Bon FM, Kaya Irlanda 11, Bonaire (2026)

06/06/2026

𝐀 𝐟𝐢𝐧𝐚𝐥𝐢𝐬𝐚́ 𝐤𝐮𝐚𝐭𝐞𝐫 𝐤𝐚𝐲𝐚 𝐧𝐚 𝐓𝐚𝐧𝐤𝐢 𝐌𝐚𝐭𝐫𝐢𝐦𝐨𝐧𝐢𝐨 𝐢 𝐞 𝐭𝐫𝐚𝐛𝐨𝐮 𝐭𝐚 𝐤𝐨𝐧𝐭𝐢𝐧𝐮𝐚́

E promé resultadonan di e proyekto di infrastruktura na Tanki Matrimonio ta visibel. A finalisá e trabou di asfaltamentu di kuater kaya eksitosamente. Entidat Públiko Boneiru ta sigui invertí den barionan seif, sostenibel i bon alkansabel.

Dentro di e proyekto ta asfaltá diferente kaya na Tanki Matrimonio i ta sòru pa un sistema mehorá pa desagwe di awa di yobida. Ku esaki ta mehorá alkansabilidat den e bario i por atendé mas mihó ku molèster di awa ora áwaseru kai.

Entretantu Entidat Públiko Boneiru a finalisá e trabou na Kaya Bazinia, Kaya Gobi, Kaya Zjar i Kaya Trepochi. Mesora despues di esaki a kuminsá ku e trabou den Kaya Fogon i Kaya Stèlchi, kaminda aktualmente ta trahando riba asfaltamentu i desagwe.

Direktor interino di e direktorado di R&O, Ligwino Leito ta aksentuá importansia di e proyekto: ‘Ku e proyekto akí, Entidat Públiko Boneiru ta trahando paso pa paso pa logra un mihó infrastruktura, mas siguridat den tráfiko i un ambiente di biba mas agradabel pa habitantenan di Tanki Matrimonio.’

Trabou den un bario residensial temporalmente por okashoná molèster. Pa e motibu akí Entidat Públiko Boneiru ta gradisí tur habitante i usuario di kaminda di Tanki Matrimonio pa nan komprenshon, pasenshi i koperashon durante ehekushon di e proyekto akí.

Entidat Públiko Boneiru ta sigui informá komunidat tokante progreso di e proyekto. Pa esaki, sigui e kanalnan ofisial di Entidat Públiko Boneiru.

06/06/2026

Riba djabièrnè 5 di yüni nos tabatin komo invitado den Bon dia Boneiru Yonchi Dortalina, presidente di Kriabon. Via di e siguiente link por skucha e programa aki; https://on.soundcloud.com/wUi9NlBnruEdInfg6U

05/06/2026

𝐁𝐢𝐛𝐥𝐢𝐨𝐭𝐞𝐤𝐚 𝐏𝐮́𝐛𝐥𝐢𝐤𝐨 𝐁𝐨𝐧𝐞𝐢𝐫𝐮 𝐭𝐚 𝐮𝐧 𝐝𝐢 𝐞 𝐤𝐚𝐧𝐝𝐢𝐝𝐚𝐭𝐨𝐧𝐚𝐧 𝐩𝐚 𝐞 𝐩𝐫𝐞𝐦𝐢𝐨 𝐝𝐢 𝐦𝐢𝐡𝐨 𝐛𝐢𝐛𝐥𝐢𝐨𝐭𝐞𝐤𝐚 𝐝𝐢 𝐇𝐮𝐥𝐚𝐧𝐝𝐚

Ayera e huradonan pa e premio di Mihó Biblioteka di Hulanda a bini huntu pa formulá e shortlist di 5 biblioteka. Manera tur aña ta e kaso, esaki a sòru pa dolor di kabes serka e miembronan di hurado, pesobra tabatin hopi kandidato bon ku tabata bini na remarke. Despues di un reunion di 2 ora, e desishon a kai riba e nominadonan. I Biblioteka Públiko Boneiru ta un di e kandidatonan pa e premio aki. E otro 4 kandidatonan ta Bibliotheek Hellevoetsluis, Bibliotheek Horst aan de Maas, Bibliotheek Nijkerk, i Bibliotheek Warenhuis Oss.

