունդ` Հայր և Որդի և Սուրբ Հոգի. այժմ և միշտ և հավիտյանս հավիտենից. ամեն: