04/10/2025
🇬🇪 Բախումներ Վրաստանում՝ տեղական ընտրություններից հետո
📍 Հոկտեմբերի 4-ին Վրաստանում անցկացվեցին տեղական ինքնակառավարման մարմինների ընտրություններ, որոնք ընդդիմադիր մի շարք ուժեր բոյկոտեցին՝ պահանջելով արտահերթ խորհրդարանական ընտրություններ։
Քվեարկությանը մասնակցեցին միայն երկու խոշոր ընդդիմադիր կուսակցություններ․ մյուսները հրաժարվեցին մասնակցել՝ նշելով, որ քաղաքական դաշտը փակ է, քանի որ ընդդիմադիր մի շարք առաջնորդներ շարունակում են մնալ բանտերում, իսկ հասարակական կազմակերպությունները գործում են «օտարերկրյա գործակալների մասին» նոր օրենքի շրջանակներում։ Միևնույն ժամանակ նշվում էր, որ միջազգային դիտարկումներն այս ընտրություններին եղել են սահմանափակ։
Քվեարկությունից հետո մի քանի քաղաքներում սկսվել են բողոքի ակցիաներ։ Ցուցարարների մի խումբ հավաքվել է խորհրդարանի մոտ։ Նախագահական նստավայրի հատվածում հավաքված ցուցարարների և ոստիկանության միջև տեղի են ունեցել բախումներ։ Ցուցարարները կոտրելով նստավայրի ցանկապատը՝ ներթափանցել են բակ։ Իրավապահները կիրառել են հատուկ միջոցներ՝ ջրցան մեքենաներ, արցունքաբեր գազ և սփրեյ։
Վրաստանի առողջապահության նախարարության տվյալներով՝ բախումների հետևանքով հոսպիտալացվել է վեց ցուցարար և 21 ոստիկան, իսկ մոտ 30 մարդ տեղում ստացել է առաջին բուժօգնություն։ Նախարարությունը հայտնել է, որ մեկ վիրավոր գտնվում է ծանր վիճակում, մյուսները բժիշկների հսկողության տակ են։
📌 Հոկտեմբերի 5-ին՝ ժամը 02:00-ի դրությամբ, Թբիլիսիում ոստիկանությունը սկսել է ձերբակալել բողոքի ակցիայի կազմակերպիչներին։
📍 Նախնական հաշվարկենրով իշխող «Վրացական երազանք - Ժողովրդավարական Վրաստան» (վրացերեն հնչում է «Քարթուլի օցնեբա — Դեմոկրիատուլի Սաքարթվելո») կուսակցությունը, որը 2012թ–ին ստեղծել է օլիգարխ Բիձինա Իվանիշվիլին, ավելի քան 70% ձայն է հավաքել։
Publika English