Bibliotheekblad ta e instansia responsabel pa e organisashon di e premio aki. Huradonan lo bish*tá e bibliotekanan, mientras ku fuera di e huradonan lo tin tambe e parti di asina yamá hurado públiko, kaminda ku hendenan via di e website di Bibliotheekblad por vota pa nan biblioteka faborito.

05/06/2026

𝐏𝐨𝐥𝐢𝐬 𝐭𝐚 𝐬𝐢𝐠𝐮𝐢 𝐤𝐨𝐧𝐭𝐫𝐨𝐥𝐚́: 𝟗 𝐛𝐮𝐭 𝐝𝐮𝐫𝐚𝐧𝐭𝐞 𝐤𝐨̀𝐧𝐭𝐫𝐨̀𝐥 𝐝𝐢 𝐭𝐫𝐚́𝐟𝐢𝐤𝐨 𝐧𝐚 𝐋𝐚 𝐔𝐧𝐢𝐨𝐧

𝐷𝑒𝑡𝑒𝑛𝑠ℎ𝑜𝑛 𝑝𝑎 𝑚𝑎𝑛𝑒ℎ𝑎́ 𝑏𝑜𝑢 𝑑𝑖 𝑖𝑛𝑓𝑙𝑢𝑒𝑛𝑠𝑖𝑎 𝑑𝑖 𝑎𝑙𝑘𝑜ℎ𝑜̀𝑙
Djaweps 4 di yüni, alrededor di 10.30 or di anochi, a detené un hòmber di inisial L.T. di 34 aña di edat riba Kaya Ramona. Un patruya a para e sospechoso pa kòntròl i e tabata mustra diferente karakterístika di un persona ku ta bou di influensia di alkohòl. Pa e motibu aki a hasi un tèst di supla kuné i a resultá ku el a konsumí mas alkohòl ku ta permití pa lei. Ademas e no por a mustra un reibeweis ni seguro bálido. A detené e sospechoso i a transport’é pa warda di polis pa kontinuá ku e trámitenan korespondiente. Aki e lo haña un but pa e violashonnan menshoná i un prosèsferbal tambe.

𝐾𝑜̀𝑛𝑡𝑟𝑜̀𝑙 𝑝𝑙𝑎𝑛𝑖𝑎́ 𝑑𝑖 𝑡𝑟𝑎́𝑓𝑖𝑘𝑜
Den oranan trempan di anochi di djaweps 4 di yüni, polis a tene kòntròl di tráfiko riba Kaminda La Union. Durante e kòntròl aki a para i kontrolá diferente vehíkulo i a duna nuebe(9) but. E butnan tabata pa entre otro manehá sin reibeweis bálido, sin seguro bálido i pa manehá sin hèlm bistí.

Kòntròlnan di tráfiko ta kontinuá!

𝑂𝑢𝑡𝑜 𝑡𝑎 𝑎𝑙𝑘𝑎𝑛𝑠𝑎́ 𝑝𝑒𝑎𝑡𝑜𝑛
Djaweps 4 di yüni, alrededor 4.55 di atardi, ‘meldkamer’ sentral a risibí notifikashon tokante un aksidente riba Kaya Dr. José Girigorio Hernandez. Un outo a bèk i alkansá un peaton. Ambulans a transportá e víktima pa hòspital pa tratamentu médiko. Konforme e maneho 'botsen is blazen', a hasi un tèst di supla ku e shofùr i no tabatin indikashon tokante uso di alkohòl.

𝑂𝑢𝑡𝑜 𝑡𝑎 𝑑𝑟𝑒𝑛𝑡𝑎 𝑚𝑜𝑛𝑑𝑖
Djaweps 4 di yüni, alrededor 1.15 di mèrdia, ‘meldkamer’ sentral a risibí notifikashon tokante un aksidente riba Kaminda La Union. Pa motibunan ainda deskonosí, un outo a drenta mondi i e pasahero a keda pegá den e vehíkulo. A dirigí brantwer, ambulans i polis na e sitio. Algun ratu despues, personal di brantwer a logra saka e víktima for di e vehíkulo. Konforme e maneho 'botsen is blazen', a hasi un tèst di supla ku e shofùr i no tabatin indikashon tokante uso di alkohòl. Ambulans a transportá ámbos víktima, e shofùr i e pasahero, pa hòspital pa tratamentu médiko.

𝐷𝑒𝑡𝑒𝑛𝑠ℎ𝑜𝑛 𝑝𝑎 𝑚𝑎𝑙𝑡𝑟𝑎𝑡𝑜 𝑑𝑖 𝑏𝑒𝑠𝑡𝑖𝑎
Djárason 3 di yüni, alrededor 3.40 di atardi, a detené un hòmber di inisial A.H.A.S. di 40 aña di edat na Kaya Dr. JosÉ Girigorio Hernandez en konekshon ku maltrato di bestia i pa no kumpli ku òrdu di polis. Investigashon den e kaso ta kontinuá.

05/06/2026

𝐁𝐨𝐧𝐞𝐢𝐫𝐮 𝐚 𝐲𝐚𝐦𝐚 𝐛𝐨𝐧 𝐛𝐢𝐧𝐢́ 𝐧𝐚 𝟏𝟓.𝟐𝟎𝟏 𝐛𝐢𝐬𝐡𝐢𝐭𝐚𝐧𝐭𝐞 𝐬𝐭𝐚𝐲𝐨𝐯𝐞𝐫 𝐝𝐞𝐧 𝐦𝐞𝐢

Tourism Corporation Bonaire (TCB) a kompartí informashon turístiko preliminario pa mei 2026, for di kua ta resultá ku Boneiru a risibí 15.201 bish*tante stayover. Esaki ta un oumento di 1,6% kompará ku mei 2025, ora ku 14.962 bish*tante a yega nos isla.

E bish*tantenan for di Hulanda a forma e grupo di mas grandi, representando 43,3% di e kantidat total di yegada ku 6548 bish*tante. E bish*tantenan for di Merka tabata e di dos grupo mas grandi, representando 26,1% di e yegadanan ku 3966 bish*tante.

En total 2190 bish*tante (14,4%) for di Kòrsou a bish*tá nos isla, siguí pa Alemania ku 307 bish*tante (2%), Aruba ku 280 bish*tante (1,8%), Bélgika ku 201 bish*tante (1,3%), Brazil ku 183 bish*tante (1,2%), Colombia ku 175 bish*tante (1,2%), Suisa ku 150 bish*tante (1%), Canada ku 147 bish*tante (1%) i Reino Uní ku 96 bish*tante (0,6%).

Mayoria di e bish*tantenan for di Merka a biaha ku un partner, siguí pa esunnan ku a biaha nan so. Mayoria a bini pa vakansi (48%), pa sambuyá (42%) i pa bish*tá amigu i famia (2,2%). Mayoria di nan a hospedá den un hotèl (54%), un vila (15,6%), un apartamento (6,8%), nan propio bibienda (6,2%) òf serka un miembro di famia (3,9%). E bish*tantenan for di Merka a bini prinsipalmente for di Florida, Texas, California, New York i North Carolina. E repartishon di edat ta mustra ku e biaheronan di 55 pa 64 aña a representá 24,1% di e bish*tantenan, miéntras ku esunnan di 65 aña bai ariba a representá 19,6% di e bish*tantenan.

Mayoria di e bish*tantenan for di Hulanda a biaha huntu ku un partner, siguí pa esunnan ku a biaha nan so. Mayoria bish*tante a bini pa vakansi (70,3%), pa bish*tá amigu i famia (10,5%) i pa negoshi (6,5%). Mayoria di e bish*tantenan a hospedá den un hotèl (51,4%), siguí pa un apartamento (14,5%), serka un miembro di famia (10,1%), den un vila (6,5%) i den nan propio bibienda (4,7%). Mayoria di e bish*tantenan hulandes a bini for di Zuid-Holland, Noord-Holland, Noord-Brabant, Gelderland i Utrecht, kaminda e grupo di edat di 55 pa 64 aña (23,5%) i e grupo di edat di 25 pa 34 aña (20,1%) tabata e segmentonan di mas grandi.

05/06/2026

𝐄𝐊𝐀𝐃𝐊 𝐭𝐚 𝐨𝐫𝐠𝐚𝐧𝐢𝐬𝐚́ 𝐦𝐚𝐫𝐬𝐡𝐞 𝐝𝐢 𝐚𝐫𝐭𝐞 𝐢 𝐤𝐮𝐥𝐭𝐮𝐫𝐚

Edukashon Artístiko di Kalidat (EKADK) ta organisá un marshe kultural na fin di luna di yüni. Meta di esaki ta pa hasi e diferente ofresedónan di kultura di Boneiru mas visibel pa skolnan, organisashonnan i komunidat.

E marshe kultural lo reuní ofresedónan di kultura ku e.o sektor di enseñansa. Su meta ta pa duna skolnan i públiko un bon bista general di tur e konosementu, talento i servisio kultural ku tin disponibel riba nos isla. Di e manera aki skolnan por haña bista kua aktividat, tayer i lès por kompletá nan programa di enseñansa i temanan di klas.

EKADK ta invitá tur persona ku kier kompartí nan konosementu, abilidat òf eksperensia riba kultura, patrimonio i edukashon. Por ehèmpel: Kontadó di kuenta, baile (folklóriko i moderno), músika i kanto, pintura, arte i obra di man, konosementu di patrimonio, tradishonnan i kustumbernan, konosementu di naturalesa, i hopi mas.

Durante e marshe kultural, partisipantenan lo haña oportunidat pa presentá nan mes i nan oferta na bish*tantenan. Nan por konta tokante loke nan tin pa ofresé, pa kua grupo di edat nan aktividatnan ta apropiá i kon skolnan, organisashonnan i otro interesadonan por hasi uso di nan servisio.

Tambe tin posibilidat pa duna un tayer òf demostrashon durante e dia. Asina e públiko por sera konosí direktamente ku diferente aktividat kultural i talento ku Boneiru tin pa ofresé.

𝑹𝒆𝒈𝒊𝒔𝒕𝒓𝒂𝒔𝒉𝒐𝒏 𝒊 𝒎𝒂𝒔 𝒊𝒏𝒇𝒐𝒓𝒎𝒂𝒔𝒉𝒐𝒏
Partisipashon i registrashon ta grátis. Bo ta un ofresedó di kultura i bo kier partisipá na e marshe kultural? Registrá bo mes via e siguiente link:
https://www.cognitoforms.com/ArtCultureEducationFoundation/MarsheDiOfresedó

Pa mas informashon, yama òf manda un mensahe via WhatsApp na 790 0155.

04/06/2026

Nos invitadonan den Bon dia Boneiru riba djaweps 4 di yüni tabata Nymphette Josephia i Sandy Gibbes i nos a papia tokante aktividatnan di Indebon. Via e siguiente link por skucha e programa; https://on.soundcloud.com/leLXMssDRZeFSJPdcG

04/06/2026

𝐙𝐫. 𝐌𝐬. 𝐆𝐫𝐨𝐧𝐢𝐧𝐠𝐞𝐧 𝐛𝐚𝐫𝐤𝐮 𝐝𝐢 𝐬𝐭𝐚𝐬𝐡𝐨𝐧 𝐝𝐢 𝐊𝐚𝐫𝐢𝐛𝐞

Zr. Ms. Groningen a tuma e funshon di barku di stashon den Karibe for di Zr. Ms. Friesland. E barku di patruya a mara na Bahia Santa Ana na Willemstad awe mainta.

Durante e próksimo lunanan, e barku lo desplegá vários tarea di seguridat riba laman, manera vigilansia, enforsamentu, i kombatimentu di aktividatnan ilegal manera kontrabanda di droga. Adishonalmente, e ta para klá pa duna sosten durante situashonnan di emergensia, por ehèmpel durante e temporada di òrkan ku a kuminsá e luna aki.

Marina Real di Hulanda tin 4 barku di patruya di klase ‘Holland’. E OPVnan aki (Barkunan di Patruya ku ta Bai Oséano) ta barkunan ku por desplegá fleksibelmente pa vigilansia di awanan kostal. E barku di stashon tin un helikòpter di kombate marítimo NH90 abordo pa sostené e barku ku operashonnan aéreo.

Pa e último kuater lunanan, Zr. Ms. Friesland a kumpli ku e ròl di barku di stashon den Karibe. Ademas di vigilá e situashon di siguridat rònt di e islanan, e barku resientemente a bish*tá New Orleans, na unda el a partisipá den festividatnan markando e di 250 aniversario di Estados Unidos di Merka.

Ku presensia di un barku di stashon den e region, Defensa ta kontribuí na pas i seguridat den Karibe.

04/06/2026

𝐄𝐤𝐬𝐢𝐭𝐨𝐬𝐨 𝐩𝐫𝐨𝐦𝐞́ 𝐃𝐢𝐚 𝐝𝐢 𝐂𝐚𝐧𝐨𝐧 𝐭𝐚 𝐦𝐚𝐫𝐤𝐚 𝐢𝐧𝐢𝐬𝐢𝐨 𝐝𝐢 𝐂𝐚𝐧𝐨𝐧 𝐝𝐢 𝐁𝐨𝐧𝐞𝐢𝐫𝐮

Dia 17 di mei e promé Dia di Canon a tuma lugá na Fontein. Tabata un bunita dia ku mas di 250 bish*tante. E dia akí a forma e evento di apertura ofisial di Canon di Boneiru.

Canon di Boneiru ta un liña di tempu moderno ku ta duna un bista general di personanan, sitionan, artefaktonan i susesonan spesial i importante for di historia di Boneiru. Despues e Canon lo ta disponibel via un wèpsait.

Meta di e Canon ta pa kompartí historia di Boneiru na un manera simpel i aksesibel. Mester por usa e Canon den enseñansa tambe. Kada tópiko den e Canon nos ta yama un ‘bentana’. Huntu ku kada bentana ta bini un teksto kòrtiku ku informashon adishonal, manera buki, potrèt, video i podcast tokante e tópiko. E Canon ta mustra nos kon pasado, presente i futuro ta konektá ku otro.

Pa e motibu akí a skohe Fontein komo sitio pa e promé Dia di Canon di Boneiru. Ántes Fontein tabata importante pa e poblashon indígeno i awe te ainda e tin un nifikashon spesial pa Boneiru.

Ta traha e Canon huntu ku ekspertonan lokal i komunidat. Durante e Dia di Canon, bish*tantenan por a proponé tópiko pa e Canon. Hopi hende a hasi uso di esaki i nan a skirbi nan ideanan riba e bòrchi di Canon.

Dentro di poko ta pone e proposishonnan akí riba wèpsait di Entidat Públiko Boneiru. Despues komunidat por vota pa e tópikonan ku nan ta haña esunnan di mas importante pa e promé 30 bentananan di e Canon. Na fin di aña 2028 ta publiká e promé bentananan akí.

Den futuro por añadí bentana nobo na e Canon. Tambe ta posibel pa adaptá bentana eksistente ora investigashon nobo produsí informashon nobo òf ora kualke suseso importante tuma lugá ku meresé un lugá den e Canon. E Canon ta sigui desaroyá su mes pues. Historia nunka no ta para ketu i ta sigui krese ku storianan i konosementu nobo. Di e manera akí Boneiru su storia ta keda konservá pa siguiente generashonnan.

Durante e Dia di Canon a organisá diferente aktividat kultural históriko tambe. Pa esaki organisadornan ta gradisí e partnernan di kolaborashon: FuHiKuBo pa e rekoridonan kultural históriko, Adelina Piard i Alex Plantijn (Mangazina di Rei) pa e tayer di yerba medisinal, Ghislaine Monte pa e tayer di pigmento natural i Dorian Crespo Gómez pa e tayer di traha habon di klei.

Bo mes tin fitbèk tokante e Dia di Canon? Òf bo ke yuda skirbi e Canon òf organisá aktividat kultural i históriko? E ora ei manda un email na [email protected].

Entidat Públiko Boneiru ta kordiná e proyekto akí ku ta forma parti di e Agènda di Akshon Pasado di Sklabitut Boneiru.

04/06/2026

𝐑𝐞𝐬𝐭𝐨𝐫𝐚𝐬𝐡𝐨𝐧 𝐝𝐢 𝐊𝐥𝐞𝐢𝐧 𝐁𝐨𝐧𝐚𝐢𝐫𝐞: 𝐏𝐚𝐥𝐮 𝐩𝐚 𝐏𝐚𝐥𝐮

Na mei, STINAPA Bonaire su Junior Rangernan a bai Klein Bonaire kaminda nan a planta 52 palu nativo komo parti di esfuersonan kontinuo pa yuda restorá e naturalesa di e isla. E aktividat tabata dirigí pa Elsmarie Beukenboom i ta parti di e trabou di STINAPA pa yuda tene Klein Bonaire saludabel i fuerte pa futuro.

E plantamentu di palu ta forma parti di STINAPA su proyekto BESTLIFE2030, un programa internashonal ku ta sostené protekshon di naturalesa i proyektonan di klima riba islanan manera Boneiru. Pa medio di e proyekto aki, STINAPA ta trahando riba restourashon di áreanan natural riba Klein Bonaire, mehorashon di maneho di bish*tante, monitoriá naturalesa, i oumento di presensia di ranger riba e isla. E meta no ta solamente pa restorá naturalesa, pero tambe pa sòru pa Klein Bonaire ta bon protehá i kuidá riba término largu.

Restorá naturalesa riba Klein Boneiru ta hopi importante pasobra esaki ta un di e último áreanan di Boneiru ku no ta habitá. Tambe e tin playanan importante pa turtuga di laman traha nèshi i refnan di koral bunita rondó di e isla. Den pasado, partinan di Klein Boneiru a pèrdè gran parti di nan vegetashon natural pa motibu di aktividatnan humano i bestianan ku ta kome yerba. Plantamentu di palu nativo ta yuda trese e naturalesa bèk, ta proveé refugio pa founa, ta yuda prevení eroshon, i ta sostené refnan mas saludabel dor di redusí derame di awa den laman. Áreanan natural saludabel tambe ta mihó kapas pa manehá e impaktonan di kambio di klima i tormentanan mas fuerte.

STINAPA ta gradisí tur e Junior Rangernan, boluntarionan, i partnernan ku a djòin e aktividat. Dor di enbolbí hóbennan den trabou práktiko di konservashon, STINAPA ta spera di yuda e siguiente generashon konstruí un konekshon mas fuerte ku naturalesa di Boneiru i komprondé dikon protekshon ta asina importante.

Bon FM

06/06/2026

06/06/2026

05/06/2026

05/06/2026

05/06/2026

05/06/2026

04/06/2026

04/06/2026

04/06/2026

04/06/2026

Adres

Telefoon

Website

Meldingen

Contact

Snelkoppelingen

Delen